Tuesday, January 8, 2013

Vertu betri manneskja en besta útgáfan af sjálfri þér á myndum í janúar

Hola lovers,

Afsakið fjarveruna. Ég hef átt annríkt.

Ég ætla rétt að vona að þið hafið farið eftir laufléttum ráðleggingum mínum um hátíðirnar og ekki fitnað neitt (og helst grennst). En góð vísa er aldrei of oft kveðin, stundum er gott að skipta um tóntegund og því vil ég benda ykkur á nokkrar frábærar greinar sem birst hafa á Smartlandinu, vinasíðu Tískubloggsins, undanfarið. Lesendum mínum til hægðarauka hef ég dregið fram helstu atriði þeirra hér fyrir neðan.

Fyrsta ber að nefna greinina 9 leiðir til að verða besta útgáfan af sjálfri þér, sem ber reyndar svolítið misvísandi titil. Að óreyndu mætti ætla að hún fjalli um hvernig er hægt að verða betri manneskja, en sem betur fer er það ekki raunin. Greinin fjallar um útlit (enda skiptir auðvitað engu máli hvernig manneskja maður er ef maður er sætur). Í greininni má finna uppástungur að níu leiðum til þess að líta betur út og ber þar ef til vill hæst lið nr. 5, Drekktu grænan djús, og lið nr. 8, Borðaðu regnbogann.

Í greininni Vertu betri manneskja á 21 degi má finna ráðleggingar fyrir tvítyngda í fimm liðum. Ég verð reyndar að játa að ég er enn að reyna að komast að því hvað orðin „exchercise“ og „someting“ þýða. Að sama skapi hef ég aldrei séð sögnina „to attent“ í texta áður og viðurkenni jafnframt að orðalagið að „tosast í eitthvað nýtt“ er mér sömuleiðis framandi. En ég veit að Smartlandið á Mbl.is er faglegur og metnaðarfullur vefur sem myndi aldrei birta illa þýtt og óprófarkalesið drasl svo ég geri fastlega ráð fyrir því að vandinn sé, einsog þeir segja, mín megin.

Í 10 ráð til að tækla janúarljótuna er margt bitastætt að finna, en ég vil sérstaklega benda lesendum á liði 4 (Vönduð snið klæða af) og 5 (Hækkaðu þig upp) því einsog allir vita vilja allar konur líta út fyrir að vera bæði grennri og hávaxnari en þær raunverulega eru. Ég bið ykkur samt í guðsbænum um að hunsa algjörlega lið 7 (Falleg nærföt). Ég hef sagt ykkur áður að það er afar mikilvægt að tryggja karlmönnum sem best aðgengi að líkama ykkar öllum stundum og því heillavænlegast að sleppa hreinlega nærfatnaði og spara þeim þannig dýrmætan tíma í samförum sem þeir geta svo í staðinn notað annað hvort í ræktinni eða til þess að bæta forgjöfina.

Margir lesendur hafa vafalítið fengið snjallsíma í jólagjöf og því er vel við hæfi að enda þessa samantekt á því að minnast á greinina 8 ráð til að vera gordjöss á myndum, því einsog segir réttilega í upphafi hennar: „Í allri Instragram-, Twitter- og Facebook-menningunni skiptir máli að líta vel út á öllum myndunum sem vinir þínir eru taka og pósta jafnóðum daginn út og daginn inn.“ Af þessum átta óbrigðulu „leynitrix[um] sem leysa öll heimsins vandamál“ þykja mér tvö bitastæðust: nr. 4 (Skyggðu andlitið vel) og nr. 2, en þar er réttlilega bent á að „[e]f teknar eru af þér litmyndir skiptir mestu máli að hyljarinn sé með bleikum eða ferskjulituðum tónum“ (ath. leturbreyting síðuhaldara).



Gleðilegt ár.

xoxo
-h

Friday, June 8, 2012

Sokkar Dorritar stela senunni - Gætu ráðið úrslitum í baráttunni um Bessastaði - Tískubloggið gætir jafnræðis

Hola lovers,

Enn heldur Smartlandið áfram að upplýsa þjóðina um það sem skiptir mestu máli í lýðræðislegri kosningabaráttu; útlit frambjóðenda og maka þeirra.

Í fréttinni Dorrit mætti í bleikum sokkum kemur fram að eiginkona sitjandi forseta hafi, þótt ótrúlegt megi virðast, klæðst (samstæðum!) sokkum þegar þau heimsóttu nýverið veitingastað á landsbyggðinni.

Og hvernig haldiði að þeir hafi verið á litinn? Bleikir.

Það er ljóst að þetta sokkapar mun hafa afgerandi áhrif á úrslit komandi kosninga.

Tískublogginu er sem fyrr umhugað um að allrar sanngirni sé gætt í umfjöllun um forsetaframbjóðendur og því býður það lesendum sínum umfjöllun um sokka Hrafns Malmquist, en hann er maki Andreu Ólafsdóttur, meðframbjóðanda Ólafs Ragnars Grímssonar.

***

HRAFN MÆTTI Í GRÆNUM SOKKUM

Hrafn Malmquist og Andrea Ólafsdóttir mættu nýverið í myndatöku fyrir DV. Þótt hjónin séu í kosningabaráttu sló Hrafn ekkert af þegar kom að folagangi.

Hann klæddist jakkafötum og grárri, röndóttri skyrtu og var ekki með stór sólgleraugu. Það sem toppaði hinsvegar allt voru grænu sokkarnir sem hann klæddist í myndatökunni. 

Íslenskir folar mættu alveg leika þetta eftir og splæsa á sig grænum sokkum til þess að vera örlítið sumarlegri.


Vinsamlegast athugið að sokkarnir sjást ekki á meðfylgjandi mynd.

xoxo
-h

Wednesday, May 30, 2012

Átti hann barn fyrir 37 árum? MYNDIR

Hola lovers,

Þið vitið auðvitað að ekkert er minna sexí en að fylgjast með þjóðfélagsumræðu og hafa skoðanir á málefnum sem varða hagsmuni þjóðarinnar á einhvern hátt. Ég veit að lesendum mínum er öllum afar umhugað um að vera eins sexí og mögulegt er og þessvegna vitið þið væntanlega ekki að það verður kosið um næsta forseta lýðveldisins í næsta mánuði. (Ég fylgist með þessu með öðru (og minna sexí) auganu, svo þið þurfið þess ekki, lovers (þið megið þakka mér seinna)).

En hingað til hefur nákvæmlega ekkert markvert átt sér stað í umræðunni sem kemur okkur tískumeðvitaða fólkinu við, fyrr en nú!

Því núna hefur kollegi minn hún Marta María á Smartlandinu LOKSINS komið með vinkil sem vantaði tilfinnanlega í umræðuna: Dóm um útlit og líkamsvöxt forsetaframbjóðanda. Hún skrifaði greinina Átti hún barn fyrir 10 dögum?, birtir þar mynd af Þóru Arnórsdóttur í kjól sem hún kallar "alveg aðsniðinn, sýndi vel línurnar", og kunnum við henni góðar þakkir fyrir innleggið.

Mörgum forsetaframbjóðendum hefur verið mikið í mun að fjölmiðlar gæti sanngirni í umfjöllun um þá í aðdraganda kosninganna og séu vakandi fyrir því að einn frambjóðandi fái ekki meiri umfjöllun en aðrir. Ég skil það vel og hef samúð með því sjónarmiði og því vildi ég rétta hlut sitjandi forseta (og helsta keppinautar Þóru) í umræðunni.


***

ÁTTI HANN BARN FYRIR 37 ÁRUM?


Ólafur Ragnar Grímsson opnaði nýverið kosningaskrifstofu sína að viðstöddu fjölmenni. Það vakti athygli að það mátti ekki með nokkru móti sjá að Ólafur hefði eignast tvíbura fyrir aðeins 37 árum, eða árið 1975.

Ólafur klæddist gráum jakkafötum, ljósblárri skyrtu og var með gult bindi. Jakkafötin, sem voru alveg aðsniðin, sýndu vel línurnar.

Af myndunum að dæma má sjá að Ólafur Ragnar slær stjörnum á borð við Rod Stewart og David Bowie við, því þær voru mun lengur að ná fyrra formi eftir barneignir.

xoxo
-h

Thursday, March 22, 2012

sögur af andláti mínu eru stórlega ýktar

Hola lovers,

Ég ætla ekki að biðja ykkur afsökunar á fjarveru minni, en ég skal útskýra hana.

Eftir allt fjölmiðlafárið sem fylgdi útkomu lífstílsbókar minnar þá var ég orðin fullkomlega úrvinda. Þið getið auðvitað ekki ímyndað ykkar hvað það er slítandi að fara í viðtöl í öllum helstu fjölmiðlum álfunnar, fá tonn af aðdáendabréfum, mæta á endalausa upplestra, árita þúsundir (ef ekki milljónir) eintaka, heiðra aðdáendur með nærveru minni og líta jafnframt óaðfinnanlega út.

Í janúar ákvað ég því að nota brotabrot af ágóða sölu bókarinnar og fara í tveggja mánaða dítox-spa-búðir við strendur Dauðahafsins.

Dauðahafið.
Það var endurnærandi að komast í annað umhverfi þar sem enginn vissi hver ég var. Engir ljósmyndarar eltu mig á röndum, enginn vildi fá mig til að árita neinar bækur og engir blaðamenn að hringja til að biðja mig að koma í viðtöl (ég skildi símann eftir heima).

Í dítox-spa-búðunum var notalegt og gott andrúmsloft. Þarna var andlega þenkjandi og fallegt fólk á borð við mig sjálfa. Það var sérstaklega einn sem ég náði góðu sambandi við, soldán nokkur að nafni Said. Ég tók strax eftir honum fyrsta daginn. Hann er með hunangslita húð og svo hvítar tennur að þær lýsa upp andlitið á honum þegar hann brosir. Indverskur fakír elti hann á röndum og það var ekki fyrr en undir lok dvalar minnar sem ég komst að því að fakírinn er í raun lífvörður hans. Og Said er jórdanskur olíufursti og einn af ríkustu mönnum veraldar.

Einhvernveginn æxluðust hlutirnir þannig að ég og Said vorum í flestum meðferðum á sama tíma og á milli okkar mynduðust fljótt órjúfanleg bönd. Það er ef til vill erfitt fyrir ófríða að ímynda sér hversu náið samband myndast á milli tveggja einstaklinga sem dítoxa saman, fasta og skola út. Og hvernig maður deilir ósjálfrátt innstu leyndarmálum sínum, löngunum og þrám þegar maður liggur í grænni vin í skugga frá eyðimerkursólinni og bíður eftir því að andlitsmaskinn þorni og hreinsi um leið svitaholurnar á t-svæðinu.

Said hefur sjálfur lýst sambandi okkar sem stokkhóms-syndrómi, en ég sagði honum að ekkert skandinavískt orð gæti fyllilega lýst hita þeirra tilfinninga sem kviknuðu á milli okkar þarna í eyðimörkinni.

Þegar dítox-búðunum lauk bauð hann mér að fylgja honum í höll sína. Ég þáði auðvitað boðið og þar er ég nú. Lífið er ljúft, ég er búin að missa heil 8 kíló, svitaholur mínar eru hreinari en þær hafa nokkurntímann verið og ég hef fengið fullt af innblástri fyrir næstu lífstílsbók. Og það allra besta er að hinar konurnar í höllinni eru huldar frá toppi til táar, og því er ég óumdeilanlega fallegasta konan á svæðinu, því samkeppnin er engin.

Því miður get ég hvorki sýnt ykkur myndir af Said né höllinni eða einhverjum af fjölmörgum lystigörðum hennar, því fakírinn (sem er víst ekki bara lífvörður heldur yfirmaður allrar öryggisgæslu í höllinni) bannar mér að taka myndir og hann braut meira að segja myndavélina mína þegar ég var að taka átfittpóst fyrir þessa færslu.

P.S. kærasti, ef þú ert að lesa þetta, þá segi ég þér upp.

xoxo
-h

Thursday, December 22, 2011

Tískubloggið á Trúnó á morgun (Þorláksmessu)

Hola lovers,

Mér finnst réttast að láta ykkur vita af því að annað kvöld, á sjálfri Þorláksmessu, mun ég halda mína eigin messu á Trúnó, Laugavegi 22, 101 Reykjavík.

Þar mun ég lesa upp úr bók minni og messa yfir lýðnum.

Fleiri skemmtiatriði verða einnig í boði, en ekkert þeirra mun jafnast á við mig.

Mæting kl. 21:00.



Sjáumst þar.

xoxo
-h

Wednesday, December 21, 2011

að gefnu tilefni II

Hola lovers,

Að gefnu tilefni vil ég minna ykkur á bókina mína Hola, lovers eða Lífstíls- og megrunarbók Tískubloggsins eða Hvernig á að þóknast karlmönnum og vera betri en aðrar konur. Hún er gagngert skrifuð til þess að koma íslensku kvenþjóðinni til bjargar, en til að ná því markmiði þarf hún fyrst að komast inn í hvern jólapakka sem síðan fer inn á hvert heimili.

Oft var þörf en nú er nauðsyn. Með samstilltu kaupátaki getum við breytt heiminum.

Gefum bjarta framtíð í jólagjöf – Gefum lífstílsbók Tískubloggsins.


Þið hafið enga afsökun.

Kaupið hana.

Í dag.

Núna.

xoxo
-h

Tuesday, December 20, 2011

það sem þið misstuð af á jóladagatali Norræna hússins og ljúffeng Berjasæla Tískubloggsins

Hola lovers,

Tískubloggið kom fram á jóladagatali Norræna hússins í gær. Það var hátíðleg friðarstund þar sem við minntumst Hermanns, en í gær voru einmitt þrjú ár, tveir mánuðir og átta og hálfur dagur síðan hann dó. Að minningarstundinni lokinni leiðbeindi ég gestum Norræna hússins um viðeigandi klæðaburð um hátíðirnar. Þið sem misstuð af því fáið því aldrei að vita hvernig klæðaburður í jólaglögg með vinnunni er líklegastur til þess að leiða til kynlífs með yfirmanni og mögulegrar stöðuhækkunnar í kjölfarið og þið munuð heldur aldrei vita hversu mikilvægt tjull er á sjálfan aðfangadaginn.

Missir ykkar er mikill, einsog þið sjáið af myndinni hér að neðan.

Ég og áhorfendur mínir höfðum mínútu þögn til að minnast Hermanns. Um hálsinn ber ég linsuboxið sem geymir jarðneskar leifar hans.
Ég ráðlagði þeim sem hlýddu einnig um mikilvægi þess að vera mjór öllum stundum og kom aðeins inn á hvað er æskilegt að borða um hátíðirnar og hvaða fæðutegundir beri að varast á hátíð ljóss og friðar.

Fyrir ykkur sem skrópuðu læt ég nægja að koma með einfalda, holla, megrandi og þægilega uppskrift að eftirrétti sem ég geri öll jól.


Berjasæla Tískubloggsins

Innihald:

16 ferhyrndir ísmolar
Tveir lítrar af vatni
Eitt sólber
2 dl rauður matarlitur
1,5 dl aspartam
40 g kalk
200 g maísmjöl

Aðferð:

Sjóðið ísmolana í tveimur lítrum af vatni í að minnsta kosti 4 klst. Látið löginn svo standa í 40 mín. við opinn glugga. Setjið þvínæst sólberið út í og látið það liggja í leginum í tvær mínútur. Hellið leginum síðan í gegnum grisju og skiljið berið frá. Hendið síðan berinu.

Setjið matarlit og aspartam út í löginn og hrærið varlega rangsælis, þar til hann hefur samlagast vel. Bætið kalki og maísmjöli við og þeytið þar til blandan verður létt og ljós. Setjið hana síðan í fallegt form og geymið í ísskáp yfir nótt. Þið megið svo skreyta Berjasæluna með berjum ef ykkur lystir, en þið megið ekki borða þau.


Verði ykkur að góðu.

xoxo
-h

Tuesday, December 6, 2011

hversvegna ég fór í fýlu og hvernig ég tók gleði mína á ný

Hola lovers,

Sorrí að ég hafi ekkert póstað lengi, en ég er búin að vera í fýlu. Það eru tvær ástæður fyrir því:

1) Einhver helvítis femínisti skrifaði dóm um lífstílsbókina mína. Hann var ljótur og ógeðslegur. Ég átti auðvitað von á því að bókin félli í grýttan jarðveg hjá kvenrembum (því sannleikanum verður hver sárreiðastur), en ég átti satt að segja ekki von á því að viðbrögðin yrðu jafn öfgakennd og raun ber vitni. Þessi svokallaði ritdómari segir útgáfu bókarinnar vera „algjört hneyksli“ og bókin sé „stútfull af allskonar óþverra“. Annað í bókinni kallar hún „algjört kjaftæði“. Í kommentakerfið þyrpist síðan öfgafullur og pólitískt réttþenkjandi sértrúarsöfnuður íslenskra femínista sem tyggur vitleysuna upp eftir ritdómara og bætir sínu í sarpinn.

Ég ætla ekki að gera lesendum mínum þann grikk að hafa eftir allt sem þar er sagt um mig og bókina mína, en þar má finna ummæli á borð við þau að ég sé „óþolandi birtingarmynd andlegrar auðnar nútímaþjóðfélagsins“ og annað í svipuðum dúr.


2) Síðastliðinn fimmtudag var tilkynnt um tilnefningar til Íslensku bókmenntaverðlaunanna. Hola, lovers eða Lífstíls- og megrunarbók Tískubloggsins eða Hvernig á að þóknast karlmönnum og vera betri en aðrar konur var EKKI tilnefnd í flokki fræðirita.

Ég trúði satt að segja ekki eigin augum þegar ég sá fréttirnar. Það að bókin mín hafi verið sniðgengin með þessum hætti sýnir náttúrulega hversu víðtækt samsæri femínista gegn mér er í raun og veru. Ég hef VG líka grunuð um að nýta hvert tækifæri til þess að leggja stein í götu mína (því það vita allir að VG þolir ekki fallegar, kynþokkafullar og vinsælar konur, þannig að ég held það sé engin tilviljun að bók mín, þrátt fyrir að eiga verðlaunin mest skilið allra bóka sem út komu á árinu, sé sniðgengin af dómnefnd á sama tíma og fulltrúi VG sitji í mennta- og menningarmálaráðuneytinu), en þó hef ég ekki fengið neinar óyggjandi staðfestingar á þessum rökstuddu grunsemdum mínum, svo ég þori ekkert að fullyrða um það að svo stöddu. Látum nægja að það komi fram að ég sé lítt trúuð á tilviljanir.

En þrátt fyrir þessi ofangreindu boðaföll hef ég nú tekið gleði mína á ný, því mér bárust nýverið fregnir af því að Hola, lovers eða Lífstíls- og megrunarbók Tískubloggsins eða Hvernig á að þóknast karlmönnum og vera betri en aðrar konur vermir nú hvorki meira né minna en fyrsta sætið á metsölulista Bókabúðar Máls og menningar!

Og þar, lesendur góðir, á hún svo sannarlega heima.

Tískubloggið sigrar að lokum.


xoxo
-h

Tuesday, November 29, 2011

vandræði kvenna

Hola lovers,

Ég hef áður fjallað um samskiptavandræði kvenna hér á blogginu. Og enn halda rætnar konur áfram að vandræðast, einsog Vísir.is bendir á í umfjöllun sinni „Herman Caine aftur í kvennavandræðum“. En hann lenti nýverið í því að vandræðakona sakaði hann um að hafa haldið við sig í mörg ár, en fyrri kvennavandræðin sem fréttin vísar til er þegar hann lenti í því að „fjórar konur sökuðu hann um kynferðislega áreitni“.

Einsog fréttin gefur til kynna liggja vandræðin bersýnilega kvennanna megin, og þær ættu að líta í eigin barm. Ég meina, hvað vakir eiginlega fyrir þeim? Vita þær ekki að hann þarf að huga að frama sínum sem mögulegur forseti Bandaríkjanna?

xoxo
-h

Friday, November 25, 2011

megrun alla daga

Hola lovers,

Pjattrófurnar vita að allar konur vilja vera mjórri en þær eru. Þær lögðu nýverið til að lesendur sínir færu í megrun annan hvern dag, en skyldu þó jafnframt gæta „þess bara að ganga ekki of langt á „venjulegu“ dögunum og skemma allt“.

Mér finnst þetta ekki nógu djúpt í árina tekið hjá þeim og vil því hérmeð árétta að allar konur eiga að vera í megrun alla daga, en ekki bara annan hvern dag.


Því einsog þið sjáið, þá geisla allar grannar konur beinlínis af hamingju.

xoxo
-h