Monday, November 8, 2010

hollráð handa kvenþjóðinni

Hola lovers,

Einsog þið vitið þá leggur Tískubloggið sig fram um að ráðleggja konum hvernig þær eigi að hugsa og hegða sér til þess að líkurnar á því að þóknast karlmanni séu ávallt í hámarki.

Því vil ég benda kvenkyns lesendum mínum á þennan afar nytsama pistil. Það var nú aldeilis kominn tími til að einhver karlmaður léti heyra í sér og benti kvenþjóðinni á hvað hún gæti bætt í fari sínu. Listinn telur 15 atriði, og er það vel. Þó eru þau að mínu mati mismikilvæg og ég vil því sérstaklega draga fram þrjú atriði sem þessi ónefndi maður tæpir á og ræða þau frekar. Því höfundur listans talar undir rós, en þessi atriði geta skipt sköpum í þeirri flóknu list sem felst í því að þóknast karlmanni, og því tel ég það afar, afar mikilvægt að lesendur mínir átti sig vel á því hvað hann á við og misskilji ekki neitt.

Fjórði liðurinn sem þessi ágæti maður nefnir er „Alvarleiki / Húmorsleysi“. Þarna bendir hann konum á að þær eigi að hafa húmor fyrir sjálfum sér. Með þessu á höfundur við að þú átt að sýna honum þá sjálfsögðu kurteisi að hlæja að öllum bröndurunum  hans, þó þeir séu á þinn kostnað, þér finnist þeir kannski niðrandi í þinn garð eða hreinlega ekki fyndnir. Karlar eru nær undantekningarlaust miklu gáfaðri en konur, þeir hafa miklu háþróaðra og næmara skopskyn, og því er óhætt að draga þá ályktun að ástæðan fyrir því að þér finnist brandarinn ekki fyndinn sé hreinlega sú að þú skilur hann ekki. Höfundur er meira að segja svo vænn að koma með dæmi um brandara sem þér á að finnast fyndinn, en í honum gefur hann í skyn að kvenkynið hafi lítið þróast í gegnum árin. Fyrstu viðbrögð þín eru ef til vill þau að brandarinn sé niðrandi í þinn garð og jafnvel kvenþjóðarinnar allrar, og þig langar ekki að hlæja að honum, en í raun þá skilur þú ekki húmorinn í honum. Þetta er hárfín kaldhæðni. Lestu brandarann aftur og aftur og ef þú skilur hann ekki enn þá skaltu lesa þetta hér.
Skólabókardæmi um femínista.

Áttundi liðurinn „Kvenremba (Femínisti?)“ bendir á þá augljósu staðreynd að enginn nennir að púkka uppá kvenrembur, a.k.a. femínista. Enda eru þær, einsog höfundur listans bendir réttilega á, „bitrar og gramar konur sem þrá fátt heitar en að sjá karlmenn hengda upp á millifótakonfektinu“. Að auki eru þær ógeðslegar, ljótar, leiðinlegar og loðnar konur sem eru alltaf með einhvern uppsteyt og leiðindi. Þær geta aldrei slakað á og eina ástæðan fyrir því að þær kalla sig femínista er að sú að þær leggja hatur á karlkynið einsog það leggur sig afþví að enginn vill sofa hjá þeim. Og, einsog höfundur nefnir, ef að þær væru alvöru jafnréttissinnar þá myndu þær að sjálfsögðu hætta að beita sér fyrir kvenréttindum og í staðinn fara að berjast fyrir réttindum karla þarsem á þá hallar.

Í fimmtánda og síðasta liðnum, „Kynlífsbann“, nefnir höfundur hina óskráðu reglu sem ríkjandi er í okkar samfélagi varðandi kynlíf, og hún er sú að það eru í raun bara ein réttmæt ástæða fyrir því að kona megi neita manni sínum eða kærasta um kynlíf. En það er einungis „þegar karlmaður er vondur við konuna sína (ofbeldi eða framhjáhald)“. Annars á hann fullan rétt á því að hafa aðgang að líkama þínum þegar honum hentar, „því ófullnægður karlmaður er ósáttur karlmaður“. Það skiptir engu þótt þú sért þreytt, pirruð eða með hita og niðurgang. Ef þú vilt halda í manninn þinn er eins gott að þú bítir á jaxlinn, því einsog höfundur listans bendir á þá ert þú „ekki sú eina í heiminum með leggöng og munn“.

Ég segi amen við því, bróðir!

xoxo
-h

8 comments:

  1. Já, það er gott að manni sé bent á þetta reglulega. Ég á t.d. mjög erfitt með að hlæja að sumum bröndurum karlmanna en ég æfi mig reglulega að hlæja sannfærandi svo enginn fatti að ég skilji ekki brandarann og svo fylgist ég með þessum reglulega: http://www.menarebetterthanwomen.com/
    Bara svona til að gleyma þessu ekki.

    og einmitt, eins og þú bendir á, þá skil ég ekki af hverju konur geta ekki barist fyrir réttindum karlamanna á sama tíma og þær berjast fyrir sínum réttindum. og ef þær hættu bara að vinna og reyna að framapotast þar, þá hefðu þær meiri tíma til að vinna að jafnrétti og réttindum karlanna sérstaklega, enda hefur sú réttindabarátta verið vanrækt allverulega undanfarin ár!

    ReplyDelete
  2. Kæra H,
    Takk kærlega fyrir að minna mig á! Ég er búin að vera með sama manninum í nokkur ár og dett stundum í þá grifju að halda að ég geti byrjað að slaka á og vera ég sjálf. En svo les ég einhverja svona gullmola og fatta hvað ég er er fáranlega barnaleg (konur eru oft barnalegar, og sexý líka). Maður er auðvitað aldrei save, eða þú veist hvað ég meina.
    Einlæg aðdáendakveðja,
    Margrét V.

    ReplyDelete
  3. Já, mjög ganglegt að fara svona ítarlega í pistilinn hans Sæsa. Fylgi ráðum þínum í þessu sem og fatavali og þá opnast nýr heimur:)

    ReplyDelete
  4. Afhverju ert þú ekki á eyjunni! Mjög hressilegt blogg:)

    ReplyDelete
  5. ...sé þetta allt saman núna! Því lík uppljómun og eins og ég skil þetta - fari ég ekki eftir þessum 15 gullnureglum þá og sérstaklega síðasta liðnum ná mun hann bara halda framhjá mér

    ReplyDelete
  6. Það er líka dásamlegt hvað Hlín segir í öðrum pistli að eftir að hafa tekið saman upplýsingar frá ýmsum karlmönnum, þá hafi hún komist að því að konur noti kynlíf sem gjaldmiðil. Þær refsa karlinum með kynlífsbanni og nota það sem stjórntæki. Það er náttúrulega fáranlegt að gera. Karl á rétt á líkama kvenmans þegar hann vill. Konan hefur engan rétt á að neita honum um kynlíf þegar hún er eitthvað fúl eða pirruð....bara til að refsa honum. Ég trúi ekki að konur geri svona. Þetta er svo ómanneskjulegt, vita þær ekki að það endar bara með því að karlinn leitar annað.

    ReplyDelete
  7. Ég vil færa þér mínar allra bestu þakkir, H.

    Eftir að ég varð 39 kg (þökk sé megrunarráðum þínum) náði ég mér í kærasta. Honum finnst ég einmitt stundum húmorslaus þegar ég hlæ ekki að Spaugstofunni eða bröndurum hans um svertingja og femínista.

    Líkt og þegar ég var á algjörum villigötum í megruninni (ég borðaði t.d. prótein og stundum tveimur tímum fyrir svefn) hjálpar þú mér að sjá sannleikann í lífinu og gerir líf mitt betra. Kærastinn minn er auðvitað gáfaðri en ég og með þróaðri húmor! Mér fannst þetta eitthvað skrítið en eftir þinn pistil sé ég hvar hundurinn liggur grafinn.

    Þú kemur mér ekki bara í besta líkamlega form lífs míns heldur bjargar ástarsambandinu mínu!

    TAKK!

    xoxo

    ReplyDelete
  8. Verði ykkur að góðu, kæru aðdáendur.

    ReplyDelete