Tískublogg

Tískubloggið á Trúnó á morgun (Þorláksmessu)

2011-12-22T11:51:00.000Z

Hola lovers,

Mér finnst réttast að láta ykkur vita af því að annað kvöld, á sjálfri Þorláksmessu, mun ég halda mína eigin messu á Trúnó, Laugavegi 22, 101 Reykjavík.

Þar mun ég lesa upp úr bók minni og messa yfir lýðnum.

Fleiri skemmtiatriði verða einnig í boði, en ekkert þeirra mun jafnast á við mig.

Mæting kl. 21:00.

Sjáumst þar.

xoxo
-h

að gefnu tilefni II

2011-12-21T14:46:00.001Z

Hola lovers,

Að gefnu tilefni vil ég minna ykkur á bókina mína Hola, lovers eða Lífstíls- og megrunarbók Tískubloggsins eða Hvernig á að þóknast karlmönnum og vera betri en aðrar konur. Hún er gagngert skrifuð til þess að koma íslensku kvenþjóðinni til bjargar, en til að ná því markmiði þarf hún fyrst að komast inn í hvern jólapakka sem síðan fer inn á hvert heimili.

Oft var þörf en nú er nauðsyn. Með samstilltu kaupátaki getum við breytt heiminum.

Gefum bjarta framtíð í jólagjöf – Gefum lífstílsbók Tískubloggsins.

Þið hafið enga afsökun.

Kaupið hana.

Í dag.

Núna.

xoxo
-h

það sem þið misstuð af á jóladagatali Norræna hússins og ljúffeng Berjasæla Tískubloggsins

2011-12-20T22:33:00.001Z

Hola lovers,

Tískubloggið kom fram á jóladagatali Norræna hússins í gær. Það var hátíðleg friðarstund þar sem við minntumst Hermanns, en í gær voru einmitt þrjú ár, tveir mánuðir og átta og hálfur dagur síðan hann dó. Að minningarstundinni lokinni leiðbeindi ég gestum Norræna hússins um viðeigandi klæðaburð um hátíðirnar. Þið sem misstuð af því fáið því aldrei að vita hvernig klæðaburður í jólaglögg með vinnunni er líklegastur til þess að leiða til kynlífs með yfirmanni og mögulegrar stöðuhækkunnar í kjölfarið og þið munuð heldur aldrei vita hversu mikilvægt tjull er á sjálfan aðfangadaginn.

Missir ykkar er mikill, einsog þið sjáið af myndinni hér að neðan.


Ég og áhorfendur mínir höfðum mínútu þögn til að minnast Hermanns. Um hálsinn ber ég linsuboxið sem geymir jarðneskar leifar hans.

Ég ráðlagði þeim sem hlýddu einnig um mikilvægi þess að vera mjór öllum stundum og kom aðeins inn á hvað er æskilegt að borða um hátíðirnar og hvaða fæðutegundir beri að varast á hátíð ljóss og friðar.

Fyrir ykkur sem skrópuðu læt ég nægja að koma með einfalda, holla, megrandi og þægilega uppskrift að eftirrétti sem ég geri öll jól.

Berjasæla Tískubloggsins

Innihald:

16 ferhyrndir ísmolar
Tveir lítrar af vatni
Eitt sólber
2 dl rauður matarlitur
1,5 dl aspartam
40 g kalk
200 g maísmjöl

Aðferð:

Sjóðið ísmolana í tveimur lítrum af vatni í að minnsta kosti 4 klst. Látið löginn svo standa í 40 mín. við opinn glugga. Setjið þvínæst sólberið út í og látið það liggja í leginum í tvær mínútur. Hellið leginum síðan í gegnum grisju og skiljið berið frá. Hendið síðan berinu.

Setjið matarlit og aspartam út í löginn og hrærið varlega rangsælis, þar til hann hefur samlagast vel. Bætið kalki og maísmjöli við og þeytið þar til blandan verður létt og ljós. Setjið hana síðan í fallegt form og geymið í ísskáp yfir nótt. Þið megið svo skreyta Berjasæluna með berjum ef ykkur lystir, en þið megið ekki borða þau.

Verði ykkur að góðu.

xoxo
-h

hversvegna ég fór í fýlu og hvernig ég tók gleði mína á ný

2011-12-06T11:43:00.003Z

Hola lovers,

Sorrí að ég hafi ekkert póstað lengi, en ég er búin að vera í fýlu. Það eru tvær ástæður fyrir því:

1) Einhver helvítis femínisti skrifaði dóm um lífstílsbókina mína. Hann var ljótur og ógeðslegur. Ég átti auðvitað von á því að bókin félli í grýttan jarðveg hjá kvenrembum (því sannleikanum verður hver sárreiðastur), en ég átti satt að segja ekki von á því að viðbrögðin yrðu jafn öfgakennd og raun ber vitni. Þessi svokallaði ritdómari segir útgáfu bókarinnar vera „algjört hneyksli“ og bókin sé „stútfull af allskonar óþverra“. Annað í bókinni kallar hún „algjört kjaftæði“. Í kommentakerfið þyrpist síðan öfgafullur og pólitískt réttþenkjandi sértrúarsöfnuður íslenskra femínista sem tyggur vitleysuna upp eftir ritdómara og bætir sínu í sarpinn.

Ég ætla ekki að gera lesendum mínum þann grikk að hafa eftir allt sem þar er sagt um mig og bókina mína, en þar má finna ummæli á borð við þau að ég sé „óþolandi birtingarmynd andlegrar auðnar nútímaþjóðfélagsins“ og annað í svipuðum dúr.

2) Síðastliðinn fimmtudag var tilkynnt um tilnefningar til Íslensku bókmenntaverðlaunanna. Hola, lovers eða Lífstíls- og megrunarbók Tískubloggsins eða Hvernig á að þóknast karlmönnum og vera betri en aðrar konur var EKKI tilnefnd í flokki fræðirita.

Ég trúði satt að segja ekki eigin augum þegar ég sá fréttirnar. Það að bókin mín hafi verið sniðgengin með þessum hætti sýnir náttúrulega hversu víðtækt samsæri femínista gegn mér er í raun og veru. Ég hef VG líka grunuð um að nýta hvert tækifæri til þess að leggja stein í götu mína (því það vita allir að VG þolir ekki fallegar, kynþokkafullar og vinsælar konur, þannig að ég held það sé engin tilviljun að bók mín, þrátt fyrir að eiga verðlaunin mest skilið allra bóka sem út komu á árinu, sé sniðgengin af dómnefnd á sama tíma og fulltrúi VG sitji í mennta- og menningarmálaráðuneytinu), en þó hef ég ekki fengið neinar óyggjandi staðfestingar á þessum rökstuddu grunsemdum mínum, svo ég þori ekkert að fullyrða um það að svo stöddu. Látum nægja að það komi fram að ég sé lítt trúuð á tilviljanir.

En þrátt fyrir þessi ofangreindu boðaföll hef ég nú tekið gleði mína á ný, því mér bárust nýverið fregnir af því að Hola, lovers eða Lífstíls- og megrunarbók Tískubloggsins eða Hvernig á að þóknast karlmönnum og vera betri en aðrar konur vermir nú hvorki meira né minna en fyrsta sætið á metsölulista Bókabúðar Máls og menningar!

Og þar, lesendur góðir, á hún svo sannarlega heima.

Tískubloggið sigrar að lokum.

xoxo
-h

vandræði kvenna

2011-11-29T10:07:00.000Z

Hola lovers,

Ég hef áður fjallað um samskiptavandræði kvenna hér á blogginu. Og enn halda rætnar konur áfram að vandræðast, einsog Vísir.is bendir á í umfjöllun sinni „Herman Caine aftur í kvennavandræðum“. En hann lenti nýverið í því að vandræðakona sakaði hann um að hafa haldið við sig í mörg ár, en fyrri kvennavandræðin sem fréttin vísar til er þegar hann lenti í því að „fjórar konur sökuðu hann um kynferðislega áreitni“.

Einsog fréttin gefur til kynna liggja vandræðin bersýnilega kvennanna megin, og þær ættu að líta í eigin barm. Ég meina, hvað vakir eiginlega fyrir þeim? Vita þær ekki að hann þarf að huga að frama sínum sem mögulegur forseti Bandaríkjanna?

xoxo
-h

megrun alla daga

2011-11-25T10:29:00.000Z

Hola lovers,

Pjattrófurnar vita að allar konur vilja vera mjórri en þær eru. Þær lögðu nýverið til að lesendur sínir færu í megrun annan hvern dag, en skyldu þó jafnframt gæta „þess bara að ganga ekki of langt á „venjulegu“ dögunum og skemma allt“.

Mér finnst þetta ekki nógu djúpt í árina tekið hjá þeim og vil því hérmeð árétta að allar konur eiga að vera í megrun alla daga, en ekki bara annan hvern dag.

Því einsog þið sjáið, þá geisla allar grannar konur beinlínis af hamingju.

xoxo
-h

Viðtal við Tískubloggið

2011-11-22T21:41:00.000Z

Hola lovers,

Hér er viðtal við mig vegna nýútkominnar lífstílsbókar minnar (sem er btw komin í allar helstu bókaverslanir).

Ég vara viðkvæma við myndunum sem birtast hérna að neðan. En fréttin gerir því miður ekki annað en að varpa ljósi á hversu langt sumir hagsmunahópar eru tilbúnir til seilast til þess að ná sínu fram.

xoxo
-h

þér er mögulega boðið

2011-11-22T15:10:00.000Z

Smellið til að stækka.

xoxo
-h

THE POWER OF MAKE UP! Fyrir og eftir myndir!

2011-11-20T19:44:00.001Z

Hola lovers,

Orðið "útlitsdýrkun" er mikið notað í íslenskri tungu. Allir vita að það er smart að spá í útlitinu, enda geri ég það óspart. Ég hef gaman af því að líta vel út. Ég víla ekki fyrir mér að nota snyrtivörur og ég beiti öllum ráðum.

(Ég meina, það fæðist enginn með viðlíka fegurð og ég bý yfir. Þetta er svona 27% vinna, lovers. Haldiði að það sé einhver tilviljun að íslenskar konur séu þær fegurstu í heimi og að á Íslandi sé jafnframt að finna hæsta hlutfall öryrkja miðað við höfðatölu á öllum Norðurlöndum?)

Ég hef mikið fyrir því að líta út einsog ég geri. Ég veit samt að það hafa ekki allir genin í það, þannig að hingað til hef ég, af tillitssemi við ykkur, lesendur mína, einungis birt myndir af mér ómálaðri hérna á blogginu. En samkeppnin í bloggheimum hefur aukist, lífstílsbókin mín kemur í búðir í vikunni, og þessvegna sé ég mér ekki annað fært en að birta loksins myndir af sjálfri mér með andlitsmálningu.

Ykkur til glöggvunar birti ég samt bæði FYRIR og EFTIR myndir, svo þið sjáið með eigin augum hversu miklu munar í stimamýkt, líkamsfegurð, útgeislun og kynþokka*.

FYRIR MAKE UP

EFTIR MAKE UP

Aaahhh aðeins betra!

*Ráðleggingar um það hvernig má hámarka útlitsgæði má finna í lífstílsbók Tískubloggsins sem kemur í búðir í vikunni. Ekki örvænta, lovers. H er hér.

xoxo
-h

að gefnu tilefni

2011-11-16T13:35:00.000Z

Hola lovers,

Til hamingju með Dag íslenskrar tungu!

Njótið hans.

xoxo
-h

inspiration dagsins

2011-11-10T15:59:00.000Z

xoxo
-h

frumsýning

2011-11-03T10:18:00.000Z

Hola lovers,

Ég kynni ykkur jólagjöfina í ár:

xoxo
-h

inspiration dagsins

2011-10-21T14:14:00.000Z

xoxo
-h

inspiration dagsins

2011-10-20T11:06:00.000Z

xoxo
-h

Tískubloggið kíkir í snyrtitösku

2011-09-28T19:15:00.001Z

Hola lovers,

Um daginn fékk Tískubloggið að kíkja í fataskáp. Það vakti mikla lukku (þrátt fyrir að næstum enginn hafi nennt að kommenta á færsluna, hvað er eiginlega að ykkur asshóls? hafið þið enga sál?) og því ákvað ég að endurtaka leikinn og kíkja nú í snyrtiveski.

Sigga.

Sigga er ákaflega merkileg kona. Hún stofnaði og rekur sitt eigið fyrirtæki og hefur náð afar skjótum frama á mjög stuttum tíma, en sem fyrr þá læt ég mér nægja að nefna það í framhjáhlaupi áður en ég sný mér að því sem mestu máli skiptir: Hvernig snyrtivörur hún notar.

***

Tískubloggið: Hvernig snyrtitösku áttu?

Sigga: Ég held það sé ekkert merki, sko. Ég keypti hana í útlöndum og ég er búin að eiga hana mjög lengi.

Tískubloggið: Ekkert merki?

Sigga: Nei.

Tískubloggið: Ekki einusinni Body Shop?

Sigga: Nei.

Tískubloggið: Ekki einusinni L´oréal?

Sigga: Nei...

Tískubloggið: Kannski Kanebo?

Sigga: Nei. Ég veit sko ekki hvernig merk....

Tískubloggið: Lancôme?

Sigga: Ég hélt við ætluðum að tala um hvað er í snyrtitöskunni.

Tískubloggið: Hvað er í snyrtitöskunni þinni?

Sigga: Sko, ég er alltaf með hyljarann minn, fljótandi meik, púður og augnblýant. Og svo auðvitað maskara, og ef það koma upp neyðartilvik þá er ég líka alltaf með augn...

Tískubloggið: Engir smokkar?

Sigga: Nei.

Tískubloggið: Sæðisdrepandi krem?

Sigga: Nei.

Tískubloggið: Hettan? Pillan?

Sigga: Ég kann ekki við að vera að ræða um getnaðarvarnir hérna, sko.

Tískubloggið: Hvað hefurðu sofið hjá mörgum strákum?

Sigga: Hvað kemur það málinu við?

Tískubloggið: 10?

Sigga: Nei.

Tískubloggið: 20?

Sigga: ...

Tískubloggið: 30?

Sigga: Veistu mér finnst það bara ekkert koma þér við hvað ég hef...

Tískubloggið: Ertu ólétt?

Sigga: Nei!

Tískubloggið: Eru einhverjar öðruvísi pillur í snyrtiveskinu þínu?

Sigga: Öðruvísi pillur?

Tískubloggið: Einsog geðlyf?

Sigga: Nei...

Tískubloggið: Róandi lyf?

Sigga: Nei...

Tískubloggið: Hefur þú einhvern tímann geymt geðlyf í snyrtiveskinu þínu?

Sigga: Nei.

Tískubloggið: Róandi lyf?

Sigga: Nei.

Tískubloggið: En lítinn hníf?

Sigga: Nei.

Tískubloggið: En beitta naglaklippu? Beitta naglaþjöl?

Sigga: Afhverju ertu að spyrja að því?

Tískubloggið: Hefur einhverntímann ilmvatnsflaska brotnað í snyrtiveskinu þínu?

Sigga: Já, reyndar! Þegar ég fór til útlanda í sumar þá brotnaði einmitt flaska af....

Tískubloggið: Þú veist að alkóhólið í ilmvatninu skemmir smokkana.

Sigga: Ég sagði þér að ég er ekki með neina smokka. Og ég vil helst ekki vera að ræða getnaðarva...

Tískubloggið: Það er alls ekki óhætt að nota þá eftir svoleiðis slys.

Sigga: Ég var ekki með neina smo...

Tískubloggið: Hvern varstu að fara að hitta í útlöndum?

Sigga: Ha?

Tískubloggið: Hvenær varstu síðast á blæðingum?

Sigga: Blæðingum?

Tískubloggið: Eru túrtappar í snyrtiveskinu þínu?

Sigga: Kannski, ég, ég.... man það bara ekki.

Tískubloggið: Þannig að þér finnst bara allt í lagi að mæta óundirbúin í viðtal?

Sigga: Ha?

Tískubloggið: Og finnst þér ekkert ókurteisi að þú hafir ekkert spurt mig um mitt snyrtiveski?

Sigga: Ég hafði ekki hugsað út í að...

Tískubloggið: HA?

Sigga: Hvað er í þínu snyrtiveski?

Tískubloggið: Linsubox.

Sigga: Já, notarðu linsur?

Tískubloggið: Nei.

Sigga: ...

Tískubloggið: Viltu sjá linsuboxið?

Sigga: U, jájá.

Tískubloggið:

Sigga: Vá, það er mjög...

Tískubloggið: Veistu hvað er í því?

Sigga: Nei.

Tískubloggið: Líkamsleifar.

Sigga: Ha?

Tískubloggið: Þetta er aska.

Sigga: [ræskir sig]

Tískubloggið: Askan af hundinum mínum. Hann dó í eldsvoða. Ég skrapaði hana upp af gólfinu með visa-kortinu mínu eftir að slökkviliðið slökkti eldinn. Hún er ennþá blaut. Viltu finna lyktina af henni?

Sigga: Nei, takk.

Tískubloggið: Hver er uppáhaldslyktin þín?

Sigga: Ég, ég veit það ekki.

Tískubloggið: Hvað er uppáhalds ilmvatnið þitt?

Sigga: Ég man ekki...

Tískubloggið: L´oréal? Kanebo? Lancôme?

Sigga: Hver var aftur spurningin?

Tískubloggið: Eitthvað að lokum?

Sigga: Má ég fara heim núna?

***

Tískubloggið þakkar Siggu kærlega fyrir spjallið og birtir jafnframt mynd af snyrtiveski hennar:

xoxo
-h

einstakt tækifæri fyrir almúgann! Alien vs. Predator og Predalien myndir óskast! auk þess sem titill lífstílsbókar Tískubloggsins er birtur í fyrsta sinn á opinberum vettvangi! (og ég tryggi mér tvenn verðlaun, hið minnsta)

2011-09-26T22:04:00.001Z

Hola lovers,

Nú er verið að leggja lokahönd á lífstílsbók Tískubloggsins. Enn vantar þó myndskreytingu fyrir kaflann þar sem ég beiti fræðilegri nálgun og greini þær skírskotanir til femínisma sem finna má í kvikmyndinni Alien vs. Predator.

Því býðst ykkur nú einstakt tækifæri til þess að taka þátt í að skapa eitthvað sem er stærra og merkilegra en þið sjálf (sem er bókin mín). Endilega sendið inn teikningar og takið þátt í því að skapa bestu bók í heimi! Svona tækifæri kemur sko bara einusinni á ævinni.

Nánari upplýsingar má finna hér.

Og ég var að fatta að ég hef ekki enn birt titilinn á bókinni hér á Tískublogginu, þó það sé auðvitað löngu búið að negla hann.

Hann er svohljóðandi:

Og já, ég ætla að vinna verðlaunin fyrir lengsta bókatitilinn þessi jól. (Eru verðlaunin annars ekki detox-námskeið?)

(Glöggir lesendur átta sig á því að með þessari færslu hef ég einnig tryggt mér verðlaunin fyrir lengsta bloggfærslutitil þetta misserið (hvað ætli sé í verðlaun fyrir hann?))

xoxo
-h

inspiration dagsins

2011-09-26T16:54:00.000Z

xoxo
-h

átfitt dagsins

2011-09-24T17:00:00.000Z

Bolur: Af kærasta.

Leggó: Bleikar.

Sokkar: Úr íslenskri ull. Gefins.

Hár: Slegið.

Köttur: Loðinn.

xoxo
-h

Tískubloggið kíkir í skápinn hjá Önnu Mæju

2011-09-08T16:06:00.001Z

Hola lovers,

Einsog þið vitið þá stunda flestir fjölmiðlar það að fá að kíkja í fataskápa hjá áhugaverðum konum sem eru að gera eitthvað eftirtektarvert. Tískubloggið lætur að sjálfsögðu ekki sitt eftir liggja og fær að þessu sinni að kíkja í skápinn hjá Önnu Mæju!

Anna Mæja hefur afrekað margt og er ótrúlega merkileg, en ég læt mér nægja að nefna það í framhjáhlaupi áður en ég sný mér að því sem skiptir mestu máli; Hvernig hún klæðir sig, hvar hún kaupir fötin sín og síðast en ekki síst hvar hún geymir þau.

Anna Mæja

VIÐTAL TÍSKUBLOGGSINS VIÐ ÖNNU MÆJU

Tískubloggið: Anna Mæja, hvar kaupir þú fötin þín?

Anna Mæja: Í búðum.

Tískubloggið: Með hverju borgarðu?

Anna Mæja: Með peningum, stundum korti.

Tískubloggið: Hver er uppáhalds flíkin þín?

Anna Mæja: Ég túrkíslitaðan hlírabol með semelíusteinum sem ég keypti í Smáralindinni fyrir tveimur vikum sem ég get ekki lifað án.

Tískubloggið: Hvar geymir þú fötin þín?

Anna Mæja: Heima. Í skáp. Og stundum á gólfinu og sona.

Tískubloggið: Ef það myndi kvikna í húsinu þínu og þú mættir bara velja eina flík til að bjarga úr eldinum, hvaða flík myndir þú velja?

Anna Mæja: Ha?

Tískubloggið: Þú hefur engan tíma til að hugsa og þú verður að taka skyndiákvörðun.

Anna Mæja: Ha?

Tískubloggið: Ef það myndi kvikna í húsinu þínu og þú þyrftir að velja á milli þess að bjarga fataskápnum þínum eða kærastanum þínum úr eldinum, hvað myndirðu gera?

Anna Mæja: Ég á ekki kærasta.

Tískubloggið: En ertu ekki alltaf vel til höfð?

Anna Mæja: Jú.

Tískubloggið: Ég hef misst alla virðingu fyrir þér.

Anna Mæja: Ha?

Tískubloggið: Ef það myndi kvikna í húsinu þínu og þú yrðir að velja á milli þess að bjarga fataskápnum þínum eða hundinum þínum úr eldinum, hvað myndirðu gera?

Anna Mæja: Ég á ekki hund.

Tískubloggið: Ég átti einusinni hund.

Anna Mæja: Já, ókei.

Tískubloggið: Hann hét Hermann.

Anna Mæja: Núnú.

Tískubloggið: Viltu sjá mynd af honum?

Anna Mæja: Umm... jájá.

Tískubloggið:

Anna Mæja: Vá, hann er mjög... uu...

Tískubloggið: Finnst þér hann ekki sætur?

Anna Mæja: Jújú.

Tískubloggið: Hann dó í eldsvoða.

Anna Mæja: .........

Tískubloggið: Ef það myndi kvikna í húsinu þínu og þú þyrftir að velja á milli þess að bjarga fataskápnum þínum eða mömmu þinni úr eldinum, hvað myndirðu gera?

Anna Mæja: Ég myndi bjarga mömmu.

Tískubloggið: Þú getur alltaf keypt þér nýja mömmu. Fötin eru óbætanleg.

Anna Mæja: Ha? Hvar?

Tískubloggið: Hver er uppáhalds hönnuðurinn þinn?

Anna Mæja: Coco Chanel. Hún var bara svo original, og þorði að fara eigin leiðir. Hún var með tímalausan stíl og...

Tískubloggið: Hún dó í eldsvoða.

Anna Mæja: NEI!

Tískubloggið: Hún var nasisti.

Anna Mæja: NEI! Það hefur ekki verið sannað! Það eru bara getgátur, og þetta voru ábyggilega hrikalegir tímar. Veistu hvað það var erfitt að vera með einhverjar hugsjónir á þessum árum, fólk gerði bara það sem það varð til að...

Tískubloggið: Í hverju varstu þegar þú fæddist?

Anna Mæja: Ha? Engu!

Tískubloggið: Eitthvað að lokum?

Anna Mæja: Ha?

Tískubloggið: Takk fyrir viðtalið.

OG NÚ FÁUM VIÐ AÐ KÍKJA Í FATASKÁPINN HENNAR ÖNNU MÆJU

xoxo
-h

daily bobsession!

2011-09-06T20:05:00.000Z

Bob Glenn.

xoxo

-h

það sem við höfum alltaf vitað; varalitur eyðir femínisma (og blómatími íslenskra kvenna; árið 1981)

2011-08-21T16:00:00.001Z

Hola lovers,

Ég mæli með því að þið hlustið öll á viðtalið við hana Tobbu hér. Þar bendir Tobba réttilega á að gagnrýni sem hún hefur fengið á fyrirhugaðan sjónvarpsþátt sinn frá meintum femínista falli kylliflöt um sjálfa sig, því sést hafi til meinta femínistans með varalit. En allir vita að femínistar eru ljótar, loðnar og leiðinlegar konur sem hugsa ekkert um útlitið og af því leiðir þá að konan getur ekki verið femínisti og gagnrýni hennar því með öllu ómarktæk.

Þetta er nokkuð sem ég hef lengi vitað; að snyrtivörur núlla út alla feminíska tilburði kvenna. Því allir vita að sætar konur þurfa ekki að vera teknar alvarlega, vera metnar að verðleikum, fá sanngjörn laun eða stjórnunarstöður. Aukinheldur benda rannsóknir til þess að konur eyði að meðaltali þremur árum lífs síns í að hugsa um útlitið, mála sig, klæða sig, greiða sér, raka á sér lappirnar, o.fl., og snyrtileg kona með varalit getur því varla haft tíma til að hafa áhyggjur af stöðu kvenna eða tíma til að mynda sér skoðanir sem mark er takandi á.

Tobba stærir sig af því að hafa fært réttindabaráttu kvenna aftur til ársins 1981 og heimtar einkennisbúning fyrir (ætti maður að líta á þetta sem áskorun, lovers? lógósamkeppnin sýndi svo sannarlega hversu liðtæk við erum í hönnun, einn einkennisbúningur ætti nú að vera lítið mál), en með því held ég að hún hljóti að vísa til þess hve mjög hún hefur lagt sitt af mörkum til þess að hefta útbreiðslu femínisma meðal kvenna – einmitt með því að halda að þeim sjónvarpsþáttum og bókum um varaliti.

Varalitur: Besta vopnið í baráttunni gegn femínisma.

(Og allir í þættinum eru reyndar alveg sammála um að það sé bara hið besta mál að færa kvenréttindabaráttuna aftur til ársins 1981, því þá hafi verið svo fínt að vera kona. Þó ég hafi ekki verið fædd það ár, þá held ég að þetta sé hárrétt hjá þeim, því ég sé ekki betur en árið 1981 hafi einmitt verið blómatími íslenskra kvenna. Þá var atvinnuþátttaka kvenna á Íslandi 65% og á tímabilinu 1979-1981 voru laun kvenna í fullu starfi að jafnaði 71% af launum karlmanna, sem ég tel að endurspegli u.þ.b. muninn á virði þeirra sem manneskjur. Árið 1978 voru aukinheldur 5% þeirra sem kosnir voru til fjögurra ára setu á Alþingi konur, þar var enginn kvenkyns ráðherra, og árið 1986 var hlutfall kvenna í sveitarstjórnum 24,6%. Var þetta ekki bara ídeal, lovers?)

xoxo
-h

bækur sem ég vil banna, 1. hluti

2011-08-03T13:25:00.000Z

Hola lovers,

Einsog þið vitið þá læt ég mig æskuna varða. Ég vil að samfélag okkar ali upp heilsteypta einstaklinga með heilbrigð lífsviðhorf. Ég vil hugsa um börnin og vernda þau gegn óæskilegum öflum sem koma allskonar grillum í hausinn á þeim, s.s. sósíalisma, jafnaðarstefnu, umhverfisvernd og femínisma.

En þessi barátta mín er erfið, því þessi annarlegu viðhorf sem ég nefndi hér að ofan virðast því miður vera á góðri leið með því að verða rótgróin í samfélagi okkar. Þessi öfl svífast einskis til þess að koma áróðri sínum að börnum, og nota m.a. til þess barnaefni og aðra miðla sem sérstaklega er beint að ungum ómótuðum sálum sem eru varnarlaus gagnvart skilaboðunum.

Ég tel að hið eina rétta í stöðunni sé að banna barnaefni sem er gegnsýrt af röngum áróðri (efni sem inniheldur réttu skilaboðin eru aftur á móti auðvitað í lagi).

Bókin sem er efst á lista er eftir Bryndísi Jónu Magnúsdóttur og ber titilinn Senjorítur með sand í brók.

Titillinn er augljós vísun í kvenrembu (femínisma), því einsog alþjóð veit þá eru allir femínistar með sand í píkunni.

Barnsleg kápumyndin tekur aukinheldur af öll tvímæli um það að bókinnni sé beint að stúlkubörnum (skærir litir, teiknimyndalegar fígúrur) og því er hér bersýnilega óforskammað femínistarit á ferð sem er ætlað að innræta saklausum og áhrifagjörnum stúlkubörnum kvenrembu.

Ég legg því hérmeð til að þessi bók verði tafarlaust bönnuð.

Það er von mín að þið, lesendur kærir, hjálpið mér að bjarga æsku Íslands og nefnið hér í athugasemdakerfi síðunnar þær bækur sem þið hafið rekist á og ætti einnig að banna.

Hver veit svo nema við getum haldið almennilega bókabrennu einhverntímann í haust.

xoxo
-h

Játning: Ég og nágranni minn (framhald af framhaldinu af framhaldinu)

2011-07-30T12:19:00.000Z

Hola lovers,

Hér fyrir neðan er játning sem ég sendi Bleikt.is og bað þær um að birta nafnlaust, því ég vildi ekki að kærastinn minn kæmist að því hvað fram fór á milli mín og nágranna míns.

En einhverra hluta vegna hefur ritstjórn Bleikt.is ákveðið að birta ekki bréf mín, og ég sé mér því miður ekki annað fært í stöðunni en að gera það sjálf, ef ske kynni að ég einn daginn ætti ég ekki afturkvæmt.

****

frá: tiskublogg@gmail.com
til: jatningar@bleikt.is
dagsetning: 27. júlí 2011 kl. 10:42
titill: játning mín

Kæra ritstjórn,

Hér er játning mín.

Ég treysti því að þið haldið nafni mínu leyndu þegar þið birtið hana. Ég vil nefnilega síður að kærasti minn komist að þessu.

xoxo

-h

******

Játning: Ég og nágranni minn

Ég á nágranna. Hann er myndarlegur, einhleypur og vel stæður. Þegar ég er andvaka fer ég stundum út á svalir og horfi á hann sofa. Þaðan er nefnilega prýðilegt útsýni inn í svefnherbergið hans, sérstaklega ef ég stend uppi á kolli og teygi fram álkuna. Hann er fallegur þegar hann sefur.

Vandamálið er bara að ég á kærasta.

Það kom samt ekki í veg fyrir að ég byði honum inn í síðustu viku.

Það var alveg óvart. Kærastinn var í veiðiferð, ég var nýkomin úr brasilísku vaxi og hafði komið við á leiðinni heim og keypt mér hvítvín, ostrur, humar og franska súkkulaðiköku. Og þegar ég var rétt búin að híma frammi á stigapalli fyrir utan íbúðina hans í tæpan klukkutíma þá rakst ég óvænt á hann. Ég missti töskuna mína og út úr henni datt lítil flaska af unaðsolíu. Við beygðum okkur bæði til að taka hana upp. Hendur okkar snertust. Ég brosti til hans undan hárinu og hann hnerraði. Síðan spurði ég hann hvort hann gæti ekki hjálpað mér að bera unaðsolíuna inn. Hann varð ráðvilltur á svipinn af losta, ræskti sig nokkrum sinnum og kinkaði svo kolli. Þegar við komum inn sagði ég honum að hann gæti lagt unaðsolíuna frá sér inni í svefnherbergi. Hann gerði það og lét einsog hann sæi ekki bleiku handjárnin sem ég hafði óvart skilið eftir á satínkoddanum.

Þegar hann kom fram var ég búin að opna hvítvínsflöskuna og af gömlum vana hafði ég óvart hellt í tvö glös. Ég vildi síður að þetta fína vín færi til spillis svo ég spurði hvort hann vildi ekki bara drekka það með mér. Hann var ógurlega kurteis og hristi fyrst höfuðið og afþakkaði, þó ég sæi vel að hann langaði ekkert meira en að þiggja hvítsvínsglasið og eiga stund með mér. Ég ítrekaði því boðið og það þurfti ekki mikið til að sannfæra hann um að segja já; það tók ekki nema nokkrar mínútur. Ég settist við eldhúsborðið, hann kaus frekar að standa, og hann hlýtur að hafa verið mjög óöruggur og spenntur í nærveru minni, því hann drakk vínið mjög hratt og kláraði úr glasinu í u.þ.b. þremur sopum. Hann leit staðfastur í augun á mér, lagði glasið á borðið og þakkaði fyrir sig. Rödd hans var full af þrá. Ég kom auga á blett á buxunum hans efst á lærinu, rétt undir nára. Ég er áhugamanneskja um þvottaefni, svo ég lagði höndina á blettinn, nuddaði hann og sagði honum að ef hann vildi gæti hann farið úr buxunum og ég gæti lagt þær í bleyti fyrir hann og fjarlægt blettinn.

Hann kipptist við og bakkaði frá mér, einsog hann væri hræddur um að lostinn myndi bera hann ofurliði þá þegar. Svo opnaði hann munninn og virtist í þann mund að segja eitthvað fallegt þegar við heyrðum skerandi hávaða, glugginn opnaðist og eldhúsið fylltist af blindandi ljósi.

Ég veit ekki hvað gerðist síðan. Við rönkuðum við okkur mörgum klukkutímum seinna þarsem við lágum bæði á eldhúsgólfinu. Hvítvínið var orðið hlandvolgt og það var komin skrýtin lykt af ostrunum. Nágranni minn settist upp, leit ringlaður í kringum sig og svo fékk hann fossandi blóðnasir. Ég rétti honum eldhúsrúllublað, en hann sló á hönd mína og hljóp svo fram. Stuttu síðar heyrði ég hann skella hurðinni inn til sín.

Nú eru fjórir dagar síðan þetta gerðist. Kærastinn minn kemur heim úr veiðiferðinni á morgun. Ég get ekki sofið, því mig dreymir í sífellu að ég liggi nakin á köldum bekk, umkringd blindandi ljósum. Hávaðinn er ærandi, en hvernig sem ég reyni get ég hvorki hreyft legg né lið. Ég get heldur ekki litið til hliðanna og þessvegna get ég ekki séð þá sem eru á hreyfingu í kringum mig. Þeir eru samt þarna, rétt utan við sjónsvið mitt og líkjast helst skuggum af litlum börnum. Ég öskra þegar þeir stinga mig, en einhverra hluta vegna kemur ekkert hljóð.

Nágranni minn getur heldur ekki sofið. Ég hef eytt undanförnum nóttum úti á svölum og horft á hann bylta sér.

---------

frá: tiskublogg@gmail.com
til: jatningar@bleikt.is
dagsetning: 28. júlí 2011 kl. 11:47
titill: Re: játning mín – framhald

Játning: Ég og nágranni minn (framhald)

Ég er fegin því að þið skuluð ekki hafa birt játninguna sem ég sendi ykkur í gær, því ég hef nú nokkru við hana að bæta.

Eftir að ég sendi ykkur póstinn í gærmorgun þá fékk ég heiftarlegan höfuðverk. Ég reyndi að hringja í mömmu mína og biðja hana að keyra mig upp á spítala, en þegar ég tók upp gemsann kom bara skrýtið suð og svo birtust undarleg tákn á skjánum. Ég tók upp heimasímann og hann virkaði ekki heldur. Ég endaði því á að skjögra út á götu, stöðva þar bíl og biðja ökumanninn að keyra mig upp á bráðamóttöku. Læknarnir þar óttuðust að um heilablæðingu væri að ræða svo ég var send rakleiðis í sneiðmyndatöku.

Og þið eigið aldrei eftir að trúa því hvað þar kom í ljós.

Svo virðist vera sem ég sé með litla málmplötu í höfuðkúpunni. Hún er staðsett á enninu, rétt við hársvörðinn, en læknarnir gátu ekki almennilega séð hversu stór hún er eða úr hverskonar málmi, því hún sendir frá sér einhverskonar segulmagnaðar bylgjur sem höfðu áhrif á tækið og bjöguðu myndina.

Ég heyrði af þögn læknanna að þeir hafa aldrei séð neitt þessu líkt áður. Þeir kröfðust þess að ég tæki allskonar próf til að athuga hvort að platan hefði áhrif á heilastarfsemi mína, en fundu ekkert óeðlilegt, fyrir utan niðurstöður persónuleikaprófs sem voru í hæsta máti undarlegar. Læknarnir fullyrtu nefnilega að niðurstöðurnar bæru vott um mikilmennskubrjálæði og skort á hæfileikanum til þess að setja sig í spor annarra. En hvert heilvita mannsbarn hlýtur að sjá að þær niðurstöður hafa ekki við nein rök að styðjast í mínu tilfelli. Þeir ætluðu ekki að hleypa mér heim, en þarsem höfuðverkurinn hvarf eins og dögg fyrir sólu og ég virðist ekki vera í lífshættu þá krafðist ég þess að fá að fara, og þeir gátu ekki haldið mér.

Þegar ég kom heim bankaði ég lengi á dyrnar hjá nágranna mínum. Hann kom ekki til dyra. Ég veit samt að hann var heima, því ég fór út á svalir og kíkti inn í svefnherbergi til hans, og þar sat hann á rúmbríkinni á nærbrókinni einni fata, studdi olnbogum á hné og hélt um höfuðið á sér einsog hann væri sárkvalinn. Ég skrifaði honum miða um málmplötuna og stakk undir hurðina hjá honum. Það eru 18 klukkutímar síðan, en hann hefur ekki enn haft samband.

Ég svaf ekkert í nótt. Kærastinn er væntanlegur úr veiðiferðinni á hverri stundu. Ég veit ekki hvernig ég á að útskýra þetta fyrir honum og ég efast um að hann eigi eftir að trúa mér.

En kannski trúir hann mér ef hann strýkur yfir ennið á mér.

Ég finn nefnilega fyrir málmplötunni. Hún er þarna undir húðinni, sporöskjulaga og á stærð við tíkall. Og þegar ég strýk yfir hana get ég ekki losnað við þá tilfinningu að frá henni stafi hiti.

----------

frá: tiskublogg@gmail.com
til: jatningar@bleikt.is
dagsetning: 29. júlí 2011 kl. 13:25
titill: Re: játning mín – framhald

Játning: Ég og nágranni minn (framhald af framhaldinu)

Það gerðist aftur í nótt. Ég lá uppi í rúmi og kærastinn svaf við hlið mér þegar ég heyrði hljóðið. Ég þekkti það samstundis. Örskömmu síðar fylltist herbergið af blindandi ljósi.

Þegar ég rankaði við mér var orðið bjart úti. Kærastinn svaf enn. Ég vakti hann og spurði hvað hefði gerst, hvort hann hefði heyrt eitthvað eða séð, en hann hló bara að mér og sagði að mig hefði verið að dreyma.

En ég veit að mig var ekki að dreyma.

Eftir að hann fór í vinnuna bankaði ég hjá nágrannanum. Hann kom ekki til dyra. Ég kíkti inn í svefnherbergið hans en hann var ekki þar.

Ég held að hann hafi verið þarna í nótt, í ljósinu þegar ég var tekin. Ég man það ekki beinlínis, þetta er frekar tilfinning sem ég hef. Svipuð því og þegar maður er viss um hafa dreymt einhvern en getur ómögulega rifjað upp drauminn.

Höfuðverkurinn er orðinn verri. Hvað á ég að taka til bragðs?

--------

frá: tiskublogg@gmail.com
til: jatningar@bleikt.is
dagsetning: 30. júlí 2011 kl. 11:57
titill: Re: játning mín – framhald

Játning: Ég og nágranni minn (framhald af framhaldinu af framhaldinu)

Nágranni minn er horfinn. Lögreglan bankaði uppá í gær og sagði að hann hefði ekki komið í vinnuna síðan daginn sem ég bauð honum inn. Hann hafði ekki svarað í símann og það hafði enginn heyrt í honum. Lögreglan spurði hvort ég hefði séð til hans. Ég sagði þeim ekki neitt. Þeir brutu upp hurðina að íbúðinni hans en hann var ekki þar.

Bíllinn hans stendur ennþá hér fyrir utan og ég býst við því að það verði lýst eftir honum í fréttunum í kvöld. Það er verið að slæða höfnina núna, en ég veit að þeir finna hann ekki þar.

Hann hefur verið tekinn, en honum hefur ekki verið skilað aftur.

Ég óttast nú mjög um eigið öryggi.

Þessvegna bið ég ykkur um að birta játningar mínar, svo einhver viti sannleikann, ef allt fer á versta veg.

xoxo
-h

dásamleg afmælisgjöf frá aðdáanda

2011-07-29T09:59:00.000Z

Hola lovers,

Tískublogginu var að berast þessi dásamlega afmælisgjöf í tilefni eins árs afmælis síðunnar.

Er þetta ekki fallegt?

Og hversvegna í ósköpunum hefur bara einn aðdáandi sent mér afmælisglaðning? Kunnið þið ekki að skammast ykkar?

xoxo
-h

TÍSKUBLOGGIÐ EINS ÁRS

2011-07-25T14:06:00.000Z

OMG LOVERS ÞÁ ER KOMIÐ AÐ ÞVÍ TÍSKUBLOGGIÐ Á AFMÆLI Í DAG OG ER ORÐIÐ EINS ÁRS OG OMG ÉG TRÚI ÞESSU ALVEG OG TIL HAMINGJU VIÐ OG VONANDI NJÓTIÐ ÞIÐ DAGSINS OG FÁIÐ YKKUR KÖKU EN PASSIÐ YKKUR SAMT Á ÞVÍ AÐ FITNA EKKI!

XOXO
-h

átfitt dagsins

2011-07-24T14:30:00.000Z

Uppblásanlegur latexsamfestingur: Af kærasta.

Latexsokkar: Gefins.

xoxo
-h

stelpur; takmarkaður orðaforði og almennur þekkingarskortur

2011-07-11T16:32:00.001Z

Hola lovers,

Á föstudaginn las ég svolítið í Fréttablaðinu sem gladdi mig mikið. Það var viðtal við eina kvenkyns íþróttafréttaritarann í sjónvarpi allra landsmanna og fyrirsögnin var „Vil ekki að talað sé við mig eins og stelpu“.

Fyrirsögnin vísar til þess þegar hún nefnir að hún biðji íþróttamenn og þjálfara sem tala „mjúklega“ til hennar eða „nota annan orðaforða“ vinsamlegast um að tala ekki við sig eins og stelpu. Hún og viðmælendur hennar vita (og eru greinilega sammála um) að þekkingarskortur og lítill orðaforði sé hið náttúrulega og eðlilega ástand stelpna.

Þetta er nokkuð sem ég hef lengi vitað og það gleður mig að sjá viðtal við stelpu sem gerir sér grein fyrir þessu líka. Ég er einnig fegin því að hún brýni það jafnt fyrir viðmælendum sínum sem og lesendum blaðsins að „mjúklegur háttur“ sé sá sem almennt beri að nota þegar yrt er á stelpu. Því það er því miður orðið allt of algengt að fólk tali við stelpur eins og þær séu venjulegt fólk og hvessi jafnvel við þær róminn (sem má ekki, því þær eru svo viðkvæmar).

Þetta viðtal er svo sannarlega hressandi mótvægi við annan ófögnuð sem virðist fá að grassera á Rúv þrátt fyrir að ég hafi beinlínis lagt við því blátt bann.

[Já, ég er að tala um Sokkabandið. En engar áhyggjur lovers, þær systur eru með það yfirlýsta markmið að tala við stelpur með „vit í kollinum“, en eins og við vitum öll (og ummæli íþróttafréttakonunnar undirstrika) er þar ekki um auðugan garð að gresja, svo ég býst við því að þátturinn verði sjálfdauður hvað og hverju.]

Áhugasamir geta annars fundið viðtalið við íþróttafréttakonuna í heild sinni hér.

xoxo
-h

Þegar þið sjáið svona fyrirbæri skuluð þið samstundis milda róminn og einfalda orðaforðann, lovers.

inspiration dagsins

2011-07-08T11:51:00.000Z

xoxo
-h

sönnun á því að karlar eru áhugaverðari og hæfileikaríkari en konur í 84,6% tilvika

2011-07-07T12:18:00.000Z

Hola lovers,

Ég veit ekki hvursu vel þið fylgist með í fjölmiðlaheiminum, en nú nýverið tók nýr ritstjóri til starfa á Monitor. Hann skrifar lítinn pistil í nýjasta tölublaðinu þarsem hann kveður forvera sinn í starfi og kemur svo með svolitla yfirlýsingu sem mætti túlka sem ritstjórnarstefnu, en hann skrifar að hann ætli að „gera áhugaverðu hæfileikafólki hátt undir höfði“.

Það þykir mér verðugt markmið og það gleður mig líka að í þessu tölublaði rennir hann stoðum undir þá kenningu sem ég hef lengi haft um að karlar séu sannarlega miklu hæfileikaríkari og áhugaverðari en konur.

Og ef eitthvað er að marka blaðið þá eru karlar áhugaverðari og hæfileikaríkari en konur í nákvæmlega 84,6% tilvika.

Ég fór í gegnum blaðið og taldi andlit á myndum. Þau eru 52 talsins. 44 þeirra eru karlmannsandlit og 8 þeirra eru kvenmannsandlit (og þar af er reyndar fjórðungur, eða 2 myndir, auglýsingar).

Hlutfallið í myndbirtingu Monitor er því eftirfarandi:

Karlar: 84,6%
Konur: 15,3%

Og það segir líka sitt um gjörvuleika kvenna að þau tvö viðtöl við íslenskar konur sem finna má í blaðinu snúast hvorki um hæfileika þeirra né gjörðir, heldur um smekk þeirra og neytendahegðun.

Ykkur til glöggvunar birti ég hér síður blaðsins, með talningu minni. Ég sleppi því að birta síður þarsem engin andlit er að finna.

xoxo
-h

ástarbréf til Vefpressunnar ehf. - ekki fyrir viðkvæma

2011-07-05T11:56:00.000Z

Hola lovers,

Ég held að Vefpressan ehf. sé uppáhaldsfyrirtækið mitt. Það er vegna þess að Vefpressan ehf. á flesta netmiðla á Íslandi (þ.m.t. Bleikt.is, sem er uppáhaldsheimasíðan mín) og fyrirtækið hefur unnið mjög markvisst að því að draga úr fréttaflutningi og einbeita sér frekar að því að ala upp íslenskt kvenfólk, móta skoðanir þeirra, segja þeim hvað þær eiga að kaupa (í netverslun sem Vefpressan ehf. á), segja þeim hvernig þær eigi að hegða sér á Facebook, segja þeim hvernig þær eigi að hegða sér í kringum karlmenn, segja þeim hvernig þær eigi að klæðast, verja feminískan rétt þeirra til að fá sér sílikon og ganga á háum hælum og síðast en ekki síst hefur Vefpressan ehf. innrætt konum þann algilda sannleika að það tekur enginn mark á því sem konur skrifa nema pistlinum fylgi mynd þarsem sést í a.m.k. 2/3 hluta af brjóstunum á þeim.

Og þá er að sjálfsögðu ónefnt þegar Vefpressan ehf. keypti vefritið Eyjuna og gerði sér lítið fyrir og mokaði út öllum konum þar, enda höfðu margir þær grunaðar um að vera kvenrembur (femínistar). Fyrir það löðurmannlega verk á Vefpressan góðar þakkir skildar, einsog ég fjallaði ítarlega um í þessari færslu.

Miðlar Vefpressunnar ehf. taka uppeldishlutverk sitt alvarlega og starfsfólkið er óþreytandi við að koma með ábendingar til kvenna um hvað þær eiga að elska (svar: töskur og skó), hvernig þær eiga að vilja vera í sumar (svar: sumarlegar og sætar) og hvernig þær eiga að borða til að léttast (svar: svona og svona og svona en ekki svona).

Vefpressunni ehf. er líka mjög umhugað um birtingarmynd kvenna á internetinu og fylgist greinilega grannt með því ef einhverjar óæskilegar konur birta myndir sem smætta kvenkynið einsog það leggur sig. Því auðvitað eiga konur sem uppfylla ekki þær ströngu útlitskröfur sem Vefpressan ehf. gerir til kvenna ekkert að vera að birta myndir af sér af netinu. Því það er einfaldlega „bara óhugnalegt“, svo ég vitni í grein sem birtist nýverið á Pressunni.

Og myndirnar af konunum sem fylgja eru sannarlega óhugnalegar og hljóta að fylla hvern þann sem skoðar ógeði.

Þar má sjá hvorki meira né minna en 10 myndir sem konur dirfðust að birta af sér á opinberum samskipta- og spjallvefum!

Bíræfnin í þessum konum gengur náttúrulega jafn mikið fram af mér og blaðamanni Pressunnar.

ATH AÐ VIÐKVÆMIR ERU VARAÐIR VIÐ ÞVÍ AÐ SKOÐA ÓHUGNAÐINN Í MYNDEFNINU SEM BIRTIST HÉR AÐ NEÐAN.

Í grein Pressunnar kemur fram að á internetinu finnist t.d. konur yfir kjörþyngd sem hika ekki við að birta myndir af sér þarsem þær eru léttklæddar:

Rauðhærð kona hefur sett sjálfmynd á netið og kært sig kollótta um þau áhrif sem þessi óhugnaður getur haft á góðborgara:

Og síðast en ekki síst þá má í greininni finna dæmi þess að jafnvel hafi gráhærð kona birt mynd af sér á brjóstahaldaranum einum fata:

Ég veit að þið eruð jafn sjokkeruð og ég, lovers.

En við getum þó alltént þakkað fyrir að starfsfólk Vefpressunnar ehf. sé sífellt á tánum og alltaf á vaktinni.

Við skulum bara vona að einhverjar konur yfir kjörþyngd, rauðhærðar konur og gráhærðar lesi þessa frétt og átti sig á óhugnaðinum sem útlit þeirra er og þær sjái í kjölfarið sóma sinn í því að hlífa öðru fólki við því að þurfa að horfa á þær.

xoxo
-h

sorglegar og loðnar konur krefjast áþreifanlegrar viðurkenningar á því að þær séu aðlaðandi

2011-07-04T11:32:00.000Z

Hola lovers,

Ekki er nú öll vitleysan eins. Núna eru einhverjar loðnar og óaðlaðandi kvenrembur að fara í eitthvað sem þær kalla „Druslugöngu“ 23. júlí næstkomandi.

Ég hef nú ekki kynnt mér markmið þeirra til hlítar, en heyrði útundan mér að þau hefðu eitthvað með það að gera að mótmæla því að horft sé á klæðaburð kvenna sem verða fyrir „kynferðisofbeldi“.

Það hlýtur að vera misskilningur því allir vita að karlmenn eiga rétt á því að hafa óheftan aðgang að líkömum kvenna öllum stundum, sama hvernig þær eru klæddar. Og að trúa því að heil ganga verði farin til þess að krefjast þess að karlmenn hafi sjálfsstjórn innan um snöggklætt kvenfólk er náttúrulega út í hött, því auðvitað ætlast enginn til þess að karlmenn bæli niður náttúrulegar hvatir sínar þegar þeir sjá eitthvað sem þeir girnast í heppilegum umbúðum. Og eiginlegt „kynferðisofbeldi“ er heldur ekki til, því það sem sumir kalla kynferðisofbeldi og meintar nauðganir er ekki annað en leið karlmanns til að tjá aðdáun sína. Einsog ég hef fjallað um áður hér á síðunni þá er þetta eiginlega ákveðið form hróss, enda er það vitað mál að karlar eiga oft erfitt með að tjá tilfinningar sínar í orðum og nota því aðrar aðferðir til þess að tjá hug sinn, einsog hefur verið gerð ítarleg skil í fjölmörgum pistlum á Bleikt.is og fleiri góðum síðum.

Þvert á móti sýnist mér á heimasíðu þeirra að tilgangur Druslugöngunnar sé aðallega sá að krefjast þess að karlmenn í samfélaginu viðurkenni þær sem kynverur og sýni þeim þann kynferðislega áhuga sem þær telja að þær eigi tilkall til kynferðis síns vegna, þrátt fyrir það að vera ljótar. Þær ætla held ég að mótmæla þeirri kynferðislegri hunsun sem þær hafa orðið fyrir með því að klæða sig einsog „druslur“, sem er í rauninni bara klæðaburður sem allar konur með alvöru sjálfsvirðingu hafa fyrir löngu tileinkað sér, og síðan ætla þær að skakklappast niður einhverja götu (ég geri ekki ráð fyrir því að nein af þeim kunni að ganga á hælaskóm) og heimta að karlmenn horfi á þær girndaraugum og hunskist kannski til að tjá girnd sína, óumbeðnir.

Þær eru með öðrum orðum að ætlast til þess að karlmenn hrósi þeim svolítið, og á áþreifanlegan hátt.

Þessi fáránlega tilraun þeirra er náttúrulega dæmd til að mistakast, því auðvitað vita allir að það eru bara sætar og fallegar konur sem klæddar eru á ákveðinn hátt sem verða fyrir ágengri kvensemi og fá hrós, og því er þess varla að vænta að nokkur nálægur karlmaður vilji einusinni pota litla fingri í þær loðnu.

Ég ætla bara rétt að vona að þær taki tillit til okkar hinna sem horfum og raki á sér lappirnar áður en þær troða sér í netasokkabuxurnar.

xoxo
-h

Er þetta einungis forsmekkurinn af því sem við munum sjá 23. júlí?

átfitt dagsins

2011-07-03T10:33:00.000Z

Bolur: Fékkst gefins í Hjálpræðishernum.

Leggó: Keyptar á útsölu.

Fylgihlutur: Barn sem ég fann liggjandi útí vagni fyrir utan hús í næstu götu. Það var enginn að nota það svo ég tók það.

xoxo
-h

inspiration dagsins

2011-07-01T14:09:00.000Z

xoxo
-h

inspiration dagsins

2011-06-30T15:16:00.000Z

xoxo
-h

inspiration dagsins

2011-06-27T18:58:00.000Z

xoxo
-h

daily bobsession! o.fl.

2011-06-26T23:37:00.001Z

Hola lovers,

Einsog þið munið kannski þá var eitt af þeim hógværu markmiðum sem ég setti mér í upphafi að eignast a.m.k. 1.000 aðdáendur á Facebook á fyrsta ári Tískubloggsins. Og það er því sannarlega kominn tími til að tilkynna ykkur (og þó fyrr hefði verið) að Tískubloggið á nú loks hvorki meira né minna en 1.049 aðdáendur á Facebook.

Ég verð þó að játa að þið hafið valdið mér þónokkrum vonbrigðum, lovers, því Tískubloggið verður eins árs í næsta mánuði svo þið létuð mig næstum renna út á tíma með þetta.

En ég fyrirgef ykkur að sinni og treysti því að þið munið leggja meiri metnað í aðdáun ykkar á mér á öðru starfsári Tískubloggsins.

Og nú er komið að liðnum sem allir hafa beðið eftir með öndina í hálsinum; daily bobsession!

Sideshow Bob

P.s. framleiðendur ég er ekki búin að gleyma ykkur.

xoxo
-h

af prinsessum og hárumhirðu átta ára stúlkubarna

2011-06-23T11:02:00.000Z

Hola lovers,

Ekki skil ég hvað kvenrembur eru að kvarta yfir þessum blessaða Prinsessuskóla sem er markaðssettur fyrir átta ára stúlkubörn. Því ég hef áður nefnt að það sé aldrei of snemmt fyrir stúlkur að byrja að huga að útlitinu og velta fyrir sér hvernig þær geti hámarkað útlitsgæði sín (sjá t.d. hér og hér), því þetta er enda hárrétt hjá honum Gunnari Ingvarssyni sem skrifaði athugasemd við fréttina á DV, en hann ritar: „Eins lengi og sögu herma hafa konur notað ýmis ráð til að auka fegurð sína til að gana í augun á kalmönnum. Sumar konur eru reyndar þannig að engin meðul geta gert þær ásjálegar og þær verð feministar.“

Í rauninni finnst mér ekkert eðlilegra en að stúlkubörn langi til að verða prinsessur, enda hafa prinsessur löngum verið táknmynd um kvenlega auðmýkt, fegurð og lítillæti og þær eru í raun holdgervingar alls þess sem konur ættu að vera. Því þær voru sko alls ekki haldnar þessum ranghugmyndum um eigið ágæti sem einkennir því miður margar nútímakonur, enda gerðu þær sér í flestum tilvikum fulla grein fyrir því að þrátt fyrir að deila með þeim erfðaefni, þá væru þær að sjálfsögðu miklu minna hæfar til að að stýra þjóðríkjum en feður þeirra, bræður, frændar og synir, enda erfðust krúnur yfirleitt í beinan karllegg.

Þær gerðu sér heldur engar rómantískar grillur, því hefð var fyrir því að nota þær sem gjaldmiðil í milliríkjasamskiptum og þær voru iðulega seldar í hjónabönd í skiptum fyrir landsvæði og herafla, eða svo karlmennirnir í kringum þær gætu styrkt pólitískt samband ríkja sinna og tryggt sér völd. Þannig settu þær hagsmuni eiginmanna sinna, feðra og föðurlands framar sínum eigin metnaði fyrir lífshamingju, því þær voru hin kvenlega dyggð uppmáluð.

Og þó þær þjáðust oft og tíðum af ýmsum erfðakvillum vegna innræktunar og skyldraæxlunar innan konungsfjölskylda, þá báru þær harm sinn í hljóði, því þær vissu að það að halda völdunum hjá karlmönnunum í ættinni var mikilvægara en það að vera litningagallalaus.

Prinsessur nútímans þurfa heldur ekkert að bisa við að finna sér ævistarf, eða huga að einhverjum „frama“, því það að vera táknmynd kvenlegrar auðmýktar er fullt starf, sem sýnir sig best á því að þeim almúgakonum sem gifta sig inn í konungsfjölskyldur er yfirleitt gert að segja starfi sínu lausu um leið.

Af ofansögðu má sjá að betri fyrirmynd fyrir átta ára stúlkubörn er vandfundin, og ég get satt að segja ekki ímyndað mér neina aðra fyrirmynd sem þær ættu frekar að vilja líkjast.

Ég fagna því einnig innilega að ungum stúlkum sé nú kennd hand- og fótsnyrting, því annars gætu þær verið að nota þessa útlimi til þess að gera eitthvað ógeðslegt einsog að klifra í trjám, sulla í pollum, kasta boltum eða hlaupa. Mér hefur einnig lengi þótt að hárumhirðu átta ára stúlkubarna sé afar ábótavant og því fagna ég því ákaft að einhver ætli að taka að sér að aga þær almennilega og kenna þeim að greiða sér og litgreina jafnframt hvernig litar teygjur þær ættu helst að nota í hárið á sér.

Það eina sem ég setti spurningarmerki við í sambandi við þetta námskeið var að á heimasíðunni kemur fram að þær eigi að taka með sér „holt“ nesti. Í fyrstu hélt ég að þetta væri handvömm síðuhaldara og hún hafi ætlað að slá inn „hollt“ í staðinn, en svo áttaði ég mig á því að auðvitað er henni bara umhugað um að stúlkurnar á námskeiðinu fitni ekki óhóflega og því bendir hún foreldrum á að loftrými skuli vera í nesti þeirra, t.d. rúnstykki sem búið er að fjarlægja miðjuna úr svo skorpan ein er eftir.

Ég vildi næstum því óska þess núna að ég hefði ekki farið í legnám og að ég ætti dóttur til að senda í þennan skóla.

xoxo
-h

Hér er dæmi um konu sem kann að litgreina.

opið bréf til útvarpsstjóra

2011-06-22T14:12:00.000Z

Hola lovers,

Ég var búin að segja ykkur á Facebook-síðu minni að Sokkabandið á Rás 2 er ógeðslegasti útvarpsþáttur í heimi. Ég bannaði ykkur jafnframt að hlusta á hann og ég ætla rétt að vona að þið hafið hlýtt mér í blindni.

Hann hóf göngu sína síðastliðinn mánudag og hann er skelfilegur, svo miklu, miklu skelfilegri en ég hafði getað ímyndað mér að útvarpsþáttur gæti verið.

Ég veit ekki betur en hann sé kominn til að vera í útvarpi allra landsmanna og því sé ég mér ekki annað fært en að taka tafarlaust í taumana og koma í veg fyrir að peningum skattpíndra aðdáenda Tískubloggsins sé eytt í þetta ógeð.

Ég skrifaði útvarpsstjóra því opið bréf.

***

Opið bréf til útvarpsstjóra

Útvarpsstjóri,

Þú ættir að skammast þín.

Sokkabandið, sem er nýr „útvarpsþáttur“, er almenningi ekki boðlegur og ég krefst þess að hann verði tafarlaust tekinn af dagskrá. Þessi þáttur gefur sig út fyrir að ræða við „framtakssamar“ stelpur, en í fyrsta þættinum var ekki rætt við eina einustu fegurðardrottningu og enginn af viðmælendunum hefur verið Séð & heyrt stúlka. Kallar þú þetta metnað, útvarpsstjóri?

Og það er ekki nóg með að þáttastjórnendurnir, Kristín og Þóra Tómasdætur, séu greinilega fullkomlega vanhæfar í vali á viðmælendum, heldur kusu þær að bjóða erkióvini mínum (sem ég kýs að nefna ekki á nafn af augljósum ástæðum) í þátt sinn og gleyptu bullið í henni hrátt. Hvað á það að þýða að bjóða lygara í drottningarviðtal og spyrja síðan bara þægilegra spurninga?

Þær hafa svo sannarlega lagt sitt af mörkum í þeirri grófu sögufölsun sem hefur átt sér stað í samfélaginu undanfarið, sem gengur út á það að grafa sannleikann um það hver það er sem raunverulega ritar Tískubloggið. Sokkabandið, útvarpsþáttur sem þú berð ábyrgð á, tekur þannig þátt í víðtæku samsæri spilltra íslenskra fjölmiðla.

Heldur útvarpsstjóri að það sé tilviljun að Kristín og Þóra Tómasdætur vegi svo gróflega að Tískublogginu nú örfáum mánuðum áður en lífstílsbók mín kemur út? Telur útvarpsstjóri það vera tilviljun að þær séu sjálfar að fara að gefa út einhverskonar stúlknafræðara, sem á víst að heita framhald á bleðlinum sem þær gáfu út fyrir síðustu jól og kölluðu bók, einsog fram kemur í þessari frétt? Getur það verið að þær óttist samkeppnina við bók mína sem kemur út um svipað leyti, því þær vita að þar mun kvenþjóðin fá svör við öllum mögulegum spurningum sínum og því muni enginn kaupa bókina þeirra og þær kjósi því þessa lúalegu aðferð til að níða af mér skóinn í veikri tilraun til að bola samkeppnisaðila sínum burt? Getur það verið að þær geri sér grein fyrir óvéfengjanlegum yfirburðum mínum og grípi því til örþrifaráða?

Útvarpsstjóri veit að Þóra Tómasdóttir hefur starfað á hinum ýmsu fjölmiðlum og hefur því ágæt tengsl við fjölmiðlaheiminn. Hún þekkir gagnrýnendur og hefur unnið með þeim. Ég leyfi mér því að fullyrða að ef lífstílsbók Tískubloggsins hlýtur slæma umfjöllun eða dóma þegar hún kemur út, þá mun það vera Þóru Tómasdóttur að kenna.

En hún getur togað í alla þá spotta sem hún vill.

Ég og þú vitum sannleikann, útvarpsstjóri.

Rektu þær núna.

xoxo
-h

er flugumaðurinn á Bleikt.is íslamskur terroristi og í hverju fólst menntun hans?

2011-06-20T21:43:00.001Z

Hola lovers,

Nú virðist sem ég hafi ef til vill farið aðeins of geyst í túlkun minni á grein Klöru Egilson í síðustu færslu. Þar færði ég sannfærandi rök fyrir því að (fyrrverandi?) flugumaðurinn hefði nú sýnt sitt rétta andlit og hefði loks komið útúr skápnum sem femínisti (kvenremba).

En nú er komið annað hljóð í skrokkinn, enda tel ég líklegt að hún hafi annaðhvort áttað sig á því að hún hafi farið yfir strikið og séð að sér, eða ritstjóri vefritsins hefur tekið hana á teppið og útskýrt betur fyrir henni ritstjórnarstefnuna (sem felst í því að meina þeim konum sem þurfa að berjast fyrir réttindum sínum aðgang að síðunni).

Því í nýjustu grein sinni "Veena Malik er systir mín" (sjá hér) líkir hún norrænum femínistum réttilega við íslömsku klerkastéttina, enda eru þessi tvö öfl, femínistar (eða "hreintrúnaðarfemínistar" einsog Klara kallar þá (sem er hressandi og afar skemmtilegt nýyðri sem ég tel að hún hafi soðið saman í tilefni af þessari grein með því að blanda saman á óvæntan hátt orðunum "trúnaður", "hreinn" og "femínisti" til að sjokkera lesendur sína með því að draga fram andstæðurnar sem eru fólgnar í þessum mótsögnum. Því allir vita að "femínisti" er ljótt og skítugt orð á meðan "trúnaður" og "hreinn" eru orð sem hafa afar jákvæðar skírskotanir í okkar tungumáli (sbr. hrein mey). En með því að raða þessum þremur orðum saman á þennan frumlega og óvænta hátt þá myndast afar áhugaverður þríhyrningur andstæðra póla, þar sem orðið "femínisti" er hinni illi, oddhvassi og neikvæði endi sem reynir að draga hina staðföstu, karlmannlegu og jákvæðu hlið niður í svaðið með sér. Þannig sýnir Klara fram á það með einu einföldu orði sem lætur ekki mikið yfir sér við fyrstu sýn, hvað getur orðið um hreinleikann og trúnaðinn í okkar samfélagi ef broddur femínismans verður ekki slíðraður í snarhasti (sjá skýringarmynd 1))) og íslamska klerkastéttin þau öfl sem helst hafa barist fyrir því að frelsi kvenna í heiminum verði skert.

Skýringarmynd 1.

Hún bendir ennfremur á allt það illa sem fer fram í teboðum norænna femínista, en umræðurnar þar eru svo skelfilegar að ég mun hlífa ykkur við frekari upplýsingum um það að svo stöddu.

En þó Klara virðist nú þvertaka fyrir það að vera kvenremba (femínisti) þá kemur berlega fram í þessari grein að hún hefur sannarlega villt á sér heimildir. Því af myndinni af henni að dæma virðist hún vera dæmigerð íslensk kona, og hún ritar einnig þokkalega íslensku. En hún talar af sér í titli greinarinnar, því þar kemur fram að hún er engin önnur en systir hinnar pakistönsku og íslömsku fyrirsætu Veenu Malik. Og því getur vart annað komið til greina en að Klara sjálf sé bæði pakistönsk og íslömsk. Í greininni kemur jafnframt fram að Veena systir hennar sé sterkefnuð og hafi "skilað öllum systkinum sínum gegnum nám" og hlýtur Klara sjálf að vera þar meðtalin.

Mín spurning er því þessi: Hversvegna er pakistanskur og íslamskur flugumaður að villa á sér heimildir og skrifa undir dulnefni á íslenska megrunarsíðu, og í hverju fólst þessi dularfulla menntun sem íslamistinn systir hennar borgaði undir hana?

Ég veit að ég þarf ekkert að fjölyrða um hryðjuverkaógnina sem steðjar að hinum Vestræna heimi um þessar mundir. Þess vegna hef ég tekið mér það bessaleyfi að tilkynna pistlahöfundinn til bæði innanríkisráðuneytisins og ríkislögreglustjóra. Og ríkislögreglustjóri sjálfur fullvissaði mig persónulega um að ábendingar mínar væru teknar afar alvarlega.

Þið getið því sofið rólega í nótt, lovers, því Tískubloggið kom ykkur enn og aftur til bjargar í tæka tíð.

xoxo
-h

flugumaður reynir að fella bleika veldið innanfrá

2011-06-17T14:14:00.000Z

Hola lovers,

Nú er ég alveg stúmm.

Því einsog þið vitið kannski, þá er Bleikt.is næstmestuppáhaldsheimasíðan mín í heiminum (á eftir Pjattrófusíðunni). Það er fyrst og fremst vegna þess að Bleikt.is er eitt af síðustu vígunum á Íslandi þar sem enn er barist ötullega gegn kvenrembum (femínistum) enda hefur síðan verið í fylkingarbrjósti þeirra sem reyna að kæfa í fæðingu það sem sannarlega má kalla fáránlega tilburði til "kvenfrelsis".

Því síðan hefur alla tíð köttað krappið og sagt konum sannleikann um hin ýmsu málefni. Sem dæmi mætti nefna þessa kröfu sem nú er uppi um að karlar eigi að taka þátt í að þrífa heimilið líka (sem er náttúrulega fáránleg) enda var það skýrt tekið fram á síðunni að ef svo ólíklega vill til að konur verði leiðar á þrifum þá óska þær sér "eiginkonu eða töfrabarnfóstru" (sjá umfjöllun mína um þann pistil hér).

Þær hafa einnig hamrað á viðteknum sannindum einsog þeim að konur séu konum verstar, "enda er ekkert konum eðlislægra en að finna kvenlega veikleika annarra kynsystra sinna og níðast á þeim", og þær hafa brýnt fyrir konum að gæta þess að vera aldrei sterkari en karlar því það geri bara lítið úr þeim. Þær fara heldur ekki dult með það að flestar konur þurfi að léttast og hafa jafnvel lagt sín lóð á vogarskálarnar í þeim efnum og síðan ber þannig beinlínis ábyrgð á því að þónokkur kíló hafi fokið! Enda er þetta kvenþjóðinni fyrir bestu, því einsog allir vita er ekkert dónalegra en kona sem byrjar með manni og vogar sér svo að bæta á sig og kaupa sér flíspeysu.

Þá hamra þær á þeim viðteknu sannindum að karlar geti ekki komið að barnauppeldi og að rauðsokkum finnist allir karlmenn vera aumingjar.

Ég gæti haldið lengi áfram að telja fram dæmi um það hvernig síðan hefur lagt sig fram við að koma í veg fyrir að konur ofmetnist og minna þær á þá hver þeirra skör sé í lífinu (hint: sú lægri), en ég held ég láti þetta nægja í bili.

Að ofansögðu skiljið þið þá væntanlega hversvegna ég hef haft síðuna í svo miklum metum, enda hafði mér skilist að þessi svokalla "kvennabarátta" kvenrembanna væri eitthvað sem samræmdist alls ekki þeirra ritstjórnarstefnu, enda sagði ritstjórinn þessi fleygu orð í eftirminnilegu viðtali sem birtist skömmu áður en vefurinn fór í loftið: "Við þurfum ekki að berjast fyrir réttindum kvenna, við erum konur með réttindi."

Þið getið því ímyndað ykkur hversu mikið mér brá þegar ég las þessa grein eftir Klöru Egilson. Þessi kona þykist vera hluti af ritstjórnarteymi Bleikt.is, en af grein hennar og viðtalinu við Hlín má sjá að Klara vinnur bersýnilega leynt og ljóst gegn þeirri ritstjórnarstefnu síðunnar sem mörkuð var í upphafi. Það er greinilegt að hún hefur laumað sér inná vefinn undir fölskum formerkjum og hún hefur smátt og smátt verið að herða snöruna að hálsi Hlínar. Og nú, sex mánuðum eftir að síðan var stofnuð, eru ítök hennar orðin nægilega mikil til að hún þori loks að sýna sitt rétta andlit.

Og það andlit er ekki fagurt lovers, því hún Klara er femínisti.

Já, ég trúði heldur ekki eigin augum, en hún segir það hreint út. Og það sem meira er þá sviptir hún hulunni af þeim skemmdarverkum sem hún hefur unnið á ritstjórnarstefnu síðunnar, því nú kemur í ljós að Klara hefur leynt og ljóst unnið að því að fjalla um konur sem hún telur þurfa að berjast fyrir réttindum sínum!

Hún talar um "baráttu ritstjórnar Bleikt fyrir rétti þeirra kvenna sem eru ekki af íslenskum uppruna" og "baráttu lesbískra mæðra".

Og allt þetta gerir hún blygðunarlaust, þrátt fyrir að ritstjórinn hafi sjálf komið fram og lýst því sérstaklega yfir að síðan væri ekki fyrir konur sem þyrftu að berjast fyrir réttindum sínum.

Ég er sannarlega í öngum mínum yfir þessu. Hún Hlín á betra skilið en að flugumaður laumi sér inní raðir hennar og knésetji veldi hennar innanfrá.

Hún hefði átt að þiggja krafta mína þegar ég bauð þá fram.

xoxo
-h

daily bobsession!

2011-06-14T21:51:00.002Z

Dr. Bob

xoxo

-h

átfitt dagsins + aðsent átfitt frá aðdáanda Tískubloggsins

2011-06-13T15:00:00.000Z

Hola lovers,

Hér kemur átfitt dagsins og það er mér einnig sönn ánægja að birta um leið aðsendar átfittmyndir frá eldheitum aðdáanda Tískubloggsins.

En byrjum á mér.

Bolur: Af kærasta.

Leggings: Kúkabrúnar.

Sokkar: Samstæðir.

Hár: Óþvegið.

Og vindum okkur þvínæst í átfittmyndirnar frá aðdáanda Tískubloggsins.

Úlpa: Erfðagripur sem hefur verið innan fjölskyldunnar í árafjöld.

Flugnanet: Útilíf.

Sixpensari: Gefins.

Leggings: Keyptar á útsölu.

Skór: Af kærasta.

Ég hvet aðra lesendur eindregið til að fylgja fordæminu og senda inn eigin átfittmyndir. Því þetta er ekki bara bloggsíða, heldur tískusamfélag meðvitaðra einstaklinga.

xoxo
-h

himnaríkið í símaskránni

2011-06-06T20:51:00.000Z

Hola lovers,

Ég skil ekki þetta fjargviðri yfir saklausu fótósjoppi á símaskránni. Einsog útgefendur hennar hafa sagt þá var tilgangurinn með erótísku nektarmyndinni á kápunni einfaldlega sá að hvetja fólk til að stunda sjálfsfróun og líkamsrækt og borða hollan mat. Og auðvitað dugir þessvegna ekkert að hafa alvöru líkama framan á henni.

Nei, það þarf að vera eitthvað meira en líkami. Það þarf ofurlíkama, eitthvað ídealískt markmið sem allir eiga að stefna að en enginn hefur möguleika á að ná. Því þetta er einsog ef maður dinglar gulrót framan í asna. Hvað gerir hann? Hann eltir. En ef hann nær gulrótinni? Þá borðar hann hana, sest á rassgatið og fer ekki skrefinu lengra.

Eiginlega er líkaminn á myndinni framan á símaskránni einsog himnaríki; Blekking til að fá fólk til að hegða sér betur.

xoxo
-h

daily bobsession! o.fl.

2011-06-05T16:45:00.002Z

Hola lovers,

Ég var að fatta að það er alveg fáránlega ógeðslega langt síðan ég var síðast með liðinn daily bobsession! Ég veit satt að segja ekki hvað er að mér og biðst forláts.

En hér kemur s.s. bobsessionið sem allir hafa beðið svo ótrúlega lengi eftir.

Bob Sinclar.

Annars var ég, einsog kom fram á Facebook-síðu minni (aðdáendur mínir þar fá alltaf allar fréttir á undan ótíndum lesendum sem ekki eru aðdáendur), að leggja lokahönd á greiningu á Alien vs. Predator. Ég er að hugsa um að hafa greininguna sem bónusefni í lífstílsbók minni, því skilaboðin í kvikmyndinni eru að ég tel afar mikilvæg fyrir velferð samfélagsins.

Ég gef sjálfri mér orðið og birti hér brot úr greiningu minni:

Alien vs. Predator er uppáhaldsbíómyndin mín. Það er ekki bara vegna þess að hún er svo ótrúlega, ótrúlega skemmtileg, heldur er það líka vegna þess að hún er okkur víti til varnaðar um það hvað getur gerst ef kvenrembur (femínistar) ná að sölsa undir sig heiminn. Því myndin er í raun ein stór allegoría fyrir sambandið á milli karla og kvenna, þar sem Predator er hinn fullkomni karlmaður og Alien er konan sem óhlýðnast honum.

Titill greiningarinnar er: Alien vs. Predator – Allegoría um afleiðingar uppgangs kvenrembu, og ef hún endar einhverra hluta vegna ekki í bókinni þá birti ég hana auðvitað hér í heild sinni. Svo er ég einnig að vinna í annarri essayu uppúr Alien-myndunum sem mun bera titilinn: Hvernig Alien og Jesúm komu í heiminn – Tvær meyfæðingar án kynlífs.

xoxo
-h

inspiration dagsins

2011-06-04T14:29:00.000Z

xoxo
-h

skref í rétta átt / uppstillingadagur

2011-06-02T12:11:00.000Z

Hola lovers,

Einsog þið munið kannski þá krafðist ég þess í síðustu færslu að framleiðendur sæju sóma sinn í því að bjóða mér að vera með minn eigin sjónvarpsþátt. Og hvað haldiði að mér hafi borist í póstinum í gær?

Smellið til að stækka.

Slóðin í póstinum leiðir mann á þessa síðu hérna og síðan þessa hérna.

Því miður virðist þetta vera eitthvað dularfullt indí-batterí og alls ekki það sem ég var að leita að (sem voru frjálsar hendur, ótakmarkað fjármagn og besti sýningartíminn á sjónvarpsstöð) en ég kýs að túlka þetta sem merki um að bransafólk sé ef til vill að taka við sér og tækifæri mitt leynist handan við hornið.

Annars er uppstillingadagur í dag, og í tilefni af því datt mér í hug að deila með ykkur myndum af nokkrum vel völdum uppstillingum.

Njótið.

xoxo
-h

litið um öxl/opið bréf til framleiðenda og sjónvarpsstöðvaeigenda*

2011-05-31T22:59:00.000Z

Hola lovers,

Þið trúið því kannski ekki, en eftir tæpa tvo mánuði verður liðið ár síðan ég stofnaði Tískubloggið.

Ég setti mér nokkur hógvær markmið í upphafi, og ég get með stolti sagt að ég hafi náð flestum þeirra.

Þau voru:

~~Verða besta tískublogg á Íslandi.~~
Taka sæti á stjórnlagaþingi og koma koma tísku inn í íslenska stjórnarskrá.
~~Verða besta megrunar- og lífstílssíða á vesturhveli jarðar.~~
~~Verða ritstjóri eins af stærstu vefmiðlum á Íslandi.~~
Fá ógeðslega mikið af auglýsingatekjum af síðunni og verða rík.
~~Fá Pjattrófu til að viðurkenna yfirburði mína.~~
~~Fá útgáfusamning.~~
Fá boð á hundatískusýningar í New York.
~~Fá senda kórónu frá SÍT (Sambandi íslenskra tískubloggara).~~
~~Verða mér úti um styrktaraðila á síðunni og fá sent ókeypis gæludýrafóður.~~
Eignast 1.000 aðdáendur á Facebook.
~~Verða vinsælasta íslenska heimasíðan.~~
~~Verða sameiningartákn allra íslenskra kvenna.~~
Fá minn eigin sjónvarpsþátt.
~~Eignast flott lógó.~~
~~Skilgreina óendanleika á mannamáli, fyrst allra.~~
~~Miðla af viskubrunni mínum.~~
~~Koma kvenþjóðinni til bjargar.~~

Eins og þið sjáið hafa flest þeirra ræst.

Því miður er orðið um seinan að ná kjöri á stjórnlagaþing, en markmiðið að ná 1.000 aðdáendum á Facebook er innan seilingar og raunar mjög raunhæft að ég nái því fyrir júlí. Mig vantar bara 60 aðdáendur til að ná uppí þúsund og þið sem eruð ekki orðin aðdáendur skuluð skammast ykkar og ýta síðan hér og bæta snarlega úr því (og þá fyrirgef ég ykkur þetta kannski). Einnig er ég afar vongóð um að vera boðið á hundatískusýningu bráðlega og hef verið í sambandi við þónokkra áhrifamikla aðila í þeim geira undanfarna mánuði og nokkrir af þessum aðilum hafa lýst yfir áhuga á því að kaupa hjá mér auglýsingar fyrir afar háar fjárhæðir.

Eftir stendur einungis eitt markmið: Að fá minn eigin sjónvarpsþátt.

Það er hreint út sagt til skammar að framleiðendur og sjónvarpsstöðvar hafi ekki ennþá séð sóma sinn í því að hafa samband við mig og bjóða mér frjálsar hendur, ótakmarkað fjármagn og besta sýningartímann. Ég stend nær ráðþrota gagnvart þessu vandamáli og sé sannast sagna ekki annað í stöðunni en að skrifa þeim opið bréf og birta hér á síðunni.

OPIÐ BRÉF TÍSKUBLOGGSINS TIL FRAMLEIÐENDA OG SJÓNVARPSSTÖÐVAEIGENDA.

Kæru framleiðendur og sjónvarpsstöðvaeigendur,

Hvað haldið þið eiginlega að þið séuð? Vitið þið ekki hver ég er? Vitið þið ekki af hverju þið eruð að missa? Viljið þið ekki vera með hágæðasjónvarpsefni á besta tíma á sjónvarpsstöðvum ykkar? Viljið þið ekki velja íslenskt?

Nú hafið þið haft u.þ.b. tíu mánuði til að hafa samband við mig.

En hafið þið látið í ykkur heyra? Nei.

Hafið þið haft samband? Nei.

Hafið þið hringt í mig? Nei.

Hafið þið sent mér póst? Nei.

Hafið þið kommentað á bloggið? Nei.

Hafið þið pókað mig á Facebook? Nei.

Eruð þið aðdáendur mínir á Facebook? Nei.

Hafið þið viðskiptavit? Nei.

Gætuð þið ekki séð sóma ykkar í því að bjóða mér að minnsta kosti að vera með minn eigin þátt á mbl.is sjónvarpinu?

Netfangið mitt er tiskublogg@gmail.com.

Þið hafið þangað til kl. 16.40 þann 25. júlí 2011.

Fyrstur kemur, fyrstur fær, asshóls.

xoxo
-h

*Þetta er fyrsta færslan á Tískublogginu sem inniheldur ekki neinar myndir. Það er með vilja gert, svo bara gáfað fólk lesi hana.

átfitt dagsins

2011-05-29T16:35:00.000Z

Bolur: Hjálpræðisherinn.

Leggó: Keyptar á meginlandi Evrópu.

Sokkar: Engir.

xoxo
-h

betra er seint en aldrei - fegrunarpistill fyrir Hernaðarandstæðinga

2011-05-26T22:21:00.003Z

Hola lovers,

Fyrir ógeðslega löngu þá var ég beðin um að skrifa fegrunarpistil fyrir tímarit Hernaðarandstæðinga. Ég ætlaði að vera búin að birta hann fyrir löngu en gleymdi því.

En hér kemur hann núna. Afsakið biðina.

***

Hola lovers,

Ég er helsti sérfræðingur landsins í fegrunum, megrunum og tísku, og var því beðin um að leiðbeina ykkur um fallegt útlit og hvernig á að vera töff. Ég ákvað að taka þessari áskorun, þó ég telji að það séu afar litlar líkur á árangri (ég hef séð myndir af ykkur).

Rakaðu af þér skeggið.

Ég vil byrja á því að hreinsa loftið og segja ykkur sannleikann; Það er ekki í tísku að vera hernaðarandstæðingur.
Því herir eru töff. Hermenn og -konur fá að vera í töff búningum með töff hárgreiðslu og þau fá að vera með töff byssur, þau fá að vita ýmis töff hernaðarleyndarmál á undan almúganum og herir skilja flestir homma og lesbíur útundan, sem er töff.

Það eru líka gerðar töff bíómyndir um hermenn og -konur þarsem þau bjarga litlum gyðingabörnum, vingast við flækingshunda í Írak og finna falleg lótusblóm í daunillum fenjum Víetnam.

Og ef hernaðarandstæðingar og her færu í slag þá held ég að við vitum öll hver myndi vinna.
Aukinheldur skemmdi það mannorð ykkar mikið þegar þið voruð á móti veru Bandaríkjahers hér á landi. Því það er ekkert minna í tísku í öllum heiminum en að vera á móti Bandaríkjunum, afþví að bandarísk þjóð er besta þjóð í heimi, afþví að Bandaríkjamenn fundu uppá Baconnaise.

Þannig að ef þið viljið vera töff er fyrsta ráðlegging mín til ykkar því að hætta að vera hernaðarandstæðingar.

Ef þið getið ekki hugsað ykkur að hætta því þá er það skásta í stöðunni að hætta að minnsta kosti að líta út einsog hernaðarandstæðingar og vona að enginn komist að þessari annarlegu hneigð ykkar.

Svona farið þið að því:

Klippið af ykkur dreddana.
Farið í bað.
Notið sápu sem er ekki með umhverfisvottun og sem inniheldur mikið af lyktar- og litarefnum.
Farið í hrein nærföt (ef þið eigið þau yfir höfuð til).
Hendið öllu úr skápnum ykkar sem er úr hör eða hampi. Flíkur sem eru í karrígulum, heiðbláum, rústrauðum eða mosagrænum litum skal einnig henda. Heimasaumaðar flíkur skulu fara sömu leið.
Hendið öllum flíkum sem á stendur Free Tibet.
Hendið öllum flíkum sem eru með mynd af Che Guevara.
Hendið varasalvanum ykkar.
Klæðið ykkur í það sem þið finnið í skápnum sem líkist helst klæðnaði venjulegrar manneskju og farið í verslunarleiðangur í verslunarmiðstöð (það er bannað að fara á Laugaveg eða Skólavörðustíg).

Innkaupalistinn:

Snyrtivörur sem innihalda mikið paraben. Þetta er hið allra nauðsynlegasta sem allir þurfa að eiga: dagkrem, næturkrem, síðdegiskrem, augnkrem, svitaholukrem, meik, púður, hyljari, augnskuggi, augnblýantur, eyeliner, undirmaskari til að þykkja augnhár, maskari, sólarpúður, kinnalitur, varablýantur, varalitur og gloss. (Ath. að þessi listi er ekki tæmandi)

Leggingsbuxur með tígrisdýramynstri. (Eða leggings úr alvöru tígrisdýri, ef þið hafið efni á því (eða úr einhverju meira töff dýri sem er í enn meiri útrýmingarhættu, einsog ísbirni (eða górillu)))

Latexgalli með hönskum og hettu.

Sjampó með miklum aukaefnum og helst í bleikum eða fjólubláum umbúðum. Hárnæring, djúpnæring, hárkrem, hársprey og vax úr sömu línu.

Spegill.

Hárbursti.

Augnháraplokkari.

Rakvél.

PC-fartölva frá þýskum framleiðanda sem hagnaðist á dularfullan hátt á tímum seinni heimsstyrjaldar.

Kaffi sem er ekki Fair Trade.

Þrennar blúndunærbuxur.

Farið síðan í dýrustu búðina á svæðinu, bendið starfsmanni á eina gínu og segið: „Ég ætla að fá allt sem hún er í í minni stærð“.

Farið í aðra búð og endurtakið leikinn.

Farið í þriðju búðina og endurtakið leikinn.

Farðu í klippingu.

Þessi aðferð er ykkur nauðsynleg, því þið kunnið ekki að klæða ykkur einsog venjulegt fólk. Svona getið þið feikað það. Munið bara að taka mynd af gínunni (eða rissa hana upp, því ég efa að þið eigið farsíma með myndavél) svo þið vitið hvernig þið eigið að raða flíkunum saman þegar heim er komið. Ég ráðlegg ykkur einnig að biðja afgreiðslufólkið í búðinni að númera fyrir ykkur flíkurnar svo þið vitið í hvaða röð þið eigið að fara í þær.

Þegar heim er komið mæli ég með því að þið farið síðan á internetið í nýju tölvunni ykkar og skoðið myndbönd af því hvernig á að nota snyrtivörurnar sem þið keyptuð ykkur. Ef þið eigið þess kost skuluð þið einnig reyna að vingast við venjulega manneskju sem hefur töff skoðanir og fylgjast grannt með því hvernig hún klæðir sig, snyrtir og hegðar sér í daglegu lífi.

Þið skuluð einnig lesa daglega ráðleggingar mínar á Tískublogginu, tiskublogg.blogspot.com.

xoxo
-h

samskiptavandræði kvenna

2011-05-18T13:55:00.001Z

Hola lovers,

Stundum kemst ég ekki hjá því að heyra fréttir, þó ég reyni yfirleitt að forðast þær. Og ég komst ekki hjá því að heyra af franska ólívubóndanum sem var handtekinn í New York um daginn. Ennfremur las ég á einhverju femínistabloggi (sem ég les afþví maður þarf að þekkja óvininn) að fólk talar um að hann hafi nauðgað, eða reynt að nauðga, konu.

Ég vil fá að leiðrétta þennan misskilning.

Það er ekki hægt að nauðga konu, einfaldlega afþví að það er ekki til neitt sem heitir nauðgun. Því þótt það séu viðtekin sannindi að karlmenn eigi að hafa óheftan aðgang að líkömum kvenna öllum stundum og það sé ekkert í heiminum verra en að neita karlmanni um kynlíf, þá hefur þetta orð með einhverjum óskiljanlegum hætti ratað inn í mál okkar (ég hef femínistana grunaða) án þess þó að sá verknaður sem það á að lýsa eigi sér stoð í raunveruleikanum. Orðið nauðgun skipar sér því á bekk með orðum einsog einhyrningur, dreki, hafmeyja og kentár, sem öll eru orð yfir ímynduð fyrirbæri, en hafa þó skotið svo sterkum rótum í menningu okkar í gegnum skáldskap, að flestir telja sig geta borið kennsl á fyrirbærið sem orðið á að lýsa yrði það einhverntímann á vegi þeirra, þó að í raunveruleikanum sé slíka veru hvergi að finna.

Raunveruleikinn.

Túlkun einmana sjómanna á raunveruleikanum.

Ég held nefnilega að fólk rugli saman nauðgun og meintri nauðgun, rétt einsog sjómenn forðum sáu svamlandi sækýr en einmanaleikinn villti þeim sýn svo þeir þóttust sjá limafagra snót stinga sér í gegnum öldurnar og kölluðu hafmeyju. En meint nauðgun er þegar kona misskilur meiningar karlmanns eða meinar honum aðgang að líkama sínum að ósekju. Dæmi um meinta nauðgun er t.d. þegar karl ætlar einfaldlega að hrósa konu svolítið fyrir fagran líkamsvöxt með því að fletta hana klæðum til að skoða hann betur, eða með því að stinga svolítið í hana typpinu, og hún bregst ókvæða við og ætlar að honum hafi gengið eitthvað illt til.

En spyr maður um leyfi áður en maður hrósar fólki? Nei.

Konan misskilur einfaldlega meiningar mannsins og ætlar honum einhvern annan vilja en hið saklausa athæfi lýsir. Konan gerist þannig sek um ætlanarökvillu (e. intentional fallacy) og meinar manninum aðgang að líkama sínum og gerir honum einnig upp ímyndaðar meiningar, og þannig er um meinta nauðgun að ræða.
Þetta er einföld orðsifjafræði, lovers.

En þessar meintu nauðganir geta haft alvarlegar afleiðingar fyrir menn, og ferla þeirra, einsog nýleg dæmi hafa sýnt. Og það er í raun sárara en tárum taki að vandaðir menn skuli geta lent í því að einstæð móðir í Bronx geti tekið það upp hjá sjálfri sér að eyðileggja blómlegan feril þeirra, einfaldlega afþví að hún þjáist af ætlanarökvillu, þannig að einföld samskiptavandræði þeirra eru blásin upp í fjölmiðlum.

Ég tel það sé afar einföld skýring á þessu tiltekna dæmi. Hann er franskur, hún er bandarísk. Þau tala ekki sama tungumálið = samskiptavandræði.

[Og þið sem viljið meina að það sé í alvörunni til eitthvað sem heitir nauðgun; Ég mæli með því að þið prófið að skoða fjölmiðla og athugið hvort þar sé oftar rætt um nauðganir eða meintar nauðganir. Og munið svo að fjölmiðlar endurspegla heiminn einsog hann raunverulega er, en ekki einsog þið viljið að hann sé.]

xoxo
-h

inspirational kvót dagsins

2011-05-15T20:34:00.000Z

"Chelsea Charmes er gríðarlega hláturmild kona - en það sem hún á meira af en hlátri er barmurinn."

-Ritstjórn Menn.is, úr greininni Brjóst og stór snjór (eða öfugt) - Myndband.

inspiration dagsins

2011-05-15T16:19:00.000Z

xoxo
-h

lengi má gott bæta með beikoni

2011-05-12T13:42:00.000Z

Hola lovers,

Vincent Van Gogh var góður listamaður. En lengi má gott bæta, og einsog þið vitið fullvel þá versnar ekkert við beikon.

Upprunalega myndin.

Myndin einsog hún ætti að hafa verið í upphafi.

Tískubloggið þakkar Lindu Björk kærlega fyrir að benda ritstjórn á þetta mikilfenglega listaverk og útnefnir hana um leið AÐDÁANDA VIKUNNAR!

TIL HAMINGJU LINDA BJÖRK! ♥

xoxo
-h

inspirational kvót dagsins

2011-05-10T11:30:00.000Z

„Ætli maður verði ekki að hugsa um sjálfan sig. Þannig brjóstin yrðu fyrir valinu.“

-Steinunn Laufey, í viðtali í greininni Gella vikunnar á Menn.is.

kynslóðabil, konur og gullhamrar

2011-05-09T21:18:00.001Z

Hola lovers,

Ég vil taka hjartanlega undir með Snorra Bjarnvini, en í nýlegri grein þá syrgir hann ákaft þá tíma þegar það þótti sjálfsagt og eðlilegt að karlmenn slægju konum líkamlega gullhamra með því að þukla á þeim líkamsparti þeirra sem vakti sérlega aðdáun þeirra þá stundina.

Þetta var, einsog Snorri segir, áður en konur breyttu mönnum í konur og menn fengu enn að vera menn.

Það er í raun með ólíkindum að það hafi ekki fleiri en Snorri veitt þessari þróun einhverja andspyrnu. Það er einnig ótrúlegt hvernig samfélag okkar hefur flotið sofandi að feigðarósi. En ég tel að það sé orðið of seint að snúa þessari þróun við úr þessu og því stöndum við nú skyndilega frammi fyrir þeirri staðreynd að menn eru flestir orðnir að konum og munum brátt tilheyra heilum kynstofni kvenna.

Faðir Snorra er af þeirri kynslóð þegar menn voru ennþá menn. Snorri er af kynslóð karla sem kvenfólk hefur breytt í konur.

Og ef hann er samkvæmur sjálfum sér þá treysti ég því að honum muni því líka þeir gullhamrar sem honum verða slegnir á afturendann í framtíðinni af kynslóð föður síns.

xoxo
-h

Þessir hamrar eru ekki gylltir.

viðvörun til lesenda Tískubloggsins

2011-05-02T21:43:00.000Z

Hola lovers,

Muniði um daginn þegar rætinn einstaklingur sem ég vil ekki nefna á nafn (enda hef ég löngum talið að það nafn sem hún gaf upp forðum sé ekki hennar eigið) kom fram í tveimur fjölmiðlum og reyndi þar að eigna sér heiðurinn af þessari síðu? Ég fjallaði stuttlega um það í þessari færslu hér, og leiddi líkum að því að hún væri að reyna að sölsa undir sig Tískubloggið til að hafa af mér þær miklu auglýsingatekjur sem ég mun fara að hafa af síðunni hvað og hverju.

Henni varð sko aldeilis ekki kápan úr því klæðinu, enda sendi ég henni umsvifalaust harðort bréf og sýndi henni svo ekki verður um villst hvar Davíð keypti ölið.

Ég hafði vonast til þess að þarmeð lyki viðskiptum okkar og hún léti sig hverfa með skottið á milli lappanna, en kom svo ekki í ljós að hún er að fara að gefa út "bók".

Ég hef það frá áreiðanlegum heimildum að hún hafi ekki skrifað þessa meintu "bók" sjálf, enda er hún ekkert nema ógeðsleg, loðin og ófrumleg hæðnisrotta.

Ég vildi því vara ykkur við þessum póser, kæru aðdáendur.

Hvað sem þið gerið skuluð þið ekki kaupa bókina hennar.

xoxo
-h

P.S. Hérna er mynd sem ég fann af henni og hinni meintu "bók" hennar á alnetinu. Sjáið bara hvað hún er ógeðsleg. Hún er með yfirvaraskegg og bringuhár og hún slefar pissi.

inspirational kvót dagsins - eða enn frekari sönnun þess allar mæður heimsins eru í raun einstæðar

2011-05-01T23:01:00.001Z

"Þær mæður sem hafa of mikið að gera þurfa aðstoð frá leikskólum, ömmum, barnapíum, ræstitækni o.s.frv. til að geta hvílst, endurnærst og komið jafnvægi á líf sitt."

-Melkorka Kristinsdóttir, í greinni Ofhjálparar á Bleikt.is.

[Kvót dagsins rennir annars enn frekari stoðum undir þá kenningu mína sem ég hef viðrað áður hér á blogginu, um að allar mæður heimsins séu í raun einstæðar, því þegar kemur að því að halda heimili og ala upp börn eru karlmenn sannarlega verri en enginn.]

xoxo
-h

inspirational kvót dagsins

2011-04-29T13:59:00.001Z

Hola lovers,

Það eru svo mörg gullkorn í þessari grein að ég gat ekki valið bara eitt. Í staðinn valdi ég fjögur.

1. „Við erum allar viðkvæmar og leitumst eftir karlmanni til þess að passa okkur“

2. „Hvaða faðir sem er passar uppá dóttur sína eins og slípaðan demant, ekkert fær að rispa hann“

3. „Eitt er víst, að herramennska heillar konur og gefur karlmönnum auka sjarma sem hefur þau áhrif á okkur að það þarf að skúra gólfið á eftir okkur.“

4. „A gentleman is simply a patient wolf“

-Snædís Ragnarsdóttir, í greininni Hvað varð um herramennskuna.

mæður landsins

2011-04-27T22:35:00.001Z

Hola lovers,

Var ég ekki löngu búin að segja ykkur að það sökkar að eignast börn? Ég þurfti a.m.k. ekki að hugsa mig um tvisvar þegar ég ákvað að fara í legnám.

Og nú kemur í ljós að mæður mega ekki einusinni drekka með formlegum hætti hérna á Íslandi.

Ég tek bara undir orð Þóru Sigurðardóttur, blaðakonu á Pressunni:

"Nú er bara að bíða eftir að vínið fáist í ÁTVR þannig að mæður geti formlega farið að fá sér í glas."

Því eitthvað verða þessir aumingjar að hafast við á milli þess sem þær skipta um kúkableyjur, setja í þvottavél og láta sig dreyma um fitusog á meðan maðurinn þeirra heldur framhjá þeim.

xoxo
-h

Það er ekkert helvítis mömmuvín á borðum á mínu heimili.

bjargvætturinn í gáttinni

2011-04-25T23:24:00.000Z

Hola lovers,

Þið vitið ekki hvað það fyllir mig mikilli gleði, elsku konur, að fá að benda ykkur á eftirfarandi grein, og það á þessum degi, af öllum dögum!

Því sjá, ég boða ykkur mikinn fögnuð, sem veitast mun öllum lýðnum, því yður er í dag frelsari fæddur, sem heitir Ágúst Halldórsson og skrifar á Bleikt.is. Og að grein hans Flíspeysa = enginn karlmaður, skuli birtast nú á páskum, þegar Jesúm sjálfur fórnaði sér svo við syndararnir gætum óhikað gengið inní guðsríki, er sko alls engin tilviljun.

Flísefni: 100% pólýester - 100% óhamingja

Þið getið rétt ímyndað ykkur gleði mína, þegar ég rakst á greinina á Blogggáttinni, ýtti á linkinn, las og upp rann fyrir mér ljós: Hér er bjargvættur allra kvenna ljóslifandi kominn!

Líktog Jesúm hikaði ekki við að umgangast hórkvendi, holdsveikisjúklinga og farísea, teygir Ágúst fram ástúðlega arma sína til þeirrar allra fyrirlitlegustu í okkar þjóðfélagi; flíspeysuklæddu konunnar. Og í stað þess að dæma hana sýnir Ágúst ást og skilning þegar hann umvandar hana af ákveðni og festu og bendir henni föðurlega á villu síns vegar. Líktog Jesúm vissi forðum, þá veit hann að flíspeysuklædda konan vill í hjarta sínu vel, en sökum hirðuleysis, leti og sjálfsbirgingsháttar þá hefur hún syndgað gegn karlkyninu.
Og syndir flíspeysuklæddu konunnar eru margar:

Hún málar sig á föstudögum og laugardögum.
Hún vaknar á sunnudögum.
Hún skellir sér í íþróttabuxur og flíspeysu.
Hún lyftir upp hárinu í flýti og setur í teygju.
Hún klæðir sig jafnvel svona í vinnunni, komist hún upp með það.
Hún gerir sér ekki grein fyrir því að fegurðin er það fyrsta sem hún fær frá náttúrunni, en fegurðin er einnig það fyrsta náttúran tekur frá henni.
Hún giftist.
Hún bætir á sig.
Hún klæðir sig í íþróttagalla.
Hún hættir að sjá um sig líkamlega.
Hún klæðist Cintamani-peysu.
Hún klæðist bleikum náttbuxum.
Hún er með töff klippingu.
Hún undrast að maður hennar taki að sækja á önnur mið.

En afhverju telur Ágúst þessar syndir upp? Afhverju skrifar hann pistilinn? Afhverju leyfir hann syndurunum ekki að hírast flíspeysuklæddum og kokkáluðum í forarvilpru syndar sinnar?

Því Ágústi stendur ekki á sama. Hann vill "koma því á framfæri að það er ekkert samasem merki fyrir konu að þegar hún er annað hvort gift eða trúlofuð að þær megi bæta á sig, klæða sig í íþróttagalla og hætta að sjá um sig."

ÁSJÓNA SYNDARINNAR

Og Ágúst er maður orðsins. Hann hefur unun af því að hlýða á rökfimi og orðaskak jafningja, en hin flíspeysuklædda kona mun alltaf verða undir í rökræðum, og þarmeð svipta hann ánægjunni af því að hlýða á óratoríska snilld, því "kona sem hefur haft sig til hefur mikla yfirburði í samræðum við aðrar konur sem eru ekki eins glæsilegar til fara".

Og afhverju er hin flíspeysuklædda kona fyrirfram dæmd til þess að bera skarðan hlut frá borði í samræðum við kynsystur sínar? Því "ekkert [er] konum eðlislægra en að finna kvenlega veikleika annarra kynsystra sinna og níðast á þeim". Og Ágúst er ennfremur "þeirrar trúar að það sé ekki til grimmara dýr í heiminum en kona þegar hún ætlar að ná sínu fram, hvort svo sem það sé af hefndarhug, deilum eða einbeittum brotavilja".

Pistlinum lýkur Ágúst svo á örlítilli hugvekju, sem mér finnst réttast að deila með ykkur án nokkurra málalenginga af minni hálfu, til að tryggja að orð mín saurgi ekki þann kristaltæra sannleik sem niðurlag hans geymir.

Þessi flíspeysa getur verið þröskuldur þess hvort þú lifir hamingjusömu lífi með fjögurra manna fjölskyldu í Garðabænum eða leigir kjallaraíbúð í Breiðholtinu þar sem þú lifir þínu innihaldslausa lífi nema um helgar þegar þú dustar rykið af kynþokkanum og ferð á veiðar innan um sauðdrukkna einstaklinga.

Látið ekki flíspeysuna skemma líf ykkar.

Svo mörg voru þau orð.

Ég get ekki annað en sagt takk, Ágúst, bjargvættur minn. AMEN.

xoxo
-h

inspirational kvót dagsins

2011-04-25T14:24:00.000Z

"Allir foreldrar ættu að eiga iPad"

-Margrét, úr greininni TÆKNI: Podkast í iPaddinn á Pjattrófusíðunni.

inspirational kvót dagsins

2011-04-24T15:06:00.000Z

"Þegar [bróðir minn] drekkur allt of mikið þá á hann það til að reyna að selja mig."

-Áslaug Sóllilja, úr greininni Að lenda í "cock blocki" af meðleigjanda sínum á Menn.is.

átfitt dagsins

2011-04-23T14:34:00.000Z

Bolur: Á röngunni. Keyptur í Kambódíu árið 2007.

Peysa: Keypt á útsölu á Bretlandseyjum.

Buxur: Af kærasta, girtar ofaní sokka.

Sokkar: Næstum því samstæðir.

xoxo
-h

Biflía Tískubloggsins, eða hin nýuppgötvaða gullna regla ástarsambands á milli manns og konu

2011-04-21T23:03:00.001Z

Hola lovers,

Ég er um þessar mundir að skrifa sambandskaflann* í lífstílsbók minni. (Og mér finnst notabene réttast að upplýsa ykkur um nýjan vinnutitil. Hann er ekki lengur Lífstíllinn: Megranir, tíska, Bob & beikon, heldur ákvað ég í samráði við útgefendur mína að vera ögn óræðari og mínímalískari (því það er í tísku) og núverandi vinnutitill er því einfaldlega Hola, lovers.)

Ég myndi ekki ganga svo langt að segja að sambandskaflinn hafi beinlínis vafist fyrir mér, en flestir vita að sambönd eru flókin. En þau eru jafnframt lífsnauðsynleg öllum sem ætla að koma sér á framfæri og öðlast góða stöðu í lífinu.

Um þau gilda margar, flóknar og óskrifaðar reglur. Mér vitanlega hefur enginn reynt að festa þær niður á blað áður og því er ég sannarlega að vinna frumkvöðlaverk fyrir mannkynið einsog það leggur sig (að ógleymdum mannfræðingum framtíðarinnar (sem munu vafalaust þakka mér óeigingjarnt starf mitt og hafa nafn mitt í hávegum löngu eftir að daga mínir eru taldir (og ef ég verð heppin munu þeir jafnvel nefna gallabuxnategund í höfuðið á mér (einsog þeir gerðu fyrir annan (og síðri) mannfræðing)))) og raunar er það hin mesta hneisa að mér hafi ekki að fyrrabragði verið boðin ritlaun í síðustu úthlutun Launasjóðs íslenskra blogglistamanna.

En í sambandskaflanum fjalla ég einnig töluvert um ástarsambandið á milli manns og konu. Það er víðfemt efni og sannarlega af mörgu að taka. En þarsem ég er ekki að frumsemja efnið, heldur er ég, einsog ég nefndi hér að ofan, að rita niður áður óskrifaðar samfélagsreglur, þá vil ég síður líta á mig sem höfund þessa kafla. Hlutverk mitt er frekar í átt við loftnet sem fangar ósýnilegar bylgjur andrúmsloftsins (sem eru þrátt fyrir allt til staðar, þó þið auðnuleysingjarnir komið ekki auga á þær) og þýðir þær yfir í ómþýða tóna í útvarpstæki; yfir í eitthvað sem jafnvel almúgamaður eða -kona fær skilið.

Eiginlega mætti líta á kaflann sem Biflíuna sjálfa, og mig sem Móses (þó ég hefði aldrei klæðst svona ógeðslegum kufli ótilneydd), en hann fann einmitt steintöflurnar með guðs orði og færði þær niður af fjallinu, og til fólksins. Eða, svo ég noti aðra myndlíkingu (sem þið skiljið kannski betur); Ég er líktog hinn nafnlausi ritari sem festi guðs orð niður á bókfell, svo fólk gæti notið þess um aldir alda.

Það ætti því ekki að koma ykkur á óvart, lesendur kærir, að ég hafi komist að því að sambandskafli minn, líkt og Biflían sjálf, hverfist um eina setningu sem bæði súmmerar upp efni verksins í heild sinni en vísar jafnframt útfyrir sig um leið. Því Biflían, og jafnvel hið kristna siðferði einsog það leggur sig, kristallast í einni setningu; Gullnu reglunni, sjá nánar hér.

Í skrifum mínum hef ég nefnilega komist að því að sambandskafli lífstílsbókar minnar, og hið sambandslega ástarsiðferði á milli karls og konu, kristallast einnig í einni setningu**. Hún er:

Vertu undirgefin, annars verður þú yfirgefin.

xoxo
-h

*Sambandskaflinn er ætlaður konum til aflestrar. Karlmenn þurfa, eðli málsins samkvæmt, aldrei að sýna undirgefni.

**Konur, ekki halda að þessi setning nægi ykkur til að þóknast karlmanninum í lífi ykkar.
Til þess að tryggja farsælt ástarsamband við karlmann þurfið þið að kaupa bókina mína.

átfitt dagsins

2011-04-21T17:23:00.001Z

Peysa: Keypt í Suðaustur-Asíu árið 2006.

Bolur: Af kærasta (sést ekki á mynd).

Leggó: Keyptar í lágvöruverslun á meginlandi Evrópu.

Nærsokkar: Nánast samstæðir (sjást ekki á mynd).

Utanyfirsokkar: Ósamstæðir. Báða fékk ég gefins. Annar er fjöldaframleiddur, hinn er handgerður. Annar er úr bómull og hinn er úr ull. Mér þykir jafnvænt um þá báða.

Hártoppur: Í hárspennu keyptri í Hagkaupum.

xoxo
-h

inspirational kvót dagsins

2011-04-21T15:27:00.000Z

"[Konur] eru svo gleymnar á lykla og svoleiðis hluti þegar þær eru að mála sig fyrir djammið."

-Höfundur óþekktur, úr greininni Konur, konur, konur! á Menn.is.

inspirational kvót dagsins

2011-04-20T16:30:00.000Z

"Margar konur eru mjög erfiðar þegar kemur að fullnægingu"

-Bella, Pjattrófa, í pistlinum KYNLÍF: Sjálfselska í rúminu - TURN OFF.

ÞAÐ ER EKKI BANAL AÐ BIÐJA UM ANAL, eða: Hvernig ég lærði að slaka á og skilja að gat er gat er gat. - gestapóstur

2011-04-19T14:39:00.000Z

Hola lovers,

Þarsem síðasti gestapóstur hans Pylz vakti svona mikla lukku þá hefur hann, eftir fjölmargar áskoranir lesenda, sent inn nýjan. Að þessu sinni tekur hann að sér að veita kvenkyns lesendum síðunnar sambandsráðleggingar um það hvernig á að þóknast karlmönnum.

Þannig að ef þið viljið ekki að mennirnir ykkar fari frá ykkur eða haldi framhjá, þá held ég að ykkur sé hollast að fylgja þeim. Því hér að neðan skrifar alvöru karlmaður og einsog þið vitið þá hafa alvöru karlmenn alltaf rétt fyrir sér.

xoxo
-h

***

Ef það er eitthvað sem stelpur telja heilagra en vinkonuna á sér þá er það afturendinn á þeim. No offence, en stundum held ég að konur hafi tekið þessa “my body is a temple” pælingu aðeins of langt.

Við karlmenn erum nú einu sinni þannig gerðir að við erum með meiri kynhvöt en konur. Okkur nægir ekki eitt gat á einni konu. Munnmök eru blessunarlega orðið frekar beisikk dæmi í dag, en því miður er ekki hægt að segja hið sama um endaþarmsmök. Og við karlmenn erum líka frábrugðnir konum að öðru leyti: Við erum landnemar. Við viljum sigra ný lönd, kanna þau til þaula og drottna yfir þeim. Þessa áhrifa má gæta víða: Karlmenn fundu Ameríku - Kristófer Kólumbus og Leifur heppni. Karlmenn urðu fyrstir á tunglið – Neil Armstrong og hinn gaurinn sem enginn man hvað heitir. Karlmaður sigraði heiminn – Rocky Balboa. Karlmaður uppgötvaði geislavirknina - John Radium. Hvort sem við erum að leita nýrra landa, finna upp frábæra hluti, byggja upp stórveldi eða banga chicks, þá erum við alltaf að sigra nýtt land og eigna okkur það.

Karlmaður fann Ameríku.

Karlmaður steig á tunglið.

Karlmaður sigraði heiminn.

Karlmaður uppgötvaði geislavirkni.

Hvers á karlmaðurinn að gjalda hér?

Það er því sorglegt að vita til þess að þarna úti séu konur sem neiti manni sínum um endaþarmsmök og þar af leiðandi rétti sínum sem karlmanni. Það er ekkert jafn grimmilegt og að neita sönnum karlmanni um að fullkanna yfirráðasvæði sitt! Viljið þið ekki alveg eins skera undan okkur og geyma gripinn í krukku á stofuborðinu?!? Innlitútlit sagði það nefnilega svo lækkert við hliðina á kristalsblómavasanum!!!!!
Þess vegna neyðast margir okkar út í framhjáhald eða til að slíta sambandinu, þó það sé kannski fínt að öðru leyti. Málið er að ef Guð er til þá er hann ekki galinn gæji, því hann hugsaði fyrir ofhlaðinni kynhvöt karla (og ef hann er plat þá er þetta ágætis frammistaða af hendi náttúruvalsins). Konur eru nefnilega með alveg þrjú göt og algjör synd að sóa einu þeirra. Í raun mætti kalla það crime against nature, eins og að neita höfrungi að synda um hafið eða ungum fola að hlaupa frjáls um.

Það sem þú, sem kona, verður að spyrja þig að er hversu mikið þú ert tilbúin að leggja á þig til að viðhalda sambandinu og forðast það að verða einmana piparjúnka sem enginn vill horfa á, hvað þá snerta. Hvað er svona hræðilegt við snöggan bakgarðssprett? Er það heimsendir?

Málið er að konur leggja á sig allskonar þjáningu „ástarinnar“ vegna, og ber þar næst að nefna barnsfæðingar. Ég meina, pælið í þessu í smástund: Konu finnst ekkert mál að rústa á sér stinnum maganum, fitna svo um munar, safna ógeðslegri appelsínuhúð (sem fer ekki sama hvað!) bara til þess að geta ungað út einu barni í veröld sem þarf að kljást við offjölgunarvanda á heimsvísu. Miðað við það, er þá of mikils mælst að þola nokkurra mínútna óþægindi (herramenn eru snöggir af ef konan kýs!) til að veita elskhuga þínum ánægju og bjarga sambandinu? Setjið þetta í samhengi gott fólk! Kræst!

Þess vegna skulið þið sýna manni ykkar skilning þegar hann biður þig um að kanna nýtt land í svefnherberginu. Víkkaðu sjóndeildarhringinn. Sjáðu hlutina í röklegu samhengi. Ég veit að það er erfitt fyrir þig, en þetta er engin ástæða til þess að láta tilfinningarnar hlaupa með sig í gönur. Og minnum okkur á að það er einmitt út af óþarfa tilfinningasemi sem konur voru ekki fyrstar á tunglið eða fyrstar til þess að uppgötva geislavirknina.

inspirational kvót dagsins

2011-04-19T12:42:00.000Z

"VIL BARA BENDA YKKUR Á ÞAÐ AÐ ÉG ER EKKI ÞESSI RAUÐSOKKA SEM AÐ FINNST KARLMENN VERA EINTÓMIR AUMINGJAR!"

-Jóna Særún, í greininni Alvöru karlmenn á Bleikt.is.

xoxo
-h

inspiration dagsins

2011-04-16T17:38:00.000Z

xoxo
-h

hvernig á að fá dömuna til að kyngja - gestapóstur

2011-04-14T22:49:00.004Z

Ji, lovers, haldiði að Tískublogginu hafi ekki bara verið að berast þessi dásamlegi gestapóstur rétt í þessu.

Það er svo langt síðan hér hefur birst efni sem höfðar til karlkyns lesenda síðunnar þannig að ég ákvað bara að skella honum inn með det samme.

xoxo
-h

***

Sælir!

Pylzenegger heiti ég AKA Los Pylz de la Grande AKA Prullarinn AKA Stykki, Alpha-male og lífskúnster extraordinaire. Eftirfarandi grein var pöntuð af hinni afbragðsgóðu vefsíðu menn.is og birtist þar innan skamms, en ég vildi hafa frumbirtingu á bestu lífstílssíðu landsins; Tískublogginu.

HVERNIG Á AÐ FÁ DÖMUNA TIL AÐ KYNGJA

Allar konur elska sæði. Sumar þeirra vita það bara ekki enn. Kannski er það því þær eru hræddar við að smakka eða hafa einhverja óútskýranlega klígju þegar kemur að ástarvessum. Þetta er synd því ekkert er jafn óaðlaðandi og ÓÞOLANDI eins og þegar stelpan vill ekki fáða uppí sig eða framan í sig í hita leiksins. Það er næstum því jafn pirrandi og að þurfa að nota smokk. Sæði er ekki eitrað. Sæði er ekki hættulegt. Til hvers að standa í þessu ef það á ekki að gera þetta almennilega?! En ekki örvænta, því það er hægt að sannfæra hvaða konu sem er að þitt sæði sé æði með aðeins örfáum skrefum:

1. Segðu henni að sæði sé nærandi fyrir húðina
Allar stelpur eru útlitsdýrkendur og þar af leiðandi ógeðslegir sökkerar fyrir fegurðartrixum. Þetta ber að notfæra við hvaða tækifæri sem er, og þrá þín eftir almennilegu feisjali er einmitt vettvangurinn til þess.
Gott er að byrja á því að minnast kæruleysislega á að [aðlaðandi módel] eða [Hollywood celeb] hafi sagt í viðtali við Vogue eða á E-channel að hún nýtti hverja sæðisgusu sem andlitsáburð – og að það sé leyndardómurinn á bak við óaðfinnanlega húð hennar. Þegar hún spyr þig hvernig þú vitir það skaltu segja að þú hafir séð einhverja gellu læka bleikt.is grein á feisbúkk. BI-WINNING!

2. Laumaðu sæði í matinn hennar
Þetta gæti verið svoldið vesen því konan eldar undantekningarlaust. En von kemur í búningi óvinar alls sem gott er: Femínasistanum. Áhrif femínasisma gætir víða, og like it or not þá eru flestar konur sökkerar fyrir því þú reynir að hjálpa til í eldhúsinu. Þú verður að passa þig vel að hún fari ekki að treysta á að þú hjálpir reglulega til. Til að berjast á móti þeirri þróun er kjörið að brenna matinn við og við, viljandi eða óviljandi.

Það gengur ekki að rúnka sér beint í matinn nema þú sért leiftursnöggur að fáða, þar sem konan fer aldrei lengi frá eldavélinni. Þú verður líka að passa þig á að sprulla ekki í eitthvað sem þú gætir étið – því það væri fokking ógeðslega hommalegt. Mér hefur gefist vel að gjósa í salatdressinguna – því salat er fyrir konur og homma, eða safna í litla krukku eða brúsa og dreifa yfir diskinn hennar þegar hún sér ekki til. Ef þessi leið er farin er best að lauma þessu út í bústið hennar á morgnanna. Ef hún étur eitthvað annað en búst á morgnanna þá skaltu dömpa henni strax áður en hún fær appelsínuhúð og verður viðbjóðsleg. Þetta krefst ninjahæfileika en á móti kemur að árangurinn skilar sér næstum samstundis. Hún venst bragðinu og tengir það við ljúffengan mat.

3. Fáðu það „óvart“ uppí hana
Mjög beisikk en getur verið áhrifaríkt. Æfðu pókerfeisið (kemur sér vel á pókerkvöldum – BI-WINNING aftur!) og láttu ekki á sjá þó þú sért nálægt því að fá það. Lykilatriði er að gæta að öndun og andlitssvip. Þú mátt alls ekki virðast sem þér leiðist þetta eða þetta sé ekki gott (nema það sé raunin, en það er efni í allt aðra þjálfunargrein), því það virkar letjandi fyrir hana. Síðan, á einmitt réttu augnabliki þá BÚMM! læturðu gossa. Reynsla mín hefur sýnt að flestar konur láta sig bara hafaða og kyngja og komast þannig að því að þetta er ekkert hræðilegt. Aðrar taka upp einhverja klígjustæla en eftir annað eða þriðja skiptið sem þú „óvart“ sprullar upp í hana verður hún orðin vön því.

söfnunarátak Tískubloggsins

2011-04-14T22:04:00.000Z

Hola lovers,

Einsog þið vitið öll (eða ættuð að vita (og skammist ykkar ef þið vissuð það ekki)) þá er ég með aðdáendasíðu á Facebook. Í þessum rituðu orðum þá á Tískubloggið nákvæmlega 840 aðdáendur, sem er fyrir neðan allar hellur.

Ég hef velt þessum skorti á aðdáendum mikið fyrir mér og mér er fyrirmunað að skilja hversvegna ég á ekki að minnsta kosti 1.000. Þessvegna ákvað ég, í samstarfi við styrktaraðila síðunnar, að hrinda af stað söfnunarátaki þarsem þið, aðdáendur mínir, safnið fyrir mig fleiri aðdáendum. Og hvað fáið þið í staðinn? Jú, einn hepinn aðdáandi fær að launum heimsendan beikonglaðning og pakka af gæludýrafóðri (ath. að sendingargjald er ekki innifalið og það mun aðdáandinn þurfa að greiða úr eigin vasa).

Það eina sem þið þurfið að gera er að gerast aðdáendur síðunnar (ef þið eruð það ekki þegar), skrifa eitthvað fallegt um Tískubloggið á vegginn og deila síðunni með öllum óvinum ykkar. Einn heppinn aðdáandi verður svo dreginn út og hlýtur ofangreind verðlaun!

Þannig að, allir að klikka hér! Einn tveir og þrjú!

En það fylgja margvíslegir kostir því að vera aðdáendur Tískubloggsins á Facebook. Þið fáið ekki einungis öll heilræðin sem hér eru rituð beint í Facebook-feedið ykkar, heldur má þar oft finna skemmtilegheit og ýmiskonar fróðleik sem ekki ratar hér inn á síðuna. Og ekki síst þá gefst ykkur einstakt tækifæri til að vera þátttakendur í spennandi samfélagi fallegra frumkvöðla sem láta sig málin varða.

Ég tek mér það bessaleyfi að birta hér brot úr óútkominni lífstílsbók minni að forleggjurunum forspurðum, en það er brot úr kaflanum Hegðun, hugsun og framkoma, þarsem sérstakleg er fjallað um Facebook-aðdáendasíður:

Facebook

Það eru bara amatörar sem stofna sér prófílsíðu á Facebook. Rétta leiðin er að stofna sér aðdáendasíðu. Aðdáendasíðan slítur kommúnistafjötrana sem Facebook reynir í sífellu að hneppa notendur í með því að láta fólk vera „vini“. Þetta falska vinahugtak býr þannig til tálsýnina um að öll samskipti þar séu á jafningjagrundvelli, á meðan aðdáaendasíða endurspeglar hinn raunverulega valdastrúktúr. Þar er ég einráð og ræði við aðdáendur mína um helsta áhugamál okkar allra; Mig sjálfa.

xoxo
-h

láttu strákinn sem þú ert að sofa hjá taka eftir þér

2011-04-14T09:56:00.003Z

Hola lovers,

Eigið þið stundum erfitt með að fanga athygli þeirra sem þið eruð að stunda kynlíf með þá stundina?

Hér eru nokkur þjóðráð:

How To Get A Guy To Notice You While You're Having Sex With Him

xoxo
-h

inspiration dagsins

2011-04-12T22:04:00.000Z

xoxo
-h

átfitt dagsins

2011-04-09T11:23:00.001Z

Kjóll: Í viktoríönskum stíl.

Nærbuxur: Kloflausar (sjást ekki á mynd).

Sokkar: Engir.

Hár: Slegið.

Kettir: Margir.

xoxo
-h

inspiration dagsins

2011-04-07T21:53:00.000Z

xoxo
-h

boli vikunnar

2011-03-29T21:57:00.001Z

Hola lovers,

Ykkur tilkynnist hérmeð að nýjasta nýjung Tískubloggsins, foli vikunnar, hefur hlotið nýtt nafn og kallast nú BOLI VIKUNNAR (Takk Jakob Sigurðsson, fyrir ábendinguna).

En einsog þið vitið öll þá eru bolar miklu stærri og sterkari en folar.

Þessi hérna myndi líka léttilega hafa lufsuna hann Alexander Pan undir ef svo ólíklega vildi til að þeir lentu í ryskingum.

Boli vikunnar heitir Þórólfur Hansen og helstu áhugamál hans eru heimspeki, Belly Bandit og latnesk teknótónlist.

Og stelpur, ótrúlegt en satt, þá er hann á lausu. *Blikkblikk*

xoxo
-h

daily bobsession!

2011-03-29T10:53:00.000Z

B.o.B

xoxo

-h

átfitt dagsins

2011-03-27T15:37:00.000Z

Bolur: Á röngunni.

Buxur: Af kærasta, girtar ofaní sokka.

Sokkar: Ósamstæðir.

Hár: Slegið.

xoxo
-h

átfitt dagsins

2011-03-26T12:48:00.000Z

Hola lovers,

Hér kemur átfitt dagsins:

Bolur: Af kærasta.

Leggó: Keyptar á útsölu.

Fylgihlutur: Lítill kettlingur sem ég stal. Þegar hann er búinn að stækka aðeins meira ætla ég að stoppa hann upp og búa til veski úr honum.

Sokkar: Engir.

xoxo
-h

hártíska katta

2011-03-25T18:02:00.000Z

Hola lovers,

Þið munið kannski eftir því þegar Tískubloggið fjallaði ítarlega um hártísku ófríðra ungbarna, sjá hér og hér.

Og einsog þið vitið eflaust þá hrjáir sama vandamál marga ófríða ketti (þó mínir séu blessunarlega lausir við það).

Það var því með miklum fögnuði sem ég las aðdáendabréf lesanda sem benti á þessa sniðugu lausn fyrir ketti.

Nú legg ég það bara í hendur ykkar, hæfileikaríku lesendur, að búa til uppskrift að herlegheitunum.

xoxo
-h

Tískubloggið kynnir nýja nýjung; FOLA VIKUNNAR

2011-03-24T22:08:00.001Z

Hola lovers,

Einn einlægasti aðdáandi Tískubloggsins benti nýverið á að á Tískubloggið vantaði sárlega liðinn "Fola vikunnar". Í kjölfar ábendingarinnar hélt ritstjórn Tískubloggsins krísufund, og komst að lokum, eftir miklar vangaveltur, að þeirri niðurstöðu að ábendandi hefði rétt fyrir sér; Tískubloggið þyrfti svo sannarlega að brydda uppá þessari nýjung.

Það er því með miklu stolti sem ég kynni ykkur nýjan lið, FOLA VIKUNNAR.

Foli vikunnar að þessu sinni er heitari en heitt. Hann heitir Alexander Pan, og áhugamál hans eru m.a. sólarolía með kókosbragði, langar gönguferðir við strandlengjuna þarsem hann getur látið goluna gæla við hárið á sér og síðan gengið áhyggjulaus að flæðarmálinu, virt fyrir sér mánann og látið sjóinn sleikja á sér tærnar, spunaspil og H.P. Lovecraft.

Og sorrí dömur, en hann er ekki á lausu.

xoxo
-h

inspiration dagsins

2011-03-22T18:27:00.001Z

xoxo
-h

inspiration dagsins

2011-03-21T21:21:00.000Z

xoxo
-h

fjármunir karlmanna og hjól atvinnulífsins

2011-03-21T10:32:00.001Z

Hola lovers,

Einsog þið vitið þá er ekkert minna sexí en kona sem hefur áhuga á stjórnmálum. Ég er alltaf meðvituð um að hámarka kynþokka minn á öllum stundum (sem er ein af ástæðunum fyrir því að ég sef alltaf í sokkaböndum og með varalit (hinar eru persónulegar og ég vil síður deila þeim á alnetinu)) og því reyni ég eftir fremsta megni að forðast fréttir og umræður um stjórnmál. En sum mál eru bara svo hávær að umræðan um þau smitast jafnvel inná lífstílssíður og tískublogg (sem er það eina sem ég les á netinu) og svo maður tali nú ekki um Facebook. Dæmi um pólitísk málefni sem maður tekur nánast upp með osmósu er þetta Icesave (sem ég hef gert mér far um að skilja ekki (sem er erfitt, því það er svo ógeðslega einfalt (og ég er svo gáfuð))).

Annað dæmi um pólitískt málefni sem mér hefur ekki tekist að forðast er niðurskurður hjá ríkinu, og sorrí lovers, en ég bara get ekki annað en haft skoðun á því. Ég geri mér grein fyrir því að með því að hafa skoðun á þessu máli þá er ég mögulega að traðka á brothættri sjálfsmynd einhverra karlmanna (með því að hafa skoðun) og ég mun líklega missa þónokkuð af kynþokka mínum í ykkar augum (get ég bætt ykkur þetta upp með því að birta mynd af kloflausu nærbuxunum mínum?), en ég get bara ekki á mér setið.

Nýverið voru birtar upplýsingar um að fækkað hafi verið um 540 stöðugildi hjá ríkinu í niðurskurði í kjölfar kreppunnar. Þar misstu 470 konur atvinnu sína og 70 karlar. Einnig er áformaður mikill niðurskurður í leik- og grunnskólum, en þar starfa að mestu konur.

Á sama tíma eru uppi áform um að ríkið fara út í dýrar framkvæmdir til að „koma hjólum atvinnulífsins í gang“ og búa til störf handa karlmönnum í byggingariðnaði.

Ég fagna þessari þróun ákaft. Því einsog og þið vitið er sjálfsmynd karlmanna ákaflega brothætt, og séu þeir mjög lengi án atvinnu verður sjálfsmynd þeirra afar löskuð og getur jafnvel orðið fyrir varanlegum skaða. Konur aftur á móti skilgreina sig ekki út frá starfi sínu, stöðu eða menntun, heldur er það útlit þeirra, hjúskaparstaða og þyngd sem mótar þeirra sjálfsmynd. Af framansögðu ætti því að vera dagljóst að störf karlmanna eru mikilvægari en störf kvenna, og það gleður mig að stjórnvöld skuli gera sér grein fyrir því.

Einhverjir hafa bent á að ríkið sé, með því að skera niður í heilbrigðiskerfi á sama tíma og dýrar framkvæmdir eru áformaðar, einungis að færa fé úr einum vasa í annan, en það er allsendis ósatt.

Það sem þarf að einblína á núna er að koma samfélaginu í gang aftur eftir hrunið. Til þess þarf að dæla peningum út í samfélagið með því að skapa atvinnu svo fólk fái laun, geti borgað af lánunum sínum og geti keypt vörur eða þjónustu, sem svo aftur skapar meiri atvinnu o.s.frv. Og það er löngu vitað að þeir peningar sem karlar fá greidda eru miklu betri en þeir peningar sem konur hafa á milli handanna. Peningar úr karlmannsveski eru miklu meira atvinnuskapandi en peningar úr kvenmannsveski, og fjármunir karlmanna koma hjólum atvinnulífsins fyrr og betur í gang en það fé sem kvenfólk aflar.

Þess vegna eru aðgerðir ríkistjórnarinnar nú hárréttar.

xoxo
-h

Og hér, svo ykkur finnist ég aftur sexí, fáið þið að sjá kloflausu nærbuxurnar mínar (myndin er tekin áður en ég klippti gatið).

þegar gæludýrafóður bjargaði ástinni, og mér

2011-03-15T23:17:00.000Z

Hola lovers,

Hef ég nokkuð sagt ykkur frá því þegar gæludýrafóður bjargaði ástinni, og mér?

Nei?

Jæja, ég geri það seinna. Klukkan er nefnilega orðin margt.

xoxo
-h

daily bobsession!

2011-03-15T23:10:00.002Z

Bob Barr.

xoxo

-h

Tískubloggið skrifar um tískublogg fyrir heimska útlendinga á Íslandi

2011-03-11T15:54:00.000Z

Hola lovers,

Einsog þið vitið kannski, þá er núna mars. Og hátíðin HönnunarMars fer, ótrúlegt nokk, fram í þessum mánuði.

Og í tilefni hátíðarinnar bað dagblaðið Reykjavík Grapevine Tískubloggið nýverið að skrifa greinarstúf um íslensk tískublogg. Ég gladdist mjög fyrir hönd ritstjóra og ekki síður lesenda blaðsins, að fá svo merkan pistlahöfund til að leggja útgáfunni lið, en sá böggull fylgdi skammrifi að blaðið er alfarið á ensku, og þið vitið eflaust að ég tjái mig eingöngu á þeirri tungu sem mér er tömust. En Tískubloggið hefur aldrei hlaupist undan áskorun, svo ég sagði að sjálfsögðu já, með þeim skilyrðum að ég myndi skrifa greinarkornið á íslensku og skella henni svo í gegnum hina einstaklega handhægu þýðingarvél sem ég uppgötvaði síðla hausts árið 2010.

Það var samþykkt, svo ég settist við tölvu kærastans (hann á nefnilega apple-tölvu en ég á pc, og mér fannst einhvernveginn meira viðeigandi að skrifa pistil fyrir hönnunardaga á apple (afþví þær eru svo hönnunarlegar, þið vitið (eða það segja a.m.k. auglýsingarnar fyrir þær (og þeim trúi ég alltaf)))), ritaði meistaralega greiningu mína á hinu (næstum því) séríslenska fyrirbæri sem tískublogg er og sendi inn til ritstjóra og hlaut miklar þakkir fyrir (en hann hlaut á móti þá upphefð að fá tölvupóst frá mér (sem eru samt ekki jöfn skipti (þó ég fái að auki greitt (en það kemur samt ekki alveg út á sléttu)))).

Blaðið kom svo út í dag og er fáanlegt víðsvegar um bæinn án endurgjalds, og það má einnig nálgast rafrænt á heimasíðu þeirra hér.

En ég veit að lesendur mínir eru engir helvítis túristar svo ég ætla að birta pistilinn hérna á íslensku líka.

Upprunalegi pistillinn á íslensku er því miður að eilífu glataður, því apple-tölva kærastans hrundi (sem ég hélt að ætti ekki að vera hægt (hafiði einhverntímann séð auglýsingu þarsem auglýstar eru tölvur sem hrynja?)), en það kemur ekki að sök, því ég skellti henni bara aftur í gegnum þýðingartólið góða.

Njótið.

***

Creative neysluhyggju og Gral Tíska Blogger

Hola elskendur,

Þú getur ekki þekkja mig, en þú ættir. (Ef þú ert útlendingur í heimsókn til landsins, ég fyrirgef þér, en ef þú ert innfæddur Íslendingur þú hefur enga afsökun)

Ég er mest áberandi tíska blogger Ísland hefur alið, og ég blogga aðallega á íslensku (sem er eina trúverðugur ástæðan fyrir því að þú ferðamenn gætu ekki hafa heyrt um mig). Og ég fullvissa þig um, að vera leiðandi tísku á Íslandi blogger er ekki lítið feat, eins og Ísland, hafa meðal hæstu læsra í heiminum og erfða hæfileiki fyrir tísku, sennilega hefur einnig mest tíska bloggara á mann í heiminum.

Ég blogga á flestum smart heimasíðu landsins, www.tiskublogg.blogspot.com, og þegar The Reykjavík Grapevine bað mig um að skrifa verk við hönnun mars mál sem ég samþykkti strax.

Eins og þú sennilega þegar vita ef þú ert að lesa þetta, Ísland er mest skapandi land í heimi. Við erum þekkt fyrir skapandi tónlistarmenn okkar, skapandi listamenn okkar, skapandi nafngiftir okkar eldfjalla og skapandi banka okkar. Og við íslenska tísku bloggara (að íslensku) eru skapandi mikið eins vel, þó við veljum að beina sköpun okkar með óhefðbundnum leiðum. Óhefðbundin, því við bý ekki neitt eins hversdagsleg og áþreifanlegum hlutum. sköpun okkar eru ágrip og íhugunar, frekar en efnisleg og því eilífa.

Við skrifa um hluti sem við viljum að kaupa og sýna í grafískri hætti hvernig við myndum nota þau í skapandi hátt ásamt öðrum hlutum sem við viljum kaupa. Þetta gæti verið að leggja til skyrtu mannsins vera borinn pils konunnar, með gerfi-beikon lengjur sem bandanna, eða kannski að nota axlabönd sem Brassiere.

The smart útgáfa af þessari mynd af sköpun er án efa að senda myndir af hlutum sem þú vilt í raun að kaupa, en mun sennilega aldrei vera fær um að veita í lífi þínu, og upplýsa lesendur um hvernig þú myndir nota málið með öðrum hlutum sem þú sárlega vilt, en mun aldrei hafa efni á.

Því það er heilagur gral í tísku hjá blogger til að girnast hluti sem eru í senn að ná (þar sem þeir eru til sölu) og unattainable (vegna þess að engin venjuleg manneskja hefur efni á þeim) og því himneska.

Þessi mynd af sköpunargáfu vinsæl hjá bloggara tísku um allan heim er það sem ég kalla skapandi neysluhyggju, og það vilja vera the næstur stór hlutur.

xoxo
-h

[Þessi grein var þýdd á ensku af Google Translate.]

Ég, með kórónuna sem Samband Íslenskra Tískubloggara (SÍT) sendi mér, og ég á fyllilega skilið.

inspiration dagsins

2011-03-10T21:09:00.000Z

xoxo
-h

átfitt dagsins

2011-03-09T21:52:00.000Z

Hola lovers,

Bolur: Af kærasta.

Sokkabuxur: Útland.

Sokkar: Útland.

Gæludýrafóður: Best í heimi, frá styrktaraðila síðunnar.

Köttur: Vel fóðraður.

xoxo
-h

brothætt sjálfsmynd karlmanna

2011-03-07T10:37:00.001Z

Hola lovers,

Ég vona að þið afsakið bloggleysið, en sannleikurinn er sá að ég hef verið iðin við að skrifa lífstílsbókina sem kemur út í haust, og það er bara þannig að þegar maður hefur mikið að gera við að raka sig að neðan, blogga, skoða sig í spegli og skrifa bók þá verður bara eitthvað undan að láta og því miður var það bloggið (afþví ég kann að forgangsraða).

En í lífstílsbókinni fjalla ég einmitt töluvert um brothætta sjálfsmynd karlmanna og varð því glöð þegar ég rakst á þessa grein, því höfundur hennar er á svipuðum slóðum í hugvekju sinni og ég er í minni lífstílsbók.

Því þó karlmenn séu nær undantekningarlaust sterkari, gáfaðri og hæfileikaríkari en kvenfólk, þá eru engu að síður dæmi um það að sjálfsmynd þeirra sé í öfugu hlutfalli við atgervið.

Og þá kemur það í hlut kvenna að taka saman höndum og styrkja hana.

Hún Klara Egilson hittir nefnilega naglann á höfuðið í grein sinni þegar hún skrifar: „Þú mátt aldrei vera sterkari en hann. Það gerir bara lítið úr manninum.“

Eiginlega er það sárara en tárum taki að hún finni sig knúna til að leggja áherslu á þessa staðreynd sem ætti að vera viðtekin sannindi, en ætli það að hún telji þörf á því að taka þetta sérstaklega fram sýni ekki bara að enn er rík ástæða til að brýna þetta fyrir ungum og óreyndum konum sem hafa ekki fengið nægilega gott uppeldi (og við þurfum að horfast í augu við þá nöturlegu staðreynd að því miður eru til stúlkubörn sem eru aldar upp af geðsjúkum einstaklingum sem innræta þeim annan og verri hugsunarhátt (en ég bið ykkur að hafa í huga að ekki er við stúlkurnar sjálfar að sakast, heldur foreldra þeirra (og að vissu leyti samfélagið (og þar með okkur sjálf, fyrir að láta þennan ósóma sem femínisminn er viðgangast (þannig að lítið í eigin barm, áður en þið dæmið))))).

En styrkur felst í ýmsu, s.s. ósérhlífni, hæfileikum, heiðarleika, hárri stöðu, gáfnafari, kímnigáfu og svo mætti lengi telja. Það er því óhætt að slá því föstu að í greininni hafi Klara ekki eingöngu átt við líkamlega yfirburði og því má heimfæra tilvitnunina í Klöru yfir á flest allt sem jákvætt má telja í fari manneskju.

Ég finn mig knúna til að leggjast á sveif með Klöru og brýna eftirfarandi fyrir kynsystrum mínum, og sérstaklega saklausum fórnarlömbum kvenrembunnar (femínismans):

Konur skulu ávallt gæta þess að vera ekki gáfaðri, hæfileikaríkari, heiðarlegri, fyndnari eða hærra settari en karlmenn í kringum þær, og fyrir alla muni skulu þær forðast að vera með hærri laun en þeir.

Því það gerir bara lítið úr manninum.

xoxo
-h

naglatískublogg

2011-03-05T22:42:00.000Z

Hola lovers,

Hér fáiði annað naglatískubloggið á afar stuttum tíma.

Verði ykkur að góðu.

Karlmennska á vinstri. Ég ætlaði svo að gera kvenmennsku á hægri, en það var ómögulegt að athafna sig með þessar neglur, svo önnur höndin varð að duga að sinni.

xoxo
-h

átfitt dagsins

2011-03-05T17:15:00.001Z

Hola lovers,

Þetta er dressið í dag:

Kjóll: Náttkjóll af mömmu sem hún keypti árið 2007, en hann hljóp í þvotti svo hún gaf mér hann.

Ullarsokkarbuxur: Úr ull.

Hár: Óþvegið.

Köttur: Þungur. (Ég ákvað að hafa hann með í myndatökunni því feldurinn á honum tónar svo vel við sokkabuxurnar (og hárið á mér))

xoxo
-h

naglatískublogg - naglar

2011-02-27T22:37:00.000Z

xoxo
-h

átfitt dagsins

2011-02-26T13:45:00.000Z

Peysa: Gefins.

Buxur: Af kærasta.

Sokkar: Af kærasta.

Hár: Óþvegið.

xoxo
-h

inspiration dagsins

2011-02-25T15:18:00.001Z

xoxo

-h

daily bobsession!

2011-02-23T11:10:00.000Z

Bobby Hill.

xoxo

-h

Birni Inga sendar baráttukveðjur - gestapóstur með formála Tískubloggsins

2011-02-22T11:30:00.000Z

Hola lovers,

Einsog dyggir aðdáendur Tískubloggsins vita þá hlaut ég ritstjórastöðu á Eyjunni í haust (sjá hér), einungis til að vera svipt henni fyrirvaralaust kvöldið áður en áætlað var að ég tæki til starfa (sjá hér).

Ég var að sjálfsögðu afar ósátt við þessa framkomu Eyjufólks í minn garð og sendi þeim harðort bréf (sjá hér). Allt fór þó vel að lokum, og lyktir þessa máls urðu þær að sá sem hafði sölsað undir sig ritstjórastól minn viðurkenndi ótvíræða yfirburði mína og ég fékk aðdáunarbréf frá uppáhalds Pjattrófunni minni.

Ég tók því vefritið Eyjuna nokkurn veginn í sátt, þó vissulega hafi mér sárnað svolítið framkoma þeirra.

Þegar tilkynnt var um eigendaskipti hennar nýverið sperrti ég eyrun, því auðvitað gat enginn annar en ég sjálf komið til greina sem ritstjóri hennar, fyrst valdaræninginn hafði tekið pokann sinn. En nýir eigendur virtust þó hafa aðrar hugmyndir, sem hlýtur að skýrast af því að þeir hafa einfaldlega aldrei lesið Tískubloggið og því ekki kynnst óbrigðulu tískuviti mínu, innsæi mínu í hug smáborgarans, kyngimagnaðrar hugsunar minnar og næmlegri framsetningu.

Ég skrifaði þessi mistök því á vanþekkingu þeirra og ákvað að taka þetta ekki svo nærri mér, því ég hefði hvorteðer hafnað tilboði þeirra um ritstjórastöðuna, þar eð ég er einfaldlega of hæf í stöðuna, auk þess sem Tískubloggið hyggst færa út kvíarnar og vera ekki eingöngu vefrit, heldur einnig sjónvarpsstöð, og hér munu skemmtilegri og meira spennandi hlutir eiga sér stað en munu nokkurntímann birtast á Eyjunni. Það hefði þó engu að síður verið gaman að vera boðin staðan, en ég ákvað að kæra mig kollótta og hélt áfram að vera dyggur lesandi Eyjunnar.

En þegar ég svo sá síðla kvölds í gær að þeir höfðu úthýst Pjattrófunum, uppáhaldsbloggi mínu, þá rann mér blóðið til skyldunnar og ég hafði afráðið að hafa samband við þær og bjóða þeim afnot af lögfræðiteymi mínu og bjóðast jafnvel til að senda einsog eitt harðort bréf fyrir þeirra hönd til nýs ritstjóra. Því Pjattrófurnar er ekki bara uppáhaldsheimasíðan mín, heldur hafa þær að mörgu leyti verið mér fyrirmynd og hvatning, auk þess sem þær hafa stutt dyggilega við Tískubloggið í gegnum tíðina. Og ég gæti best trúað að þær beri ekki síður hlýjar tilfinningar í minn garð, og ég efa ekki að þær horfa á mig með stolti kennarans sem fylgist með nemanda sínum taka honum sjálfum fram og ná hærra en kennarinn sjálfur hafði nokkru sinni möguleika á, eða hæfileika til.

Af framansögðu má vera ljóst að mér var vefritið Eyjan þegar hugleikin þegar mér barst svo aðsendi pistillinn sem birtist hér að neðan. Hann rímaði þó engan veginn við þær skoðanir sem ég hafði myndað mér á málinu, en það góða við önnur sjónarmið er að þau fá mann oft til að endurskoða sín eigin.

Í aðsenda pistlinum er bent á að nýir eigendur Eyjunnar séu í raun að gera metnaðarfulla tilraun til að útiloka kvenrembur (femínista) frá síðu sinni, og ég get ekki annað en lýst yfir ánægju minni með þá þróun. Þið vitið öll hvað mér finnst um þessar loðnu, ljótu, óánægðu og leiðinlegu konur.

Þegar fólk fer í krabbameinsmeðferð þá fer það oft á lyf sem drepur ekki bara veikar frumur, heldur allar frumur, þær heilbrigðu líka. Þar sem betri lyf eru því miður ekki í boði verða heilbrigðu frumurnar einfaldlega ásættanlegur (en engu síður sár) fórnarkostnaður við útrýmingu meinsins.

Nýir aðstandendur vefritsins Eyjunnar búa bersýnilega ekki yfir fínlegri meðölum til að útrýma krabbameininu sem kvenrembur (femínistar) eru, og grípa því til þess ráðs að fjarlægja allar konur af vefsíðu sinni. Ég styð þá heilshugar í því átaki, þó vissulega sé hægt að rífast um aðferðafræðina.

Úthýsing Pjattrófanna er því sár, en ásættanlegur, fórnarkostnaður við útrýmingu femínista (kvenremba) af internetinu.

Ég þakka ykkur samfylgdina Pjattrófur.

Það var gott á meðan varði.

Og gef ég nú Snæ, aðdáanda Tískubloggsins, orðið.

xoxo
-h

***

Birni Inga sendar baráttukveðjur

Eins og flestir vita hafa karlhatarar (femínistar) vaðið allt of lengi uppi í samfélaginu með frekju og yfirgangi, heimtandi að allar konur verði jafn leiðinlegar og ófullnægðar og þær sem hæst hafa. Það er ánægjulegt að sjá að nú er fjölmiðlaheimurinn kominn með nóg og setur þeim stólinn fyrir dyrnar. Þar verður Birni Inga seint þakkað sitt framlag. Í hinu ört stækkandi fjölmiðlaveldi sínu hefur hann sýnt djúpan skilning á eðli kynjanna og mismunandi áhugasviði þeirra. Þannig stofnaði hann vefritið Bleikt.is þar sem konur geta sótt lífstílsráð og léttmeti án þess að fréttir dagsins þvælist fyrir. Og þó Bleikt.is komist aldrei með tærnar þar sem Tískubloggið hefur hælana í lífstílsumfjöllun þá er þetta ágætis viðleitni sem ber að fagna.

Nú hefur Björn Ingi yfirtekið Eyjuna og strax sjást merki þess að hann tekur alvarlega það hlutverk sitt að greina á milli áhugasviða kynjanna. Hann hefur lokað á Láru Hönnu sem fastan bloggara, enda hefur hún ekki sýnt konum tilhlýðilega virðingu í gegnum tíðina. Hún hefur mokað yfir alþjóð leiðindum um umhverfisvernd og stjórnsýslu sem allir vita að konur hafa hvorki vit né áhuga á. Í stað hennar eru komnir Eiríkur Jónsson og Jakob Bjarnar, sá fyrrnefndi er með fremstu blaðamönnum landsins eins og allir vita, og sá síðarnefndi hefur verið óþreytandi við að vekja athygli á því hvað karlrembur (femínistar) eru mikið þjóðfélagsmein. Jakob Bjarnar hefur oft lýst þeirri athugulu skoðun að það beri að leggja Jafnréttisstofu niður, enda ekkert nema peningaaustur sem er varla réttlætanlegt á aðhaldstímum.

Fyrir áhugafólk um að hið rétta eðli kynjanna fái notið sín eru þetta góðar fréttir og eru Birni Inga sendar allar góðar kveðjur og þakklæti fyrir framlag sitt til fjölmiðlunar á Íslandi.

Snær

opið bréf til Lilju Ingibjargar og Hildar Lífar

2011-02-21T18:52:00.004Z

Hola haters,

Ég sá að þið eruð að fara að halda VIP-partý og senduð út boð fyrir helgi á Facebook. Ykkur hefur greinilega yfirsést að bjóða mér, sem er með ólíkindum.

Því ég þarf auðvitað ekki að segja ykkur að ég er frægasti og besti megrunar-, tísku- og lífstílsbloggari Íslands og held úti besta og vinsælasta fjölmiðli landsins, sem mun raunar færa út kvíarnar bráðlega og stofna sína eigin sjónvarpsstöð, sem bera mun heitið Ttískttíví (þar sem þið hafið nú fyrirgert möguleika ykkar á því að að vera með gestaþátt). Ég er einnig fyrrverandi ritstjóri vefritsins Eyjunnar, auk þess sem ég er verðandi metsöluhöfundur hjá virtu forlagi. Mér skilst aukinheldur að sá orðrómur að óútkomin lífstílsbók mín sé líklegasti kandídatinn í Bókmenntaverðlaun þessa árs hafi borist menningar- og tískuelítu landsins til eyrna í síðustu viku.

Aðdáendahópur minn er víðfemur og stór. Engin önnur en Hlín Einarsdóttir kallaði mig "krútt", Pjattrófurnar slógu um mig skjaldborg þegar rætinn aðili réðst á Tískubloggið á afar ósvífinn hátt, ég er helsti sérfræðingur landsins í hugmyndafræði Poetrix, ég hef farið í sleik við sex landsliðsmenn í fótbolta, fimm landsliðsmenn í handbolta, sængað hjá fjórum pólitíkusum í velgjörðarskyni á síðastliðnum tveimur vikum, ég hef verið sameiningartákn fyrir allar íslenskar konur í tæplega sjö mánuði, ég er einn virtasti heimspeðlisfræðingur veraldar, og svo mætti lengi telja.

Ég kann að hegða mér í sviðsljósinu og er orðin langþreytt á því að fara út að skemmta mér og lenda í því að einhver "almenningur" hangi utan í mér allt kvöldið.

Aftur á móti veit ég engin deili á ykkur, en ef þið biðjið mig fallega skal ég kannski kynna ykkur fyrir einhverjum af merkari aðdáendum mínum.

Facebook-síðu mína finnið þið hér. Ég býst við pósti frá ykkur eigi síðar en fyrir miðnætti í kvöld.

xoxo
-h

átfitt dagsins, o.fl.

2011-02-20T15:14:00.000Z

Hola lovers,

Svona er dagurinn í dag:

Beikonsloppur: Keyptur í Kína árið 2007.

Sokkabuxur: Keyptar af Sokkabuxnakonunni.

Birtustrókur: Guðleg forsjóna sem fylgir mér stundum, en ákvað einhverra hluta vegna að yfirgefa mig í miðri myndatöku.

Hár: Slegið.

***

Einsog þið vitið þá er Tískubloggið í sífellu að reyna að finna nýjar leiðir til að færa út kvíarnar. Ég hef í þónokkurn tíma beðið þess að fá boð um að vera með minn eiginn sjónvarpsþátt, en hingað til hefur biðin verið til einskis (afþví að sjónvarpsframleiðendur eru fífl).

En á tækniöld eru ýmsar lausnir í boði fyrir einyrkja sem enginn hefur áhuga á að fá í sjónvarp. Þetta vita Pjattrófurnar og hafa því gert sér lítið fyrir og stofnað eigin jútjúb rás á netinu sem heitir, að mér skilst, Pjatttíví, (sem mér finnst dásamlegt heiti á sjónvarpsrás (þó ég viðurkenni fúslega að ég hefði viljað sjá aðeins fleiri té í nafninu (en meira má lesa um rásina hér))).

Ég tel að þarna séu þónokkrir möguleikar fólgnir og hef því verið að velta fyrir mér að feta í þeirra spor og stofna mína eigin sjónvarpsrás (og nefna jafnvel Tísktíví (eða Ttísktttíví)). Á rásinni gæti ég síðan birt skemmtilegt aukaefni, einsog hvað gerist bakvið tjöldin þegar átfittpóstar eru teknir, hvernig gæludýrafóður auðgar hversdaginn og margt, margt fleira.

Hvernig líst ykkur á það, lovers?

xoxo

-h