Monday, January 31, 2011

enn frekar af hártísku ungbarna

Hola lovers,

Hárleysi ungbarna er greinilega mun útbreiddara og algengara vandamál en mig hefði órað fyrir. Það er gott að Húsmóðir helvítis tók af skarið og opnaði umræðuna fyrir þetta viðkvæma mál hér í gestapósti, því það eru greinilega ýmis úrræði í boði fyrir þá sem eru tilbúnir að viðurkenna vandamálið og leita sér í kjölfarið hjálpar.

Velviljaðir lesendur hafa bent síðunni á lausnir sem henta ef til vill efnameira fólki, eða þeim sem eru ekki nægilega handlagnir til að nýta sér ráðleggingar Húsmóðurinnar.

Ef þú ert ein/n af þeim sem hefur tíu þumalfingur og ekkert ímyndunarafl þá gæti þetta verið eitthvað fyrir þig og sköllótta ungbarnið þitt.

Heklaðar hárkollur


Þessar einstaklega fallegu, hlýju og endingargóðu hárkollur má fá á Ebay fyrir aðeins 45 Bandaríkjadali.



Nánari upplýsingar og pantanir hér.

Hárkollur með áföstu hárbandi

Þessar þokkafullu og elegant ungbarnahárkollur eru gerðar úr efni sem heitir kanekalon og innra byrðið er úr mjúku flísefni sem fer vel með viðkvæma húð. Þær kosta u.þ.b. 30 Bandaríkjadali, að viðlögðu sendingargjaldi, en það þykir mér vera lágt verð fyrir að þurfa aldrei aftur að skammast sín fyrir barnið sitt!


Nánari upplýsingar og pantanir hér.

Ég vil þakka þeim lesendum sem sendu ábendingarnar kærlega fyrir.

Það er gott að vita af fólki einsog ykkur sem tekur samfélagslega ábyrgð sína á ófríðum ungbörnum alvarlega og lætur sig málin varða.

xoxo
-h

Sunday, January 30, 2011

átfitt dagsins og afmæli Tískubloggsins

Hola lovers!

Ji haldiði ekki bara að Tískubloggið hafi átt hálfsársafmæli fyrir heilum fimm dögum og ég gleymt að halda uppá það!

En þann 25. janúar síðastliðinn fagnaði bloggið sex mánaða afmæli sínu, en það var einmitt stofnað með eftirminnilegum hætti sunnudaginn 25. júlí 2010. Ég hefði að sjálfsögðu átt að halda uppá það með pompi og pragt. Leigja kannski Ráðherrabústaðinn og bjóða öllum aðdáendum mínum í bleika og bláa kokteila (bleikt fyrir stelpur og blátt fyrir stráka, en ekki hvað). En ætli ég geri þetta ekki bara með stæl á eins árs afmælinu.
Takið daginn frá.

Á meðan þið bíðið mæli ég með því að þið opnið kampavín í kvöld, skálið svolítið fyrir Tískublogginu og rifjið upp þessa dásamlegu vegferð sem við höfum deilt.

En yfir í átfittsálmana.


Bolur: Keyptur í Bangkok. Af kærasta.

Peysa: Keypt í skandinavískri verslun í Skandinavíu.

Buxur: Af kærasta, girtar ofaní sokka.

Sokkar: Ósamstæðir.

Hár: Nýlega þvegið, í teygju.

xoxo
-h

Thursday, January 27, 2011

gestapóstur - hártíska ungbarna

Hola lovers,

Það er Tískublogginu mikill heiður að kynna til leiks nýjan og ferskan gestapenna, sem fær jafnframt þann mikla heiður að vera með fyrsta gestapóstinn á nýju ári.

Gestapenninn hefur verið aðdáandi Tískubloggsins frá upphafi, hún fjölgaði nýverið mannkyninu og hefur því tekið að sér að fræða lesendur um ungbarnatísku og harðan heim húsmóðurinnar.

Það er því með stolti sem ég kynni ykkur Húsmóður helvítis.

Njótið

***

Heil og sæl kæra Tískubloggsvinkona og lesendur Tískubloggsins.

Um leið og ég þakka fyrir allar þær frábæru upplýsingar sem hafa gert mig að framúrskarandi og velviljaðri tískudrós, vil ég segja að ég er upp með mér að fá að deila tískukunnáttu minni meðal lesenda Tískubloggsins. Það vita nú flestir með smá vit í kollinum að hingað sækja allra hörðustu og flottustu tískuspekúlantar – glöggir lesendur hafa væntanlega áttað sig á því að ég er auðvitað meðal þeirra.

Þó Tískubloggið hafi hlaupið um víðan tískuvöll og snert á flestu sem viðkemur tísku og fylgihlutum þá hefur einn fylgihluturinn orðið útundan, en það eru einmitt börnin okkar. Því hvað eru þau jú annað en fylgihlutir sem eiga að vera tískumannorði okkar til sóma? Illa hirtur krakki er eins og vel girtur rappari, eða með öðrum orðum algjörlega útúr kortinu og ekki neinum mjólkandi mæðrum sæmandi (ómjólkandi mæður fara í sama flokk og karlmenn). Það verður talað um þig á Barnalandi og í mömmuklúbbnum sértu ekki með töff krakka uppá arminn. Ef krakkinn er ljótur, feitur eða bólóttur þá skaltu ekki örvænta móðir góð. Því nú skal ég segja þér fréttir; Þú getur einfaldlega föndrað betra útlit á barnið.

Að þessu sinni verður hártíska ungbarna tekin fyrir en feitu bólóttu börnin verða að bíða að sinni enda er það allt önnur áfallahjálp og meðferð sem þarf við því.

Við vitum öll að hár okkar er stór hluti af útlitinu og það er alvitað að skalli er ekki kúl, hvort sem maður er ungabarn eða með sjúkdóm. Nauðasköllótt barn er álíka óaðlaðandi og skínandi hárlaus pungur á gömlum karli. Þetta vitum við fæðingarorlofsmömmur mæta vel en þorum kannski bara ekki alveg að tala um  í mömmuhittingunum þegar við erum að metast um útlit barnanna undir rós.
Hver kannast ekki við komment eins og: „Ji, það er aldeilis hár sem barnið hefur!“ Og blóta svo eftirá í hljóði yfir því að manns eigið afkvæmi hafi ekkert hár og fara svo heim og reyna að toga einhverjar lufsur úr hárrótum barnsins með tilheyrandi orgum og oftar en ekki skammyrðum frá föður barnsins sé hann sjáanlegur. (Þeir hafa ekki skilning á þessu, enda karlmenn retarðar þegar kemur að tísku og útliti) En þið vitið jafn vel og ég að þessar aðferðir virka ekkert og eftir situr mamman með grenjandi og hárlaust barn og trítilóðan pabbann sem fer oftar en ekki að haga sér eins og górilla í aðstæðum sem þessum.

Svo hvað gerir maður þá til að barnið tolli í tískunni ? Svarið er einfalt: Maður einfaldlega föndrar smá hárkollu úr lítilli og ljótri húfu sem maður hefur fengið í gjöf frá einhverri leiðinlegri og ljótri frænkunni og einfaldlega límir hárið á húfuna. Og hvaðan kemur hárið hljóta margir að spyrja? Jú þú fórnar smá af þínu hári í þetta verðuga útlitsverkefni. Þú missir það hvort eð er allt saman í brjóstagjöfinni svo þú hefur engu að tapa. Þú bara græðir fallegra barn og kannski meira sjálfsálit í leiðinni, því við vitum öll að börn eru framlenging af sjálfsmynd móðurinnar.




Þar hafið þið það. Maður á aldrei að deyja ráðalaus. En ef þið ætlið að hrökkva uppaf í guðanna bænum verið þá allavega töff í tískunni.

Með vinsemd og virðingu,

Húsmóðir helvítis

Wednesday, January 26, 2011

Öppdeit, úrslit þjóðaratkvæðagreiðslunnar um lógó Tískubloggsins, fyrirgefðu mér Tobba, sýnishorn úr óútkominni lífstílsbók Tískubloggsins, daily bobsession og inspiration dagsins

Hola lovers,

Ég vona að þið fyrirgefið mér færsluskortinn hérna á blogginu. Ég hef bara verið ákaflega upptekin undanfarna daga við að skrifa lífstílsbókina mína, horfa á vídjó, hugsa um naglalökk, o.fl.

Til að bæta ykkur þetta upp færi ég ykkur últra-mega færslu, sem verður, skv. mínum mælingum, lengsta og jafnframt besta bloggfærsla sem birst hefur á íslensku síðan internetið var kynnt til sögunnar.

***

Eftir æsispennandi þjóðaratkvæðagreiðslu um lógó Tískubloggsins liggja niðurstöður loks fyrir. Það var tillaga #8 sem hlaut afburða kosningu með hvorki meira né minna en 42% atkvæða.

Sigurlógóið.
Því miður hefur komið í ljós að nokkrir annmarkar voru á framkvæmd kosninganna og er niðurstaðan því ógild. Fregnirnar ullu miklu fjargviðri og hafa þónokkrir krafist tafalausrar afsagnar ritstjóra Tískubloggsins eftir þessar fregnir. En lögfræðingur minn er með málið í skoðun og mun í fyllingu tímans koma með tillögur að lausn sem ég vona að allir geti sætt sig við.

Ég óska höfundi tillögu #8 engu að síður til hamingju með úrslitin.

***  

Ég skulda Tobbu afsökunarbeiðni.

Því það hefur mikið vatn runnið til sjávar síðan ég skrifaði færsluna Takk fyrir ekkert, Tobba (sjá hér) og færði sannfærandi rök fyrir því að Tobba væri markvisst að reyna að bregða fyrir Tískubloggið fæti.

Hún fullyrti að besta leiðin til að ná frama væri að byrja að blogga, en þarsem ég hafði bloggað í heila þrjá mánuði þegar ég skrifaði færsluna en ekki fengið eitt einasta tilboð, þá fannst mér eðlilegasta skýringin vera sú að Tobba hefði lagt stein í götu mína því það væri ljóst að lífstílsbók mín myndi vera í beinni samkeppni við lífstílsbók hennar.

En hún virðist hafa verið einlæg í skrifum sínum, og ég ekki gefið forleggjurum og öðrum nægilegan tíma til að uppgötva óbrigðult tískuvit mitt og næmlega framsetningu, því Tískubloggið er nú ekki einungis komið með útgáfusamning fyrir lífstílsbók, heldur hefur Tískublogginu verið boðið að ganga til liðs við tvö vefrit og hvorki meira né minna en tvö dagblöð/tímarit hafa beðið Tískubloggið að koma lesendum þeirra til bjargar með hinum ýmsu ráðleggingum.

Að vísu hefur Tískublogginu ekki verið boðið að stýra sínum eigin sjónvarpsþætti ennþá, en ég trúi ekki öðru en að það sé einungis tímaspursmál hvenær það gerist. (Þannig að nú fer hver að verða síðastur, kæru framleiðendur!)

Þannig að Tobba mín; Ég iðrast og ég vona að þú getir fyrirgefið mér.

(Og ég ætti kannski að nota tækifærið og þakka Tobbu pistilinn um kvenrembur (femínista) sem hún ritaði nýverið (sjá hér). Það var kominn tími til að einhver sendi þessum kvenrembum (femínistum) tóninn. Því það er alveg óþolandi hvernig þær eru alltaf að segja konum hvernig þær eigi að haga sér og hvaða störf þær eigi að vinna og hvernig þær eigi að klæða sig og hvernig þær eigi (ekki) að mála sig. (Ég meina, hver hefur ekki séð þær í snyrtivörudeildum Hagkaupa að líma svona límmiða einsog eru á sígarettupökkum á snyrtivörur, nema á þeim stendur Snyrtivörur drepa heilann, og hver hefur ekki orðið var við áróður þeirra á kvennaklósettum í háskólum á Íslandi þarsem þær segja námsmeyjum að þær verði að þrífa óþverrann (þeirra orð) framan úr sér ef þær ætli að standast prófin) Því þessar kvenrembur (femínistar) eiga nákvæmlega ekkert með að segja konum hvernig þær eigi að hegða sér. Nei, til þess þarf einhvern sem hefur eitthvað alvöru vit á málunum einsog Tobbu sjálfa (og raunar mig), og til allrar hamingju notar Tobba lífstílsbók sína óspart til að segja konum hvernig þær eigi að hegða sér á Facebook, hvernig varalit þær eiga að nota, hvernig þær eigi að klæða sig ef þær eru með lítil brjóst, hvernig þær eigi að prumpa, og margt, margt fleira.)

***

Tískublogginu hafa borist mörg aðdáendabréf þarsem lesendur lýsa yfir aðdáun sinni á Tískublogginu og forvitni um efnistök lífstílsbókarinnar. Vegna fjölda áskorana hef ég því afráðið að birta hér brot úr fyrsta kafla bókarinnar.

Einsog gefur að skilja vil ég síður vera að birta texta bókarinnar hér ókeypis á netinu, því þá á enginn eftir að kaupa hana þegar hún kemur út. 
Ég dulkóðaði því kaflabrotið sem birtist ykkur hér að neðan. 


*****, ****** ** **********

*****

***** ** ***** ******* ******, *** ****** ** ******** ** ***********. ** *** ******** ******** ********* ****. ****** ****** ***, *****, ******, ****** ** *******. ****** ***** ** ******* ** *********. ********** ******* ****** ****** ****** ****.
1) *******. 
2) *** ** *****.
3) *****.
4) ****, ***** ** ******.
5) ***.

********* ** ******

******* ** **** ****** ***** ******. ****** ****, ****** ***. ****** ***** ** ******* ** *********. ********** ******* ****** ****** ****** ****. ****** ****** ***, *****, ******, ****** ** *******.

Ég vona að þetta gefi ykkur einhverja hugmynd um innihald bókarinnar og hvetji sem flesta til að tryggja sér eintak.

***

Bob Gray.

***








***

xoxo
-h

Sunday, January 23, 2011

átfitt dagsins

Hola lovers,

Ég er ekki lengur þunn og átfitt dagsins er ekki svo frábrugðið átfitti gærdagsins.


Peysa: Útlönd.

Bolur: Útsala.

Buxur: Af kærasta.

Sokkar: Ósamstæðir (ég veit ekki hvort það skilar sér almennilega á myndinni, en einn er bleikur og hinn er rauður).

Hár: Skítugra en í gær.

Naglalakk: Má muna fífil sinn fegri.

xoxo
-h

Saturday, January 22, 2011

átfitt dagsins, o.fl.

Hola lovers,

Ég er þunn.

Fleira var það ekki í bili.

Eða jú annars, þeir sem eru aðdáendur Tískubloggsins á Facebook eru miklu betri en þeir sem eru það ekki, og það er þessvegna sem þeir fengu að vita á undan ykkur hinum að nú hafa tekist samningar á milli Tískubloggsins og framúrstefnuforlagsins Ókei Bæ(kur) um útgáfu á lífstílsbók Tískubloggsins. Ég mun því sitja sveitt við skriftir (um leið og ég hætti að vera þunn) og bókin kemur að öllum líkindum út í sumar. Þar verður fjallað um hin ýmsu málefni, megranir, fegranir og fleira skemmtilegt. Ef þið hafið einhverjar ábendingar um efni sem þið viljið sjá í bókinni skuluð þið fyrir alla muni koma þeim á framfæri hér í kommentakerfi eða senda mér póst á tiskublogg@gmail.com.

En vindum okkur í þunnudagsátfittið.


Bolur: Keyptur á útsölu í Smáralind.

Buxur: Af kærasta.

Sokkar: Prjónaðir.

Hár: Óþvegið.

xoxo
-h

Sunday, January 16, 2011

verður staðgöngumæðrun nýjasta tískan?

Hola lovers!

Bloggfærslur um staðgöngumæðrun virðast vera í tísku núna (einsog þær voru að því er virðist líka árið 2007, þið vitið hvernig þetta virkar, tískan fer í hringi) og þarsem Bleikt.is hefur meira að segja birt pistil um málið fannst mér að Tískubloggið gæti ekki látið sitt eftir liggja.

Og Tískubloggið, líktog pistlahöfundur Bleikt.is, er afar hlynnt því að staðgöngumæðrun fátækra gegn greiðslu þeirra ríkari verði lögleidd hér á landi. Að sama skapi finnst mér sjálfsagt að Íslendingar með eitthvað á milli handanna geti nýtt sér líkama fátækra kvenna í þriðja heims ríkjum til barnaframleiðslu, hvort sem konurnar ganga með þeirra börn eða þeir kaupa erfaefnið af þeim í leiðinni líka.

Því það eru mannréttindi ríkra að fá að eignast börn. Þetta er réttur sem ætti að mínu mati að vera bundinn í stjórnarskrá (alveg einsog réttur ófríðra karlmanna til kynlífs ætti að vera bundinn í stjórnarskrá, en það er einmitt ástæðan fyrir því að samfélagið þarfnast vændiskvenna, því einhver verður að fórna sér fyrir öll þessi einmana karlmenni, þeir hafa þarfir, þið vitið).

Þið vitið auðvitað líka að ríkt fólk á peninga afþví að það er betra en fátæka fólkið. Það er gáfaðra, betur innrætt, betur menntað og meira virði, og virði þeirra í veröldinni endurspeglast í efnahag þeirra. Þetta er beisikk kapítalísk kenning, sem fyrir löngu hefur verið sönnuð, og því á ríka fólkið skilið að eignast börn þegar það vill, frekar en þeir sem eru ófrjóir en hafa ekki efni á því að borga fyrir þjónustuna.

Í Vestrænum ríkjum hefur mikið verið rætt um tenginguna sem móðir myndar við ófætt barn sitt og öfugt, en sem betur fer þá þekkist slíkt ekki í þriðja heims ríkjum. Fátækum þykir heldur hvort sem er ekkert jafn vænt um börnin sín og ríku fólki þykir, því fátækir eru svo vanir því að missa þau úr vosbúð og hungri.

Einhverjir hafa bent á að þessar fátæku konur í þriðja heims ríkjum fái kannski ekki að ráða þessu sjálfar, heldur séu það mögulega mennirnir þeirra sem skipi þeim að ganga með börn fyrir annað fólk og hirði svo peninginn sjálfir, en ég sé ekki hvernig það geta verið mótrök gegn staðgöngumæðrun gegn greiðslu. Því einsog allir vita á eiginmaður ávallt rétt á ótakmörkuðum aðgangi að líkama konu sinnar, og hann ræður hvað hann gerir við hann.

Svo er líka einn punktur sem mér finnst alveg vanta í umræðuna, og það er að meðgöngu fylgir gjarnan slit á maga og brjóstum, og það ætti að vera sjálfsagt að konum sem er annt um líkama sinn en vilja samt fjölga mannkyninu standi til boða að fá einhvern til að gera þetta bara fyrir sig.

Eins fylgir því viss áhætta að ganga með barn og það er alltaf ein og ein kona sem deyr við barnsburð, og mér finnst eðlilegt að fólk sem á peninga fái einhvern til að taka áhættuna fyrir sig. (Ég meina, það er ástæða fyrir því að í bíómyndum er fenginn stöntmaður til að leika áhættuatriðin fyrir stjörnuna, því stjarnan er miklu verðmætari einstaklingur. Og stöntmaðurinn er oftast í betri þjálfun líka, og á sama hátt eru þessar fátæku konur í miklu betri þjálfun við að eignast börn.)

Að vísu eru töluvert meiri líkur á því að látast við barnsburð í þriðja heims ríki, en það búa líka miklu fleiri þar en á Íslandi þannig að þeir mega alveg við smá afföllum.

xoxo
-h

átfitt dagsins

Hola lovers,

Hér er átfitt dagsins:





Kínasloppur: Keyptur í Kína.

Leggó: Keyptar í verslun á meginlandi Evrópu.

Blár sokkur: H&M.

Grár sokkur með bleikri kisu á ilinni: Keyptur á næturmarkaði í Taipei árið 2006.

Hár: Í svartri teygju sem keypt var í Kringlunni.

xoxo
-h

daily bobsession!

Bob Moss.

xoxo
-h