Biflía Tískubloggsins, eða hin nýuppgötvaða gullna regla ástarsambands á milli manns og konu

Hola lovers,

Ég er um þessar mundir að skrifa sambandskaflann* í lífstílsbók minni. (Og mér finnst notabene réttast að upplýsa ykkur um nýjan vinnutitil. Hann er ekki lengur Lífstíllinn: Megranir, tíska, Bob & beikon, heldur ákvað ég í samráði við útgefendur mína að vera ögn óræðari og mínímalískari (því það er í tísku) og núverandi vinnutitill er því einfaldlega Hola, lovers.)

Ég myndi ekki ganga svo langt að segja að sambandskaflinn hafi beinlínis vafist fyrir mér, en flestir vita að sambönd eru flókin. En þau eru jafnframt lífsnauðsynleg öllum sem ætla að koma sér á framfæri og öðlast góða stöðu í lífinu.

Um þau gilda margar, flóknar og óskrifaðar reglur. Mér vitanlega hefur enginn reynt að festa þær niður á blað áður og því er ég sannarlega að vinna frumkvöðlaverk fyrir mannkynið einsog það leggur sig (að ógleymdum mannfræðingum framtíðarinnar (sem munu vafalaust þakka mér óeigingjarnt starf mitt og hafa nafn mitt í hávegum löngu eftir að daga mínir eru taldir (og ef ég verð heppin munu þeir jafnvel nefna gallabuxnategund í höfuðið á mér (einsog þeir gerðu fyrir annan (og síðri) mannfræðing)))) og raunar er það hin mesta hneisa að mér hafi ekki að fyrrabragði verið boðin ritlaun í síðustu úthlutun Launasjóðs íslenskra blogglistamanna.

En í sambandskaflanum fjalla ég einnig töluvert um ástarsambandið á milli manns og konu. Það er víðfemt efni og sannarlega af mörgu að taka. En þarsem ég er ekki að frumsemja efnið, heldur er ég, einsog ég nefndi hér að ofan, að rita niður áður óskrifaðar samfélagsreglur, þá vil ég síður líta á mig sem höfund þessa kafla. Hlutverk mitt er frekar í átt við loftnet sem fangar ósýnilegar bylgjur andrúmsloftsins (sem eru þrátt fyrir allt til staðar, þó þið auðnuleysingjarnir komið ekki auga á þær) og þýðir þær yfir í ómþýða tóna í útvarpstæki; yfir í eitthvað sem jafnvel almúgamaður eða -kona fær skilið.

Eiginlega mætti líta á kaflann sem Biflíuna sjálfa, og mig sem Móses (þó ég hefði aldrei klæðst svona ógeðslegum kufli ótilneydd), en hann fann einmitt steintöflurnar með guðs orði og færði þær niður af fjallinu, og til fólksins. Eða, svo ég noti aðra myndlíkingu (sem þið skiljið kannski betur); Ég er líktog hinn nafnlausi ritari sem festi guðs orð niður á bókfell, svo fólk gæti notið þess um aldir alda.

Það ætti því ekki að koma ykkur á óvart, lesendur kærir, að ég hafi komist að því að sambandskafli minn, líkt og Biflían sjálf, hverfist um eina setningu sem bæði súmmerar upp efni verksins í heild sinni en vísar jafnframt útfyrir sig um leið. Því Biflían, og jafnvel hið kristna siðferði einsog það leggur sig, kristallast í einni setningu; Gullnu reglunni, sjá nánar hér.

Í skrifum mínum hef ég nefnilega komist að því að sambandskafli lífstílsbókar minnar, og hið sambandslega ástarsiðferði á milli karls og konu, kristallast einnig í einni setningu**. Hún er:

Vertu undirgefin, annars verður þú yfirgefin.

xoxo
-h

*Sambandskaflinn er ætlaður konum til aflestrar. Karlmenn þurfa, eðli málsins samkvæmt, aldrei að sýna undirgefni.

**Konur, ekki halda að þessi setning nægi ykkur til að þóknast karlmanninum í lífi ykkar.
Til þess að tryggja farsælt ástarsamband við karlmann þurfið þið að kaupa bókina mína.

lógósamkeppni og mögulegar breytingar mögulega í vændum

Hola lovers!

Mér var bent á að Tískubloggið vantaði lógó, en lógó er að sjálfsögðu bráðnauðsynlegt til að ná heimsyfirráðum, en það er náttúrulega á stefnuskránni þannig að ég ákvað að bæta úr þessu og blása til lógósamkeppni!

Einsog þið vitið er ég einstaklega hæfileikarík í hönnun (sem öðru) og skellti í eitt sjálf og það er að sjálfsögðu rosalega flott, en ég hef áhuga á að fá tillögur að lógóum frá aðdáendum mínum líka, og ef þátttakan verður góð höfum við kannski bara þjóðaratkvæðagreiðslu um þetta.

Vinsamlegast sendið tillögur ykkar á tiskublogg@gmail.com.

Glæsileg tillaga að lógói – þó ég segi sjálf frá.

Og svo að öðrum fréttum.

Tískubloggið fékk í gær æsispennandi tilboð um að færa sig yfir á ónafngreint vefrit, og gegn greiðslu meira að segja.

EN, þá fengi bloggið nýja slóð, sem mér þykir afar, afar miður, því vefslóðin http://tiskublogg.blogspot.com/ hefur frá upphafi verið helsta stolt og flaggskip Tískubloggsins.
Ég er því enn að bræða með mér hvort ég eigi að taka tilboðinu eða ekki.

Æh hvað finnst ykkur?

Endilega verið nú dugleg að kommenta og segið mér hvað ykkur finnst, lovers.

xoxo
-h

ÖPPDEIT

Ég er búnað föndra aðra útgáfu af lógóinu OG fá sendar 3 tillögur til viðbótar frá aðdáendum mínum, sem verða birtar síðar. Ég ætla engu að síður að birta mína eigin tillögu #2 nú, þó mikilfengleiki hennar gæti orðið til þess að einhverjir  þori ekki að senda sínar tillögur inn af hræðslu við að þær standist ekki samanburðinn. En ég vil hvorteðer ekkert tillögur frá soleiðs fólki þannig að hér er tillaga #2!

Verði ykkur að góðu.

kvenlegar sjónmælingar framtíðarinnar

Hola lovers,

Gamaldags, úrelt
sjónpróf

Einsog þið vitið kannski þá er framtíðin komin, og framtíðin hefur iðulega í för með sér ýmsar tækninýjungar. Á undanförnum árum hefur mikil framför átt sér stað á sjónarsviðinu, og ber þar helst að nefna næmari sjónmælingar, betri og léttari gler í gleraugum (nú er jafnvel hægt að fá þau með glampavörn, pælið í því) og að sjálfsögðu leiseraðgerðirnar sem hafa bjargað ófáum tískudrósum frá hræðilegum örlögum sem ógeðslegir gleraugnaglámar sem enginn nennir að hlutgera.

En þó er eitt sem hefur háð neytendum, og það er að augnlæknar og optikerar hafa verið með einokunarstöðu á sjónmælingamarkaðinum fram að þessu. En sem betur fer er það allt að breytast.

Fram hefur komið ný og byltingarkennd aðferð til sjónmælinga, þar sem konur nota brjóst sín til að mæla sjón karlmanna.

Sjálf hef ég prófað þessa aðferð á kærastanum með prýðisgóðum árangri, þó réttast sé að taka fram að fræðimenn deila um hvort að niðurstöður þær sem hljótast af rannsóknum kvenna sem ekki hafa stækkað brjóst sín með skurðaðgerð séu marktækar.

Svona virkar sjónprófið:

Mér skilst að það sé verið að sækja um einkaleyfi á sjónprófinu og fáist það virðist það nokkuð ljóst að konur (og transfólk) muni brátt gera optikera og augnlækna með öllu óþarfa.

En þá má að líkum leiða að öðrum konum verði gert að hylja barm sinn, til að skekkja ekki niðurstöður fagkvenna.

xoxo
-h

svona græðir Tískubloggið peninga!

Hola lovers,

Þið vitið eflaust flest að Tobba Marínós var ein helsta fyrirmynd mín í lífinu og bloggið hennar var raunar ein af ástæðum þess að ég stofnaði mitt eigið. En eftir að ég komst að því að hún var að reyna að bregða fyrir Tískubloggið fæti þá hætti hún að vera ædolið mitt.

En þó ég fegin vildi hætta að lesa bloggið hennar geri ég það ekki, því það er mikilvægt að fylgjast með samkeppnisaðilum sínum og stela góðum hugmyndum frá þeim þegar maður getur.

Einsog alþjóð veit þá sagði Tobba starfi sínu á Séð & heyrt nýverið lausu og hefur hafið störf sem kynningarfulltrúi Skjás eins. Bloggið hennar endurspeglar þessa flutninga hennar í starfi því hún hefur hafið lúmska auglýsingaherferð á blogginu þarsem hún kynnir dagskrá vetrarins. Sem dæmi mætti nefna þessar færslur hér og hér.

Þó hún sé ekki lengur fyrirmynd mín í lífinu verð ég að játa að mér finnst þetta býsna góð hugmynd hjá henni. Ég er alltaf að leita leiða til að koma auglýsingum að á bloggi mínu svo ég geti loksins farið að græða peninga á þessum skrifum, og ég held að hér séu miklir möguleikar.

Ég bar þetta undir styrktaraðila síðunnar og honum leist prýðilega á hugmynd mína og samþykkti að borga mér með gæludýrafóðri að andvirði sautjánhundruð króna ef mér tækist að lauma auglýsingu að lesendum mínum án þess að þeir gerðu sér grein fyrir því að þeir væru í raun að lesa auglýsingu.

Þar sem ég hef ekki reynt svo hárfín kænskubrögð í skrifum mínum áður ákvað ég að gefa styrktaraðila síðunnar afslátt, eða tvenn skrif fyrir ein.

Verði ykkur að góðu.

***

Nammi namm!

#1

Jahérna hér lovers! 

Þetta er ótrúlegt gæludýrafóður sem ég rakst á nýverið. Það er svo bragðmikið, stökkt og bráðnar í munni. 

Það er einsog humar fyrir ferfætlinga!

(Nema þeim finnst humar betri)

#2

Lovers,

Ég hef verið veik fyrir gæludýrafóðri síðan ég bjó í Stavanger og uppgötvaði hvursu dásamlegt það er í raun. Það er bragðmikið og ljúffengt án þess að þykjast vera eitthvað, svona svolítið einsog heimilisleg (og ódýr) kæfa. 

Þar sem ég er byrjuð að herða sultarólina fyrir jólin þá finnst mér óútskýranlega gott að kaupa gæludýrafóður. Það er einfaldlega miklu ódýrara en mannafæði og svo er það einstaklega umhverfisvænt líka, því í gæludýrafóðrinu er úrgangur dýraafurða sem annars yrði hent.

Verum góð við umhverfið og pyngjuna!

Borðum gæludýrafóður.

...jiiii hvernig ætli það sé?

***

xoxo

-h

Tískublogginu er umhugað um almannaheill og lýðræði

Þessvegna hefur Tískubloggið ákveðið að bjóða sig fram til stjórnlagaþings.

Tískubloggið á stjórnlagaþing! <<<< ÝTIÐ HÉR TIL AÐ STYÐJA FRAMBOÐIÐ!

xoxo
-h

mig langar í...

Bráðum kemur vetur. Þá er skammdegi. Í skammdeginu er myrkur, bæði á morgnana og á kvöldin (og á nóttunni, líka).

Í vetrarskammdeginu er tilvalið að kaupa sér fínan lampa og bregða svolítilli birtu á lífið. Mig langar í einhvern geðveikan, og get ekki valið á milli þessara hérna. Helst langar mig í þá ALLA.

Mig langar s.s. í...

Dachshund lampa.

Lífstykkja lampa.

Grænan ungbarnalampa.

Dildó lampa.

Jesú lampa.

Leggja lampa.

Anda lampa.

...ooog beikon lampa.

Hvernig ætlar ÞÚ að lífga uppá skammdegið heima hjá þér?

xoxo

-h

mig langar í...

Nú fer bráðum að koma haust. Og á eftir hausti kemur vetur, og á veturna frystir stundum. Þá getur myndast hálka sem hættulegt er að ganga í á flatbotna skóm.
Því er tilvalið að skóa sig upp fyrir veturinn og kaupa sér almennilega hælaskó með góðu gripi, og þumalputtareglan er sú að því hærri sem hællinn er, því betra er gripið í sólanum. Því hællinn virkar einsog einskonar mannbroddi svo þú nærð góðum stöðugleika í hverju skrefi.

Ég er aðeins búin að vera að windowsjoppa á netinu og mig langar mest í þessa:

Og ef ég ætti hest, þá myndi ég skóa hann svona fyrir veturinn:

...oooog ég veit að þessir eru ekki með háum hælum, en mig langar samt í þá:

xoxo
-h

mig langar í...

Þennan bol.

Þennan leðurjakka.

Þetta pils.

Þennan bol.

Svona hjálm.

Svona kjól.

Þessar stuttbuxur.

Og þennan bol.

xoxo
-h

mig langar í... háa hæla!

Hola lovers,

Ég var að lesa pistil eftir kollega minn hana Mörtu Maríu í gær. Og þar meitlaði hún svolítið sem ég hafði áttað mig á fyrir löngu, en aldrei komið almennilega í orð:
"Það deyr bara eitthvað þegar kona klæðir sig í flatbotna skó"

Ég segi amen við því, systir Marta María!

Í annarri frétt fjallar hún um átrúnaðargoð mitt hana Soniu Rykiel og vitnar í fleyg orð sem fatahönnuðurinn lét eitt sinn falla: "Hvernig er hægt að lifa hátt án þess að ganga á hælaskóm?", en það voru einmitt þessi orð hennar sem vöktu mig til vitundar um hversu lágkúrulegt líf mitt hafði verið allt fram að þessu.

Þessi færsla er því tileinkuð Mörtu og Soniu og öllum þeim konum sem kjósa að lifa hátt og neita að láta eitthvað deyja.

xoxo
-h

Loksins!

Ert þú orðin þreytt á því að vera þreytt í fótunum? Ert þú orðin þreytt á því að geta ekki gengið í svona fabjúlös skóm sökum sársauka?

Ég líka. 

Sem betur fer hefur fundist lausn á þessu leiðindamáli. Lýtalæknar hafa loksins tekið við sér og eru farnir að bjóða konum þá sjálfsögðu þjónustu að skera af þeim tær og önnur óþarfa smábein, gegn vægu og sanngjörnu gjaldi. Það er meira að segja hægt að fara í fitusog og láta svo sprauta henni í annaðhvort hæl eða táberg. Jeij endurvinnsla!

Nokkur dæmi um fótsnyrtingarmöguleika.

Eiginlega skil ég ekki hversvegna engum hefur dottið þetta í hug fyrr. Því fyrst að fæturnir passa ekki í skóna, þá þarf greinilega að gera eitthvað í málunum. Og það er ekki einsog þetta sé ný hugmynd. Systur hennar Öskubusku fengu svipaða hugdettu og svo eru Kínverjar náttúrulega búnir að stunda fótsnyrtingar frá örófi alda. 

Annars skil ég ekki afhverju kínverskar konur eru hættar að reyra á sér fæturna. Skórnir voru svo gjöööðveikir:

Tískan fer í hringi. Beauty is pain - Deal with it.

xoxo

-h