Tískubloggið sniðgengið - framhald af framhaldinu

Hola lovers,

Það var annað sem ég lærði á sjálfsstyrkingarnámskeiðinu hjá Jónínu Ben, og það var; Aldrei gefast upp.

Þarsem Pjattrófurnar svöruðu mér ekki ákvað ég að koma kvörtunum mínum á framfæri við ritstjórn Eyjunnar.

Frá: tiskublogg@gmail.com 

Til: ritstjorn@eyjan.is

Fyrirsögn: Tískubloggið býður fram aðstoð sína

Dagsetning: 12. október 2010 10:59

Kæra ritstjórn Eyjunnar,

Foucault rannsakaði fyrstur allra kynlífshegðun geðsjúklinga í Frakklandi. Hann var brautryðjandi á sviðinu, en mætti andstöðu og afskiptaleysi kollega sinna áður en hann naut loks sannmælis.

Ég hef mætt andstöðu og afskiptaleysi kollega minna á Pjattrófublogginu. Sjálf held ég úti merku tískubloggi (www.tiskublogg.blogspot.com) og ég hef stundum skrifað athugasemdir við hina ýmsu pistla á Pjattrófusíðunni sem þær hafa síðan eytt umsvifalaust og án útskýringa. Ég sendi þeim póst í síðustu viku þarsem ég krafðist skýringa á athæfinu, en ég hef engin svör fengið. 

Þeir sem eitthvað vita um rafræna fjölmiðlun vita að persónuleg samskipti á milli lesanda og miðils skipta höfuðmáli, og mér fannst réttast að benda ykkur á að skósveinar ykkar á Pjattrófublogginu falla á því prófi.

Sannast sagna þá finnst mér þær hreint ekki standa sig vel. Tískubloggið gerir flest (ef ekki allt) betur en Pjattrófurnar. Sem dæmi mætti nefna pistilinn „Einföld ráð til að missa kíló“ (http://pjattrofur.eyjan.is/2010/08/18/einfold-rad-til-ad-missa-kilo/) og sambærilegan pistil sem birtist á Tískublogginu „14 leiðir til að grennast“ (http://tiskublogg.blogspot.com/2010/08/14-leiir-til-grennast.html). Ég bar saman hitaeiningafjölda í ráðlögðum mataræðum og ykkur blöskrar kannski að heyra þetta, en það voru langtum færri kaloríur í ráðleggingum Tískubloggsins, sem gerir megrunaraðferðina áhrifaríkari og pistil Tískubloggsins því mun betri til síns brúks en sambærilegur pistill Pjattrófanna.

Pjattrófurnar skrifuðu einnig pistilinn „Eðli karlmanna“ (http://pjattrofur.eyjan.is/2010/07/30/edli-karlmanna/) þar sem þær ráðleggja konum hvernig best sé að hegða sér til að ná sér í maka. Í nær öllum færslum Tískubloggsins koma fram góð ráð um það hvernig kona á að hugsa og hegða sér til að líkurnar á því þóknast karlmanni séu alltaf í hámarki, en pistillinn „100% náttúrulegur líkamsmaski“ (http://tiskublogg.blogspot.com/2010/08/100-natturulegur-likamsmaski.html) var sérstaklega skrifaður með einhleypar konur í huga. 

Ég hef gert bæði eigindlega og megindlega rannsókn á því hvernig einhleypum konum sem fóru eftir ráðunum í „Eðli karlmanna“ annars vegar og ráðunum í „100% náttúrulegur líkamsmaski“ hinsvegar reyddi í kjölfarið af í leit sinni að framtíðarmaka, og niðurstöður mínar sýndu með óyggjandi hætti að þær konur sem fóru eftir ráðum Tískubloggsins voru tæplega 18% líklegri til þess að ná sér í kærasta. Þar sem skammt er síðan rannsóknin hófst þá er ekki hægt að fullyrða á þessu stigi málsins hvort að konurnar hafi fundið sér framtíðarmaka, en Tískubloggið  mun halda áfram að fylgjast með þeim og marktækar niðurstöður ættu að liggja fyrir innan 25 ára.

Tískubloggið hefur líka betra auga fyrir fegurð en þær sem skrifa á Pjattrófubloggið og engum lesanda dylst að Tískubloggið ber mun betra skynbragð á tísku.

Ég vil því eindregið ráðleggja ykkur að losa ykkur við Pjattrófurnar og jafnframt bjóðast til að fylla í skarðið sem þær munu skilja eftir sig efst til hægri á síðunni ykkar. Enginn getur efast um að Tískubloggið ber höfuð og herðar yfir Pjattrófubloggið, og ég er fullviss um að með liðsinni Tískubloggsins gæti Eyjan orðið vinsæll vefur.

Réttar upplýsingar um eignarhald fjölmiðla eru mikilvægar í frjálsum lýðræðisríkjum og því ber mér skylda til að upplýsa ykkur um það að aðalstyrktaraðili síðunnar er gæludýrafóðursframleiðandi. 

Ég tel gagnsæi í vinnubrögðum fjölmiðla vera fyrir öllu og því mun ég birta þennan tölvupóst og svarbréf ykkar á heimasíðu minni til að fyrirbyggja þann misskilning að ráðning mín sé pólitísk.

Ég ráðlegg ykkur því að vanda málfar og stafsetningu í svarbréfi ykkar, því það er ritstjórnarstefna Tískubloggsins að leiðrétta ekki innsenda texta fyrir birtingu og ég vil síður að þið verðið ykkur til skammar.

Mér skilst að Egill Helgason fá 300.000 krónur á mánuði fyrir að blogga hjá ykkur, en þar sem ég er kona mun ég sætta mig við 15,5% minna, eða 253.500 krónur á mánuði.

Virðingarfyllst,

-h 

Og sem fyrr hef ég sönnunargögn máli mínu til stuðnings.

Sönnunargagn A1. Smellið til að stækka.

Ritstjórn Eyjunnar svaraði ekki. Grunur minn um að ekki væri allt með feldu á ritstjórninni styrktist og ég sá að þeir höfðu enn meiri þörf fyrir aðstoð mína en ég hélt í fyrstu.

Frá: tiskublogg@gmail.com

Til: ritstjorn@eyjan.is

Fyrirsögn: Re: Tískubloggið býður fram aðstoð sína

Dagsetning: 13. október 2010 14:00

Kæra ritstjórn Eyjunnar,

Það er greinilegt að þið eruð heldur ekki mjög vel að ykkur í því hvernig rafræn fjölmiðlun virkar, ekki frekar en Pjattrófurnar sjálfar. 

Ég vil því benda ykkur á þessa grein, „10 Golden Rules of Social Media“ (http://gigaom.com/collaboration/10-golden-rules-of-social-media/) og mæli með því að þið lesið nr. 2 og nr. 4 gaumgæfilega.

Þar sem starfsfólk Eyjunnar virðist vera höfuðlaus her þá vildi ég jafnframt forvitnast um hvort staða ritstjóra sem auglýst var til umsóknar nýverið sé ennþá laus, og hvort það sé nokkuð of seint að senda inn umsókn?

Virðingarfyllst,

-h

Sönnunargagn B1. Smellið til að stækka.

Enn fékk ég ekkert svar. Það var greinilegt að Tískubloggið þurfti að grípa til aðgerða.

 Frá: tiskublogg@gmail.com

Til: ritstjorn@eyjan.is

Fyrirsögn: Re: Tískubloggið býður fram aðstoð sína

Dagsetning: 15. október 2010 09:28

Ritstjórn,

Ég tek þögn ykkar sem samþykki og mun hefja störf sem ritstjóri Eyjunnar um næstu mánaðarmót.

Virðingarfyllst,

-h

Sönnunargagn C. Smellið til að stækka.

xoxo
-h