sönnun á því að karlar eru áhugaverðari og hæfileikaríkari en konur í 84,6% tilvika

Hola lovers,

Ég veit ekki hvursu vel þið fylgist með í fjölmiðlaheiminum, en nú nýverið tók nýr ritstjóri til starfa á Monitor. Hann skrifar lítinn pistil í nýjasta tölublaðinu þarsem hann kveður forvera sinn í starfi og kemur svo með svolitla yfirlýsingu sem mætti túlka sem ritstjórnarstefnu, en hann skrifar að hann ætli að „gera áhugaverðu hæfileikafólki hátt undir höfði“.

Það þykir mér verðugt markmið og það gleður mig líka að í þessu tölublaði rennir hann stoðum undir þá kenningu sem ég hef lengi haft um að karlar séu sannarlega miklu hæfileikaríkari og áhugaverðari en konur.

Og ef eitthvað er að marka blaðið þá eru karlar áhugaverðari og hæfileikaríkari en konur í nákvæmlega 84,6% tilvika.

Ég fór í gegnum blaðið og taldi andlit á myndum. Þau eru 52 talsins. 44 þeirra eru karlmannsandlit og 8 þeirra eru kvenmannsandlit (og þar af er reyndar fjórðungur, eða 2 myndir, auglýsingar).

Hlutfallið í myndbirtingu Monitor er því eftirfarandi:

Karlar: 84,6%
Konur: 15,3%

Og það segir líka sitt um gjörvuleika kvenna að þau tvö viðtöl við íslenskar konur sem finna má í blaðinu snúast hvorki um hæfileika þeirra né gjörðir, heldur um smekk þeirra og neytendahegðun.

Ykkur til glöggvunar birti ég hér síður blaðsins, með talningu minni. Ég sleppi því að birta síður þarsem engin andlit er að finna.

xoxo
-h

betra er seint en aldrei - fegrunarpistill fyrir Hernaðarandstæðinga

Hola lovers,

Fyrir ógeðslega löngu þá var ég beðin um að skrifa fegrunarpistil fyrir tímarit Hernaðarandstæðinga. Ég ætlaði að vera búin að birta hann fyrir löngu en gleymdi því.

En hér kemur hann núna. Afsakið biðina.

***

Hola lovers,

Ég er helsti sérfræðingur landsins í fegrunum, megrunum og tísku, og var því beðin um að leiðbeina ykkur um fallegt útlit og hvernig á að vera töff. Ég ákvað að taka þessari áskorun, þó ég telji að það séu afar litlar líkur á árangri (ég hef séð myndir af ykkur).

Rakaðu af þér skeggið.

Ég vil byrja á því að hreinsa loftið og segja ykkur sannleikann; Það er ekki í tísku að vera hernaðarandstæðingur.
Því herir eru töff. Hermenn og -konur fá að vera í töff búningum með töff hárgreiðslu og þau fá að vera með töff byssur, þau fá að vita ýmis töff hernaðarleyndarmál á undan almúganum og herir skilja flestir homma og lesbíur útundan, sem er töff.

Það eru líka gerðar töff bíómyndir um hermenn og -konur þarsem þau bjarga litlum gyðingabörnum, vingast við flækingshunda í Írak og finna falleg lótusblóm í daunillum fenjum Víetnam.

Og ef hernaðarandstæðingar og her færu í slag þá held ég að við vitum öll hver myndi vinna.
Aukinheldur skemmdi það mannorð ykkar mikið þegar þið voruð á móti veru Bandaríkjahers hér á landi. Því það er ekkert minna í tísku í öllum heiminum en að vera á móti Bandaríkjunum, afþví að bandarísk þjóð er besta þjóð í heimi, afþví að Bandaríkjamenn fundu uppá Baconnaise.

Þannig að ef þið viljið vera töff er fyrsta ráðlegging mín til ykkar því að hætta að vera hernaðarandstæðingar.

Ef þið getið ekki hugsað ykkur að hætta því þá er það skásta í stöðunni að hætta að minnsta kosti að líta út einsog hernaðarandstæðingar og vona að enginn komist að þessari annarlegu hneigð ykkar.

Svona farið þið að því:

• Klippið af ykkur dreddana.
• Farið í bað.
• Notið sápu sem er ekki með umhverfisvottun og sem inniheldur mikið af lyktar- og litarefnum.
• Farið í hrein nærföt (ef þið eigið þau yfir höfuð til).
• Hendið öllu úr skápnum ykkar sem er úr hör eða hampi. Flíkur sem eru í karrígulum, heiðbláum, rústrauðum eða mosagrænum litum skal einnig henda. Heimasaumaðar flíkur skulu fara sömu leið.
• Hendið öllum flíkum sem á stendur Free Tibet.
• Hendið öllum flíkum sem eru með mynd af Che Guevara.
• Hendið varasalvanum ykkar.
• Klæðið ykkur í það sem þið finnið í skápnum sem líkist helst klæðnaði venjulegrar manneskju og farið í verslunarleiðangur í verslunarmiðstöð (það er bannað að fara á Laugaveg eða Skólavörðustíg).

Innkaupalistinn:

Snyrtivörur sem innihalda mikið paraben. Þetta er hið allra nauðsynlegasta sem allir þurfa að eiga: dagkrem, næturkrem, síðdegiskrem, augnkrem, svitaholukrem, meik, púður, hyljari, augnskuggi, augnblýantur, eyeliner, undirmaskari til að þykkja augnhár, maskari, sólarpúður, kinnalitur, varablýantur, varalitur og gloss. (Ath. að þessi listi er ekki tæmandi)

Leggingsbuxur með tígrisdýramynstri. (Eða leggings úr alvöru tígrisdýri, ef þið hafið efni á því (eða úr einhverju meira töff dýri sem er í enn meiri útrýmingarhættu, einsog ísbirni (eða górillu)))

Latexgalli með hönskum og hettu.

Sjampó með miklum aukaefnum og helst í bleikum eða fjólubláum umbúðum. Hárnæring, djúpnæring, hárkrem, hársprey og vax úr sömu línu.

Spegill.

Hárbursti.

Augnháraplokkari.

Rakvél.

PC-fartölva frá þýskum framleiðanda sem hagnaðist á dularfullan hátt á tímum seinni heimsstyrjaldar.

Kaffi sem er ekki Fair Trade.

Þrennar blúndunærbuxur.

Farið síðan í dýrustu búðina á svæðinu, bendið starfsmanni á eina gínu og segið: „Ég ætla að fá allt sem hún er í í minni stærð“.

Farið í aðra búð og endurtakið leikinn.

Farið í þriðju búðina og endurtakið leikinn.

Farðu í klippingu.

Þessi aðferð er ykkur nauðsynleg, því þið kunnið ekki að klæða ykkur einsog venjulegt fólk. Svona getið þið feikað það. Munið bara að taka mynd af gínunni (eða rissa hana upp, því ég efa að þið eigið farsíma með myndavél) svo þið vitið hvernig þið eigið að raða flíkunum saman þegar heim er komið. Ég ráðlegg ykkur einnig að biðja afgreiðslufólkið í búðinni að númera fyrir ykkur flíkurnar svo þið vitið í hvaða röð þið eigið að fara í þær.

Þegar heim er komið mæli ég með því að þið farið síðan á internetið í nýju tölvunni ykkar og skoðið myndbönd af því hvernig á að nota snyrtivörurnar sem þið keyptuð ykkur. Ef þið eigið þess kost skuluð þið einnig reyna að vingast við venjulega manneskju sem hefur töff skoðanir og fylgjast grannt með því hvernig hún klæðir sig, snyrtir og hegðar sér í daglegu lífi.

Þið skuluð einnig lesa daglega ráðleggingar mínar á Tískublogginu, tiskublogg.blogspot.com.

xoxo
-h

samskiptavandræði kvenna

Hola lovers,

Stundum kemst ég ekki hjá því að heyra fréttir, þó ég reyni yfirleitt að forðast þær. Og ég komst ekki hjá því að heyra af franska ólívubóndanum sem var handtekinn í New York um daginn. Ennfremur las ég á einhverju femínistabloggi (sem ég les afþví maður þarf að þekkja óvininn) að fólk talar um að hann hafi nauðgað, eða reynt að nauðga, konu.

Ég vil fá að leiðrétta þennan misskilning.

Það er ekki hægt að nauðga konu, einfaldlega afþví að það er ekki til neitt sem heitir nauðgun. Því þótt það séu viðtekin sannindi að karlmenn eigi að hafa óheftan aðgang að líkömum kvenna öllum stundum og það sé ekkert í heiminum verra en að neita karlmanni um kynlíf, þá hefur þetta orð með einhverjum óskiljanlegum hætti ratað inn í mál okkar (ég hef femínistana grunaða) án þess þó að sá verknaður sem það á að lýsa eigi sér stoð í raunveruleikanum. Orðið nauðgun skipar sér því á bekk með orðum einsog einhyrningur, dreki, hafmeyja og kentár, sem öll eru orð yfir ímynduð fyrirbæri, en hafa þó skotið svo sterkum rótum í menningu okkar í gegnum skáldskap, að flestir telja sig geta borið kennsl á fyrirbærið sem orðið á að lýsa yrði það einhverntímann á vegi þeirra, þó að í raunveruleikanum sé slíka veru hvergi að finna.

Raunveruleikinn.

Túlkun einmana sjómanna á raunveruleikanum.

Ég held nefnilega að fólk rugli saman nauðgun og meintri nauðgun, rétt einsog sjómenn forðum sáu svamlandi sækýr en einmanaleikinn villti þeim sýn svo þeir þóttust sjá limafagra snót stinga sér í gegnum öldurnar og kölluðu hafmeyju. En meint nauðgun er þegar kona misskilur meiningar karlmanns eða meinar honum aðgang að líkama sínum að ósekju. Dæmi um meinta nauðgun er t.d. þegar karl ætlar einfaldlega að hrósa konu svolítið fyrir fagran líkamsvöxt með því að fletta hana klæðum til að skoða hann betur, eða með því að stinga svolítið í hana typpinu, og hún bregst ókvæða við og ætlar að honum hafi gengið eitthvað illt til.

En spyr maður um leyfi áður en maður hrósar fólki? Nei.

Konan misskilur einfaldlega meiningar mannsins og ætlar honum einhvern annan vilja en hið saklausa athæfi lýsir. Konan gerist þannig sek um ætlanarökvillu (e. intentional fallacy) og meinar manninum aðgang að líkama sínum og gerir honum einnig upp ímyndaðar meiningar, og þannig er um meinta nauðgun að ræða.
Þetta er einföld orðsifjafræði, lovers.

En þessar meintu nauðganir geta haft alvarlegar afleiðingar fyrir menn, og ferla þeirra, einsog nýleg dæmi hafa sýnt. Og það er í raun sárara en tárum taki að vandaðir menn skuli geta lent í því að einstæð móðir í Bronx geti tekið það upp hjá sjálfri sér að eyðileggja blómlegan feril þeirra, einfaldlega afþví að hún þjáist af ætlanarökvillu, þannig að einföld samskiptavandræði þeirra eru blásin upp í fjölmiðlum.

Ég tel það sé afar einföld skýring á þessu tiltekna dæmi. Hann er franskur, hún er bandarísk. Þau tala ekki sama tungumálið = samskiptavandræði.

[Og þið sem viljið meina að það sé í alvörunni til eitthvað sem heitir nauðgun; Ég mæli með því að þið prófið að skoða fjölmiðla og athugið hvort þar sé oftar rætt um nauðganir eða meintar nauðganir. Og munið svo að fjölmiðlar endurspegla heiminn einsog hann raunverulega er, en ekki einsog þið viljið að hann sé.]

 

xoxo
-h

kynslóðabil, konur og gullhamrar

Hola lovers,

Ég vil taka hjartanlega undir með Snorra Bjarnvini, en í nýlegri grein þá syrgir hann ákaft þá tíma þegar það þótti sjálfsagt og eðlilegt að karlmenn slægju konum líkamlega gullhamra með því að þukla á þeim líkamsparti þeirra sem vakti sérlega aðdáun þeirra þá stundina.

Þetta var, einsog Snorri segir, áður en konur breyttu mönnum í konur og menn fengu enn að vera menn.

Það er í raun með ólíkindum að það hafi ekki fleiri en Snorri veitt þessari þróun einhverja andspyrnu. Það er einnig ótrúlegt hvernig samfélag okkar hefur flotið sofandi að feigðarósi. En ég tel að það sé orðið of seint að snúa þessari þróun við úr þessu og því stöndum við nú skyndilega frammi fyrir þeirri staðreynd að menn eru flestir orðnir að konum og munum brátt tilheyra heilum kynstofni kvenna.

Faðir Snorra er af þeirri kynslóð þegar menn voru ennþá menn. Snorri er af kynslóð karla sem kvenfólk hefur breytt í konur.

Og ef hann er samkvæmur sjálfum sér þá treysti ég því að honum muni því líka þeir gullhamrar sem honum verða slegnir á afturendann í framtíðinni af kynslóð föður síns.

xoxo
-h

Þessir hamrar eru ekki gylltir.

inspirational kvót dagsins - eða enn frekari sönnun þess allar mæður heimsins eru í raun einstæðar

"Þær mæður sem hafa of mikið að gera þurfa aðstoð frá leikskólum, ömmum, barnapíum, ræstitækni o.s.frv. til að geta hvílst, endurnærst og komið jafnvægi á líf sitt."

-Melkorka Kristinsdóttir, í greinni Ofhjálparar á Bleikt.is.

[Kvót dagsins rennir annars enn frekari stoðum undir þá kenningu mína sem ég hef viðrað áður hér á blogginu, um að allar mæður heimsins séu í raun einstæðar, því þegar kemur að því að halda heimili og ala upp börn eru karlmenn sannarlega verri en enginn.]

xoxo
-h

mæður landsins

Hola lovers,

Var ég ekki löngu búin að segja ykkur að það sökkar að eignast börn? Ég þurfti a.m.k. ekki að hugsa mig um tvisvar þegar ég ákvað að fara í legnám.

Og nú kemur í ljós að mæður mega ekki einusinni drekka með formlegum hætti hérna á Íslandi.

Ég tek bara undir orð Þóru Sigurðardóttur, blaðakonu á Pressunni:

"Nú er bara að bíða eftir að vínið fáist í ÁTVR þannig að mæður geti formlega farið að fá sér í glas."

Því eitthvað verða þessir aumingjar að hafast við á milli þess sem þær skipta um kúkableyjur, setja í þvottavél og láta sig dreyma um fitusog á meðan maðurinn þeirra heldur framhjá þeim.

xoxo
-h

Það er ekkert helvítis mömmuvín á borðum á mínu heimili.

bjargvætturinn í gáttinni

Hola lovers,

Þið vitið ekki hvað það fyllir mig mikilli gleði, elsku konur, að fá að benda ykkur á eftirfarandi grein, og það á þessum degi, af öllum dögum!

Því sjá, ég boða ykkur mikinn fögnuð, sem veitast mun öllum lýðnum, því yður er í dag frelsari fæddur, sem heitir Ágúst Halldórsson og skrifar á Bleikt.is. Og að grein hans Flíspeysa = enginn karlmaður, skuli birtast nú á páskum, þegar Jesúm sjálfur fórnaði sér svo við syndararnir gætum óhikað gengið inní guðsríki, er sko alls engin tilviljun.

Flísefni: 100% pólýester - 100% óhamingja

Þið getið rétt ímyndað ykkur gleði mína, þegar ég rakst á greinina á Blogggáttinni, ýtti á linkinn, las og upp rann fyrir mér ljós: Hér er bjargvættur allra kvenna ljóslifandi kominn!

Líktog Jesúm hikaði ekki við að umgangast hórkvendi, holdsveikisjúklinga og farísea, teygir Ágúst fram ástúðlega arma sína til þeirrar allra fyrirlitlegustu í okkar þjóðfélagi; flíspeysuklæddu konunnar. Og í stað þess að dæma hana sýnir Ágúst ást og skilning þegar hann umvandar hana af ákveðni og festu og bendir henni föðurlega á villu síns vegar. Líktog Jesúm vissi forðum, þá veit hann að flíspeysuklædda konan vill í hjarta sínu vel, en sökum hirðuleysis, leti og sjálfsbirgingsháttar þá hefur hún syndgað gegn karlkyninu.
Og syndir flíspeysuklæddu konunnar eru margar:

• Hún málar sig á föstudögum og laugardögum.
• Hún vaknar á sunnudögum.
• Hún skellir sér í íþróttabuxur og flíspeysu.
• Hún lyftir upp hárinu í flýti og setur í teygju.
• Hún klæðir sig jafnvel svona í vinnunni, komist hún upp með það.
• Hún gerir sér ekki grein fyrir því að fegurðin er það fyrsta sem hún fær frá náttúrunni, en fegurðin er einnig það fyrsta náttúran tekur frá henni.
• Hún giftist.
• Hún bætir á sig.
• Hún klæðir sig í íþróttagalla.
• Hún hættir að sjá um sig líkamlega.
• Hún klæðist Cintamani-peysu.
• Hún klæðist bleikum náttbuxum.
• Hún er með töff klippingu.
• Hún undrast að maður hennar taki að sækja á önnur mið.

En afhverju telur Ágúst þessar syndir upp? Afhverju skrifar hann pistilinn? Afhverju leyfir hann syndurunum ekki að hírast flíspeysuklæddum og kokkáluðum í forarvilpru syndar sinnar?

Því Ágústi stendur ekki á sama. Hann vill "koma því á framfæri að það er ekkert samasem merki fyrir konu að þegar hún er annað hvort gift eða trúlofuð að þær megi bæta á sig, klæða sig í íþróttagalla og hætta að sjá um sig."

ÁSJÓNA SYNDARINNAR

Og Ágúst er maður orðsins. Hann hefur unun af því að hlýða á rökfimi og orðaskak jafningja, en hin flíspeysuklædda kona mun alltaf verða undir í rökræðum, og þarmeð svipta hann ánægjunni af því að hlýða á óratoríska snilld, því "kona sem hefur haft sig til hefur mikla yfirburði í samræðum við aðrar konur sem eru ekki eins glæsilegar til fara".

Og afhverju er hin flíspeysuklædda kona fyrirfram dæmd til þess að bera skarðan hlut frá borði í samræðum við kynsystur sínar? Því "ekkert [er] konum eðlislægra en að finna kvenlega veikleika annarra kynsystra sinna og níðast á þeim". Og Ágúst er ennfremur "þeirrar trúar að það sé ekki til grimmara dýr í heiminum en kona þegar hún ætlar að ná sínu fram, hvort svo sem það sé af hefndarhug, deilum eða einbeittum brotavilja".

Pistlinum lýkur Ágúst svo á örlítilli hugvekju, sem mér finnst réttast að deila með ykkur án nokkurra málalenginga af minni hálfu, til að tryggja að orð mín saurgi ekki þann kristaltæra sannleik sem niðurlag hans geymir.

Þessi flíspeysa getur verið þröskuldur þess hvort þú lifir hamingjusömu lífi með fjögurra manna fjölskyldu í Garðabænum eða leigir kjallaraíbúð í Breiðholtinu þar sem þú lifir þínu innihaldslausa lífi nema um helgar þegar þú dustar rykið af kynþokkanum og ferð á veiðar innan um sauðdrukkna einstaklinga.

Látið ekki flíspeysuna skemma líf ykkar.

Svo mörg voru þau orð.

Ég get ekki annað en sagt takk, Ágúst, bjargvættur minn. AMEN.

xoxo
-h

Biflía Tískubloggsins, eða hin nýuppgötvaða gullna regla ástarsambands á milli manns og konu

Hola lovers,

Ég er um þessar mundir að skrifa sambandskaflann* í lífstílsbók minni. (Og mér finnst notabene réttast að upplýsa ykkur um nýjan vinnutitil. Hann er ekki lengur Lífstíllinn: Megranir, tíska, Bob & beikon, heldur ákvað ég í samráði við útgefendur mína að vera ögn óræðari og mínímalískari (því það er í tísku) og núverandi vinnutitill er því einfaldlega Hola, lovers.)

Ég myndi ekki ganga svo langt að segja að sambandskaflinn hafi beinlínis vafist fyrir mér, en flestir vita að sambönd eru flókin. En þau eru jafnframt lífsnauðsynleg öllum sem ætla að koma sér á framfæri og öðlast góða stöðu í lífinu.

Um þau gilda margar, flóknar og óskrifaðar reglur. Mér vitanlega hefur enginn reynt að festa þær niður á blað áður og því er ég sannarlega að vinna frumkvöðlaverk fyrir mannkynið einsog það leggur sig (að ógleymdum mannfræðingum framtíðarinnar (sem munu vafalaust þakka mér óeigingjarnt starf mitt og hafa nafn mitt í hávegum löngu eftir að daga mínir eru taldir (og ef ég verð heppin munu þeir jafnvel nefna gallabuxnategund í höfuðið á mér (einsog þeir gerðu fyrir annan (og síðri) mannfræðing)))) og raunar er það hin mesta hneisa að mér hafi ekki að fyrrabragði verið boðin ritlaun í síðustu úthlutun Launasjóðs íslenskra blogglistamanna.

En í sambandskaflanum fjalla ég einnig töluvert um ástarsambandið á milli manns og konu. Það er víðfemt efni og sannarlega af mörgu að taka. En þarsem ég er ekki að frumsemja efnið, heldur er ég, einsog ég nefndi hér að ofan, að rita niður áður óskrifaðar samfélagsreglur, þá vil ég síður líta á mig sem höfund þessa kafla. Hlutverk mitt er frekar í átt við loftnet sem fangar ósýnilegar bylgjur andrúmsloftsins (sem eru þrátt fyrir allt til staðar, þó þið auðnuleysingjarnir komið ekki auga á þær) og þýðir þær yfir í ómþýða tóna í útvarpstæki; yfir í eitthvað sem jafnvel almúgamaður eða -kona fær skilið.

Eiginlega mætti líta á kaflann sem Biflíuna sjálfa, og mig sem Móses (þó ég hefði aldrei klæðst svona ógeðslegum kufli ótilneydd), en hann fann einmitt steintöflurnar með guðs orði og færði þær niður af fjallinu, og til fólksins. Eða, svo ég noti aðra myndlíkingu (sem þið skiljið kannski betur); Ég er líktog hinn nafnlausi ritari sem festi guðs orð niður á bókfell, svo fólk gæti notið þess um aldir alda.

Það ætti því ekki að koma ykkur á óvart, lesendur kærir, að ég hafi komist að því að sambandskafli minn, líkt og Biflían sjálf, hverfist um eina setningu sem bæði súmmerar upp efni verksins í heild sinni en vísar jafnframt útfyrir sig um leið. Því Biflían, og jafnvel hið kristna siðferði einsog það leggur sig, kristallast í einni setningu; Gullnu reglunni, sjá nánar hér.

Í skrifum mínum hef ég nefnilega komist að því að sambandskafli lífstílsbókar minnar, og hið sambandslega ástarsiðferði á milli karls og konu, kristallast einnig í einni setningu**. Hún er:

Vertu undirgefin, annars verður þú yfirgefin.

xoxo
-h

*Sambandskaflinn er ætlaður konum til aflestrar. Karlmenn þurfa, eðli málsins samkvæmt, aldrei að sýna undirgefni.

**Konur, ekki halda að þessi setning nægi ykkur til að þóknast karlmanninum í lífi ykkar.
Til þess að tryggja farsælt ástarsamband við karlmann þurfið þið að kaupa bókina mína.

fjármunir karlmanna og hjól atvinnulífsins

Hola lovers,

Einsog þið vitið þá er ekkert minna sexí en kona sem hefur áhuga á stjórnmálum. Ég er alltaf meðvituð um að hámarka kynþokka minn á öllum stundum (sem er ein af ástæðunum fyrir því að ég sef alltaf í sokkaböndum og með varalit (hinar eru persónulegar og ég vil síður deila þeim á alnetinu)) og því reyni ég eftir fremsta megni að forðast fréttir og umræður um stjórnmál. En sum mál eru bara svo hávær að umræðan um þau smitast jafnvel inná lífstílssíður og tískublogg (sem er það eina sem ég les á netinu) og svo maður tali nú ekki um Facebook. Dæmi um pólitísk málefni sem maður tekur nánast upp með osmósu er þetta Icesave (sem ég hef gert mér far um að skilja ekki (sem er erfitt, því það er svo ógeðslega einfalt (og ég er svo gáfuð))).

Annað dæmi um pólitískt málefni sem mér hefur ekki tekist að forðast er niðurskurður hjá ríkinu, og sorrí lovers, en ég bara get ekki annað en haft skoðun á því. Ég geri mér grein fyrir því að með því að hafa skoðun á þessu máli þá er ég mögulega að traðka á brothættri sjálfsmynd einhverra karlmanna (með því að hafa skoðun) og ég mun líklega missa þónokkuð af kynþokka mínum í ykkar augum (get ég bætt ykkur þetta upp með því að birta mynd af kloflausu nærbuxunum mínum?), en ég get bara ekki á mér setið.

Nýverið voru birtar upplýsingar um að fækkað hafi verið um 540 stöðugildi hjá ríkinu í niðurskurði í kjölfar kreppunnar. Þar misstu 470 konur atvinnu sína og 70 karlar. Einnig er áformaður mikill niðurskurður í leik- og grunnskólum, en þar starfa að mestu konur.

Á sama tíma eru uppi áform um að ríkið fara út í dýrar framkvæmdir til að „koma hjólum atvinnulífsins í gang“ og búa til störf handa karlmönnum í byggingariðnaði.

Ég fagna þessari þróun ákaft. Því einsog og þið vitið er sjálfsmynd karlmanna ákaflega brothætt, og séu þeir mjög lengi án atvinnu verður sjálfsmynd þeirra afar löskuð og getur jafnvel orðið fyrir varanlegum skaða. Konur aftur á móti skilgreina sig ekki út frá starfi sínu, stöðu eða menntun, heldur er það útlit þeirra, hjúskaparstaða og þyngd sem mótar þeirra sjálfsmynd. Af framansögðu ætti því að vera dagljóst að störf karlmanna eru mikilvægari en störf kvenna, og það gleður mig að stjórnvöld skuli gera sér grein fyrir því.

Einhverjir hafa bent á að ríkið sé, með því að skera niður í heilbrigðiskerfi á sama tíma og dýrar framkvæmdir eru áformaðar, einungis að færa fé úr einum vasa í annan, en það er allsendis ósatt.

Það sem þarf að einblína á núna er að koma samfélaginu í gang aftur eftir hrunið. Til þess þarf að dæla peningum út í samfélagið með því að skapa atvinnu svo fólk fái laun, geti borgað af lánunum sínum og geti keypt vörur eða þjónustu, sem svo aftur skapar meiri atvinnu o.s.frv. Og það er löngu vitað að þeir peningar sem karlar fá greidda eru miklu betri en þeir peningar sem konur hafa á milli handanna. Peningar úr karlmannsveski eru miklu meira atvinnuskapandi en peningar úr kvenmannsveski, og fjármunir karlmanna koma hjólum atvinnulífsins fyrr og betur í gang en það fé sem kvenfólk aflar.

Þess vegna eru aðgerðir ríkistjórnarinnar nú hárréttar.

xoxo
-h

Og hér, svo ykkur finnist ég aftur sexí, fáið þið að sjá kloflausu nærbuxurnar mínar (myndin er tekin áður en ég klippti gatið).

þegar gæludýrafóður bjargaði ástinni, og mér

Hola lovers,

Hef ég nokkuð sagt ykkur frá því þegar gæludýrafóður bjargaði ástinni, og mér?

Nei?

Jæja, ég geri það seinna. Klukkan er nefnilega orðin margt.

xoxo
-h

brothætt sjálfsmynd karlmanna

Hola lovers,


Ég vona að þið afsakið bloggleysið, en sannleikurinn er sá að ég hef verið iðin við að skrifa lífstílsbókina sem kemur út í haust, og það er bara þannig að þegar maður hefur mikið að gera við að raka sig að neðan, blogga, skoða sig í spegli og skrifa bók þá verður bara eitthvað undan að láta og því miður var það bloggið (afþví ég kann að forgangsraða).

En í lífstílsbókinni fjalla ég einmitt töluvert um brothætta sjálfsmynd karlmanna og varð því glöð þegar ég rakst á þessa grein, því höfundur hennar er á svipuðum slóðum í hugvekju sinni og ég er í minni lífstílsbók.

Því þó karlmenn séu nær undantekningarlaust sterkari, gáfaðri og hæfileikaríkari en kvenfólk, þá eru engu að síður dæmi um það að sjálfsmynd þeirra sé í öfugu hlutfalli við atgervið.

Og þá kemur það í hlut kvenna að taka saman höndum og styrkja hana.

Hún Klara Egilson hittir nefnilega naglann á höfuðið í grein sinni þegar hún skrifar: „Þú mátt aldrei vera sterkari en hann. Það gerir bara lítið úr manninum.“

Eiginlega er það sárara en tárum taki að hún finni sig knúna til að leggja áherslu á þessa staðreynd sem ætti að vera viðtekin sannindi, en ætli það að hún telji þörf á því að taka þetta sérstaklega fram sýni ekki bara að enn er rík ástæða til að brýna þetta fyrir ungum og óreyndum konum sem hafa ekki fengið nægilega gott uppeldi (og við þurfum að horfast í augu við þá nöturlegu staðreynd að því miður eru til stúlkubörn sem eru aldar upp af geðsjúkum einstaklingum sem innræta þeim annan og verri hugsunarhátt (en ég bið ykkur að hafa í huga að ekki er við stúlkurnar sjálfar að sakast, heldur foreldra þeirra (og að vissu leyti samfélagið (og þar með okkur sjálf, fyrir að láta þennan ósóma sem femínisminn er viðgangast (þannig að lítið í eigin barm, áður en þið dæmið))))).

En styrkur felst í ýmsu, s.s. ósérhlífni, hæfileikum, heiðarleika, hárri stöðu, gáfnafari, kímnigáfu og svo mætti lengi telja. Það er því óhætt að slá því föstu að í greininni hafi Klara ekki eingöngu átt við líkamlega yfirburði og því má heimfæra tilvitnunina í Klöru yfir á flest allt sem jákvætt má telja í fari manneskju.

Ég finn mig knúna til að leggjast á sveif með Klöru og brýna eftirfarandi fyrir kynsystrum mínum, og sérstaklega saklausum fórnarlömbum kvenrembunnar (femínismans):

Konur skulu ávallt gæta þess að vera ekki gáfaðri, hæfileikaríkari, heiðarlegri, fyndnari eða hærra settari en karlmenn í kringum þær, og fyrir alla muni skulu þær forðast að vera með hærri laun en þeir.

Því það gerir bara lítið úr manninum.

xoxo
-h

Að líta vel út í rúminu - gestapóstur

Hola lovers,

Loksins sendir hún Fanney Mangó, kynlífsbloggari með meiru, inn annan gestapóst.

Það var sko tími kominn til að einhver tæki á þessu brýna málefni.

xoxo
-h

***

Hvernig á að líta vel út í rúminu?

Þessi spurning var borin upp í athugasemdakerfi Tískubloggsins fyrir skömmu og ýmsar hugmyndir fóru undir eins að hringsnúast í kollinum á mér. Ég hef auðvitað ekki þurft að hugsa út í slíkt áður, enda kemur þetta náttúrulega hjá mér, en það er einmitt ástæða þess að ég ætti að setjast niður og greina mitt útlit í bólinu til að deila með öðrum konum sem ekki fæddust bólfagrar.

Ég komst að þessari niðurstöðu:

1. Klæðaburður: Fötin skipta mestu máli. Nema auðvitað að tæknin „the naked man“ sé notuð en hún er vinsælust meðal ómyndarlegra manna og virkar hún í þriðja hvert skiptið.
Konur geta einnig notað þessa tækni en þess má geta að hlutfallið hækkar því ófríðari sem viðfangsefnið er. Þess vegna er kjörið fyrir konur sem tæla ófríða menn að koma þeim að óvöru og fara úr öllum flíkum þegar litlar líkur eru á drætti. En fyrir ykkur sem viljið tæla fríðari menn þá þurfið þið fyrst og fremst að huga að klæðaburðinum. Þetta á líka við um konur í sambandi því þær eiga það til að hætta að klæða sig upp fyrir karlinn sinn og fara að sofa í kynþokkalausum fötum líkt og víðum bómullarstuttermabol og of stórum flannelbrókum eða jafnvel með tannréttingagræjur!
Þetta gengur auðvitað alls ekki. Ég fer ekki einu sinni að sofa án sokkabanda. Þó eru til mun þægilegri kostir en sokkabönd. Með skærum einum saman er til dæmis hægt að klippa göt fyrir brjóstin eða jafnvel klippa klofið af brókunum. Það er bæði sexí og pör geta prufað eitthvað nýtt í svefnherberginu.

2. Appelsínuhúðina burt: Enginn vill sofa hjá konu með appelsínuhúð. Til eru margar aðferðir til að losna við þetta leiðindafyrirbæri og hefur Tískubloggið áður og jafnvel óafvitandi gefið upp þær aðferðir sem mínar vinkonur telja að virki best.

• Hreyfing. Tískubloggið talar um hreyfingu, sjá hér. Ég tala um hreyfingu, sjá hér.
• Hrukkueyðir, sjá hér. Kreminu smyr maður á lærin og loka svo fyrir oxun þess með því að vefja álpappír utan um lærin og plastfilmu utan um álpappírinn.
• Náttúrulegt ávaxtafreyðibað, sjá hér.

Á hverjum áratugi missir kona 4 kíló af vöðvum og bætir á sig 16 kílóum af fitu auk þess sem ytra lag húðarinnar þynnist til muna. Vegna þessa versnar appelsínuhúðin með aldrinum. Þess vegna hvet ég allar þær vísindakonur sem þetta blogg lesa að einbeita sér að uppfinningu lífselexírsins. Með honum haldast lærin fersk.

En ef þið hafið ekki tíma fyrir þetta, eigið jafnvel von á næturgesti í kvöld, þá mæli ég með því að leggja lærin ofan í heitt kaffi.

3. Brjóst. Já. Need I say more?

4. Stellingar. Hér hef ég flokkað nokkrar vinsælar stellingar eftir hversu vel líkami kvenmannsins birtist manninum:

Líkamspartar í jákvæðum hlutföllum:

• Fasti trúboðinn (brjóstin eru nálægt honum og virka því stærri)
• Hot Seat (ef hún er ljót)
• Dirty dangle (fyrir ljóta líkama en falleg andlit)
• Skemmtun í vinnunni (ef hún er ljót)
• Ílegg (hún virkar mjó)

Líkamspartar í neikvæðum hlutföllum:

• Hún ofan á (ef brjóstin eru skökk)
• Hundabað (rass nálægt honum og virkar því of stór)
• Kóngulóarvefurinn (brjóst síga í aðra áttina og lærin eru í röngum hlutföllum)
• V (algjört bann fyrir konur með feita ökla)
• Álegg (höfuð hennar er of langt í burtu og því eru rasskinnarnar of stórar í hlutfalli við það)

Ást og kynlíf,
Fanney Mango

Leggðu þitt af mörkum fyrir þjóð þína og sængaðu hjá pólitíkus

Hola lovers,

Hérna er pistill sem ég skrifaði fyrir Lýðskrum í síðustu viku.

***

Þegar ég var beðin að skrifa pistil fyrir pólitískt þenkjandi vefrit voru fyrstu viðbrögð mín þau að ég yrði að sjálfsögðu að harðneita. Því einsog þið vitið þá er ég besti tísku- og lífstílsbloggari sem Ísland hefur alið (og held úti besta megrunar-, lífstíls- og tískubloggi sem ritað hefur verið á íslenskri tungu á), og þið vitið væntanlega líka að það er bara ljótt og leiðinlegt fólk sem fer útí pólitík, og ástæðan fyrir því að þetta fólk leitar í stjórnmál er að stórum hluta sú að þau geta ekki fengið neina alvöru vinnu annarsstaðar.

En skrif mín eru einungis samboðin þeim sem eru jafn æðislegir og ég sjálf, og innsæi mitt og næmleg framsetning ættu því lítið erindi við pólitíkusa og þeirra senditíkur.

Ég hafði því afráðið að afþakka boðið, þegar ég fékk vitrun. Það gerðist nefnilega einn daginn þegar var að raka mig að neðan að það var einsog það kviknaði á peru og mér datt í hug að auðvitað ætti ég að reyna að gera eitthvað fyrir alla þessa pólitíkusa og þeirra senditíkur.
Auðvitað ætti ég að reyna að hjálpa þessu ólánsama fólki sem hafði leiðst útá refilstigu stjórnmála einfaldlega vegna þess að sökum óheppilegs útlits og skorts á atgervi voru þeim allar aðrar bjargir bannaðir. Því við eigum að hjálpa aumingjunum, frekar en að fyrirlíta þá fyrir að vera veikgeðja og minni máttar.

Ég fór því að velta fyrir mér hvað væri mögulega hægt að gera til að hjálpa pólitíkusum að vinna sig útúr öngstræti stjórnmálanna, endurhæfa þá og hjálpa þeim að öðlast sjálfstraust til reyna fyrir sér á hinum almenna vinnumarkaði.
En til þess varð ég að komast að rót vandans.

Ég hef kynnt mér kvenrembur (femínista) þónokkuð vel, en það eru ljótar, reiðar og loðnar konur sem geta aldrei verið ánægðar með neitt sem þær fá, sjá karlrembudrauga í öllum hornum, rífast, hafa ekki húmor og vaða fram með offorsi og frekju í fjölmiðlum, og ekki síst á internetinu.

Ítarlegar rannsóknir hafa verið gerðar á því hversvegna kvenrembur (femínistar) trana sér fram með þessum hætti, og rannsakendur hafa allir komist að sömu niðurstöðunni; Ástæðan fyrir því að þær haga sér svona er einfaldlega sú að það vill enginn ríða þeim.
Og þarsem ástundun kynlífs er tímafrek iðja í lífi allra eðlilegra einstaklinga þá reyna þær að fylla uppí tómarúmið í lífi sínu með þessum annarlega hætti sem ég lýsti hér að ofan, og fá um leið útrás fyrir reiði sína á öllum þeim karlmönnum sem hunsa þær kynferðislega og meina þeim aðgang að líkömum sínum.

Og í raun eru stjórnmálamenn ekki svo ólíkir kvenrembum (femínistum). Þeir eru upp til hópa ófríðir, ósáttir við núverandi ástand, vilja breyta samfélaginu, sjá pólitíska andstæðingadrauga í hverju horni, eru alltaf að rífast og vaða einnig fram með offorsi og frekju í flestum fjölmiðlum sem þeir komast í, auk þess sem stjórnmálamenn hafa verið að færa sig þónokkuð uppá skaftið í netheimum undanfarið og eru flestir komnir með eigið blogg eða jafnvel heilu vefmiðlana.

Af framansögðu má því berlega sjá að rannsóknir á kvenrembum (femínistum) hljóta einnig að gilda um pólitíkusa og um leið er óhætt að draga þá ályktun að ástæðan fyrir því að þeir leiddust útí stjórnmál sé einfaldlega sú að enginn vildi sofa hjá þeim.

Það er því tími til kominn að við, hin íslenska þjóð, tökum höndum saman og hjálpum þessum illa riðnu pólitíkusum.

Tískubloggið biður ykkur því vinsamlegast að hugsa um almannaheill og sýna stuðning ykkur í verki.

xoxo
-h

snemma beygist krókurinn

Hola lovers,

Þessi metnaðarfulli keppandi í ungbarnafegurðarsamkeppni sannar hið fornkveðna að:

A) Beauty is pain.
B) Það er aldrei of snemmt að byrja.



xoxo
-h

Tískubloggið kíkir í skápinn hjá xxxxxxxxx xxxxxxxxxxx

Hola lovers,

Þið munið eflaust öll eftir því þegar ég fékk að kíkja í skápinn hjá kynlífsbloggaranum og stórstjörnunni Fanneyju Mango. Það tókst með endemum vel og því ákvað ég að endurtaka leikinn og fékk að kíkja í skápinn hjá landsþekktum manni, honum  xxxxxxxxx xxxxxxxxxxx (en hann kaus að halda nafni sínu leyndu, í ljósi atburða þeirra sem hér á eftir fara).

Svona lítur týpískur hommi út skv. google.

Ég fór heim til hans vopnuð myndavél, tilbúin til að taka myndir af fallegum flíkum, bindum, sokkum, ermahnöppum og öðru skarti. En sú varð nú aldeilis ekki raunin, því hvað haldiði að hafi leynst í skápnum lovers?

Hommi!

Mér brá að sjálfsögðu töluvert, og honum  xxxxxxxxx xxxxxxxxxxx líka, enda hefur hann löngum verið talinn álitlegur piparsveinn og verið bendlaður við ýmsar íðilfagrar konur í gegnum tíðina. Skápahomminn harðneitaði að koma útúr skápnum, og hann vildi eðli málsins samkvæmt heldur ekki sitja fyrir á mynd.

Ég myndagúgglaði því homma á útlensku og læt fyrstu myndina sem birtist fylgja hér með.

Svona getur lífið komið manni á óvart lovers.

Og þegar maður opnar skáp þá veit maður aldrei hvað inní honum kann að leynast.

xoxo
-h

lesið á milli línanna

Hola lovers,

Það kennir ýmissa grasa á vefritinu Bleikt.is, en einsog ég nefndi hér í fyrri færslu þá eru greinakornin þar svo djúphugsuð og tyrfin að ég hef átt erfitt með að lesa mig í gegnum þau. Ég las grein sem heitir "Ég veit hvað þið eruð að hugsa" eftir Sævar Poetrix nú fyrr í vikunni, og þar er ekkert léttmeti á ferð. Ég hef verið að melta greinina í nokkra daga og mér varð ekki mikið ágengt, því höfundur virðist oft vera í mikilli mótsögn við sjálfan sig. Hann kemur með ýmsar fullyrðingar og neitar þeim svo í næstu andrá. Ég mátaði ýmis textafræðileg tæki við hana, einsog nýrýni, afbyggingu og freudískan lestur, en það var ekki fyrren ég prófaði díalektískan lestur í anda Hegels að merking greinarinnar varð mér ljós.

Í díalektík sinni reynir Hegel að skilja og útskýra hvernig hugmyndir (og jafnvel menning) þróast. Viðtekin venja eða tesa, er ríkjandi. Svo kemur fram gagnrýni á tesuna, sem er í beinni mótsögn við hana og kallast antitesa. Tesa og antitesa eru ósamrýmanlegar og af þeim sprettur einhver millivegur, eða niðurstaða, kölluð syntesa. Syntesa verður svo að viðtekinni venju, eða tesu, þangað til ný antitesa kemur fram, og ferlið endurtekur sig.

Skýringarmynd 1.

Sævar nýtir sér greinilega þessa hugmyndafræði Hegels og setur fram bæði tesur og antitesur, en það kemur í hlut lesandans að lesa á milli línanna og finna syntesuna.

Með Hegel að vopni gerði ég því aðra atlögu að grein Sævars og hér á eftir fer díalektískur lestur minn á henni.

Tesa: Konur eru með hlutfall á milli mjaðma og mittis sem hríðlækkar greindarvísitölu karla.
Antitesa: Konur vilja láta 25 ára svarta, myndarlega rappara refsa sér fyrir að vera óþekkar.
Syntesa: Á Íslandi eru fáir 25 ára svartir, myndarlegir rapparar með lága greindarvísitölu og því komast margar íslenskar konur upp með óþekkt án refsinga, sem getur varla verið þjóðhagslega hagkvæmt.

Tesa: Höfundur leggst ekki svo lágt að hlutgera konur með því að gefa þeim einkunn.
Antitesa: Höfundur gefur öllum konum sem hann hefur verið með einkunnina 8,5-10.
Syntesa: Höfundur uppgötvaði tilgang lífsins þegar fagrar konur gengu inní herbergi og brostu einsog þær væru ekki næstum því jafn dramatískar og þær í raun eru. Tilgangur lífsins sýnist mér vera að gefa konum einkunn byggða á líkamsvexti.

Tesa: Höfundur hefur einungis verið með konum sem fá einkunnina 8,5-10.
Antitesa: Höfundur hefur raunar verið með þremur konum sem myndu ekki fá einkunnina 8,5-10.
Syntesa: Höfundur er ekki hræddur við tilraunastarfsemi. Hann er óhræddur við að fara nýjar leiðir, og því hafinn yfir alhæfingar.

Tesa: Höfundi finnst konur sem eru yfir 55 kg að þyngd vera ofbeldi og sjónmengun. (Kemur raunar ekki fram í grein, en ég sá þetta haft eftir honum á öðrum vettvangi)
Antitesa: Höfundur elskar konur af öllum stærðum og gerðum fyrir það sem þær eru því hann er alinn upp ásamt fjórum systrum af öllum (fjórum) gerðum.
Syntesa: Konur sem eru yfir 55 kg geta farið í megrun.

Tesa: Þú þarft að semja ræðu fyrir augnablikið þegar að þú tekur á móti verðlaununum fyrir bestu frammistöðu í sjálfsvorkunn innanhúss á árshátíð kynsveltra, einmana og biturra einhleypinga.
Antitesa: Þú þarft ekki að kaupa klósettpappír næsta árið.
Syntesa: Verðlaunin fyrir bestu frammistöðuna í sjálfsvorkunn innanhúss á árshátíð kynsveltra, einmana og biturra einhleypinga eru ársbirgðir af klósettpappír.

Tesa: Það er ekki nógu mikið pláss á internetinu.
Antitesa: Afmæli stúlkna eru fuglabjörg.
Syntesa: Það er ekki pláss fyrir fuglabjörg á internetinu.

Tesa: Konur fá kosningarétt.
Antitesa: Gufusoðinn kúrbítur er borinn fram á jólunum.
Syntesa: Bókin He´s Just Not That Into You kemur út.

Tesa: Sannleikurinn liggur sjálfdauður í vegakanti.
Antitesa: Það er fátækt í heiminum.
Syntesa: Einhver með algjöran skort á hæfileikum þarf að skammast sín.

Tesa: Þennan með algjöran skort á hæfileikum vantar aukapening.
Antitesa: Þú munt klúðra málunum næst.
Syntesa: Babysteps, my  love, babysteps.

Verði ykkur að góðu.

xoxo
-h

konur, hamingjusamir menn og falleg heimili

Hola lovers,

Einsog þið eflaust vitið er komin nýr vefur í loftið sem þjónar hagsmunum og áhugasviði ykkar, nefnilega Bleikt.is - Vefur fyrir drottningar. (Þið munið kannski að ég stakk raunar uppá því við ritstjórann að hún nefndi vefinn frekar beislitað.is eða gratt.is, til að koma í veg fyrir að hann yrði bendlaður við kvenrembu (feminísma), en því miður tók hún þær ábendingar mínar ekki til greina, og ég efa ekki að vefurinn væri mun farsælli ef hún hefði gert það. En það þýðir ekki að gráta það, þarsem þetta er hennar missir, ekki minn, þó mér þyki þetta að sjálfsögu miður, aðdáendur kærir.)

Það er þó nokkuð mikið af efni inni á þessum vef og ég verð að játa að ég hef ekki getað kynnt mér það allt til hlítar, þar sem ég á svolítið erfitt með að lesa svona bleika heimasíðu (hugrenningatengslin við kvenremburnar, þið vitið) og að auki eru þau greinarkorn sem ég hef rekist á þarna svo meitluð, hárbeitt og þungmelt að ég á hreinlega í erfiðleikum með að krafsa mig í gegnum þau.

En þó eru tvær greinar sem ég las og líkaði vel.

Önnur þeirra er eftir hana Hlín mína og heitir „6 ráð handa þreyttum, útivinnandi konum“ og hin er viðtal við kvennaljómann Svein Andra.

Í báðum greinum er tæpt á konum og skyldu þeirra við heimilið og heimilisstörfin.

Hlín kemur með góðar ráðleggingar til giftra, útivinnandi mæðra, og bendir réttilega á að flestar þeirra eigi í erfiðleikum með að halda fullkomið heimili og vinna úti. Hún biður konur að gleyma ekki hvers vegna þær eru á annað borð útivinnandi:
„Rannsóknir sýna að konur fara til vinnu af sömu ástæðum og menn. Það snýst ekki bara um fjárhagslegt sjálfstæði eða að nauðsynlegt er að vera í launaðri vinnu til þess að geta sett mat á borðið. Konur fara til vinnu til þess að vera persónulega fullnægðar, það að vinna veldur því að þær finna til sjálfstæðis, auk þess sem það gefur þeim ákveðna stöðu í samfélaginu og tækifæri til þess að umgangast annað fólk. Konur finna tilgang, áskoranir og möguleika í að þróa starfsferill sinn veldur því að þeim líður vel með sjálfar sig.“

Hún nefnir einnig að flestar þeirra hafi óskað þess að eiga „eiginkonu, eða töfrabarnfóstru sem myndi taka til, ganga frá þvottinum, fá börnin til þess að hætta að rífast, versla í matinn, borga reikningana og undirbúa kvöldmat, allt án þess að blása úr nös.“
Og ég verð að viðurkenna að ég hef oft horft á kærastann og óhreyft uppvaskið í vaskinum og óskað þess að fjölkvæni væri löglegt á Íslandi, því þá væri líf mitt mikið auðveldara og skemmtilegra og ég gæti annaðhvort einbeitt mér að vinnunni eða þrifum.

Því gleður það mig að sjónarmið mitt og Pjattrófanna um að karlmönnum sé einfaldega ekki eðlislægt að þrífa, þvo þvott, elda matinn og sjá um börnin, fái nú frekari hljómgrunn á einni af vinsælustu síðum landsins, og rennir þessi pistill Hlínar enn frekari stoðum undir þá kenningu mína að allar mæður séu í raun einstæðar, því þegar kemur að því að halda heimili og ala upp börn eru karlmenn sannarlega verri en enginn. Ef skoðanir okkar hljóta nægilegan hljómgrunn, þá hlýtur það að vera tímaspursmál hvenær stjórnvöld átta sig á því að það er heillavænlegast fyrir alla að leyfa fjölkvæni hér á landi. Það yrðu allir hamingjusamari, og heimili landans hreinni.

Það er mikilvægt að halda heimili og hafa það fallegt og einsog Hlín segir: „Við vitum allar að dagur (sic) húsmóður er aldrei lokið“. Hlín biður konur þó að setja sig í spor eiginmanna sinna og gleyma ekki að sinna þeim, þó heimilisamstrið kalli, því „bæði börnin þín og maður myndu taka hamingjusama mömmu í óskipulögðu heimili fram yfir óánægða mömmu í heimili sem gæti ekki verið fullkomnara.“

Sveinn Andri tekur í sama streng og biður þrifa- og puntóðar konur vinsamlegast um að taka tillit til karlmanna. Hann segir: „Margt í fari kvenna getur verið bæði kostur og ókostur. Auðvitað er það kostur hversu umhugað þeim er að hafa heimilið fínt og börnin vel til höfð, en að sama skapi er það ókostur að þurfa alltaf að vera að blanda karlmanninum inn í þetta.“

Þannig að kæru konur, vinsamlegast sýnið mönnum ykkar þá tillitsemi að halda heimilinu hreinu án þess að vera alltaf að þrífa. Eða, ef þið ráðið hreinlega ekki við þrifnaðarþörfina þá skuluð þið sýna þeim þá lágmarkskurteisi að standa ekki í því þegar þeir sjá til. Þið getið gert það á nóttunni eða þegar karlmaðurinn bregður sér af bæ til að gera einhverja merkilegri hluti.

Að auki ættu allar konur/kærustur með sjálfsvirðingu að fara reglulega naktar með bjór og samloku til manna sinna til að tilkynna að leikurinn í enska boltanum sé byrjaður og spyrja þá hvað þá langar að gera í leikhléi.

Sveinn Andri veit hvað hann syngur. Það er engin tilviljun að hann er ógiftur og eftirsóttasti piparsveinn landsins.

xoxo
-h

inspirational kvót dagsins

„Ef ég er með varalitinn allann daginn þarf ég að bæta á hann um það bil einu sinni. Góð ending að mínu mati en það er þá háð þeim skilyrðum að þú fáir þér ekki að borða á meðan.“

-Pjattrófa

xoxo
-h

haltu þér mjórri - þó það séu jól

Hola lovers,

Einsog þið vitið kannski, þá er kominn desember. Og þið vitið jafnvel líka að í desember eru jólin. Jólin eru skemmtileg, því þá fær maður yfirleitt pakka, en það er líka önnur og myrkari hlið á jólunum, nefnilega jólamaturinn. Því um jólin eru oft jólaboð og jólahlaðborð og jólamáltíðir og jólasmákökur og súkkulaðijóladagatöl og jólabjór og jólaöl og svo mætti lengi telja.

Ég ætla rétt að vona að þið farið sem flest eftir lífstílsráðunum mínum, sem er einmitt vinsælasta færslan á blogginu frá upphafi, enda þrautreynd aðferð við að halda sér mjórri, sætari og heilbrigðari en ella.

En það getur verið erfitt að fylgja þessum einföldu þumalputtareglum yfir hátíðarnar, eða einhverju mataræði yfir höfuð, einsog kollegi minn hún Marta María bendir á í þessari færslu hér. Hún kemur enda með nokkrar ráðleggingar til að berjast við fituskrímslið, en betur má ef duga skal og því koma hér sérstakar desemberráðleggingar Tískubloggsins um hvernig á að halda sér mjórri - þó það séu jól.

Þegar maður fer í jólaboð eða jólahlaðborð er mikil hætta á því að rekast á eitthvað matarkyns sem ekki er leyfilegt að borða, skv. lífstílsreglum Tískubloggsins. Sem dæmi mætti nefna síld (prótein), rúgbrauð (brúnt), kartöflur (kolvetni), appelsín (ekki með aspartam), mandarínur (ávöxtur), salat (grænt) og margt, margt fleira.

En þar sem ég er kurteis manneskja að eðlisfari þá finnst mér óþægilegt að fara í matarboð og fúlsa við öllu sem mér er boðið upp á. Ég bregð því á það ráð að lauma lítilli Tupperware krukku í töskuna mína áður en ég fer í boð eða út að borða, og svo smakka ég á öllu og bregð mér einfaldlega afsíðis (á klósettið, eða lauma mér inní fataskáp, ef það er upptekið) og æli í krukkuna. Svo sting ég henni aftur í töskuna, fer aftur fram og held áfram að mingla, fullviss um að ég muni ekki bæta á mig einu einasta grammi.

Þetta gæti ekki verið auðveldara! (En ég mæli eindregið með því að þið fáið ykkur (sykurlaust) tyggjó eftir uppsölurnar, því tyggjó er líka meinhollt - enda stútfullt af aspartami)

Þegar ég kem heim set ég æluna yfirleitt á blómabeðið úti í garði, því þetta er fínasti áburður og líka einstaklega umhverfisvænn. Það er líka mikilvægt að hlúa vel að jurtunum í frostinu, og í anda jólanna. Svo þvoiði bara Tupperware krukkuna og þið getið notað hana aftur og aftur. Ég er búin að eiga mína í fjögur ár og hef notað hana mikið um hátíðirnar og það sér ekki á henni. Enda eru Tupperware-vörur gæðavörur.

Og að lokum: Uppskrift að frábærum heilsudrykk sem veitir þér orku til að takast á við daginn, auk þess sem hann minnkar löngun í sætindi.

Hráefni:

1/4 l volgt vatn
1/4 l kalt vatn
3 1/2 dropar sítrónusafi
5 matskeiðar rauður matarlitur
8-9 ísmolar

Aðferð:

Settu allt í mixer, helltu síðan í fallegt glas og njóttu.

xoxo
-h

hollir og ótrúlega megrandi hafraklattar - uppskrift

Hola lovers,

Ég er á póstlistanum hjá honum Dr. Peter D´Adamo og nýverið fékk ég þessa frábæru uppskrift að hafraklöttum. Hún er fljótleg og bragðgóð og hráefnið ódýrt, og svo er hún líka einstaklega kaloríusnauð. Ég hef verið að borða svona í a.m.k. þrjú mál á degi hverjum undanfarið og ég er búin að léttast um næstum því tvö kíló.

Hollir og ótrúlega megrandi hafraklattar Dr. Peter D´Adamo:

Hafraklattar:
3 bollar af erfðabreyttu haframjöli
0,5 teskeið kartöflumjöl
0,2 g af salti
2 og 1/5 rúsína, fínt saxaðar

Dressing:
7 ml léttmjólk
7 ml undanrenna
15 ml vatn

Aðferð:

Bleytið vel í haframjölinu og látið standa í ísskáp yfir nótt. Þerrið síðan og setjið í pott, bætið salti útí og sjóðið í 3 klst. Saxið rúsínur og blandið saman við ásamt kartöflumjöli. Hnoðið hráefnið í klatta og steikið uppúr vatni í 20 mín.

Ég mæli með að þið berið þá fram með dressingunni, en hvað sem þið gerið skuluð þið ekki nota smjör (nema það sé beikonsmjör).

xoxo
-h